الاثنين، 11 أبريل 2011

عوده رامى الساقط معاهم!!! فى الثوره

بلاش تتخض من العنوان ..هو طبعا حاجه تضحك و يمكن تكون غريبه لكن افلام احمد عيد و بالاخص الجديد منها ماشى مع ترتيب احداث البلد قوى , لسه مش فاهمنى ؟؟؟ طب اقرا التدوينه و انت تلاحظ بنفسك ...


المرحله الاولى : رامى الاعتصامى  


















فى المرحله دى بذات فى اول كام يوم تشابهه الاحداث الواقعيه مع الفيلم كان بيضحكنى انا شخصيا ...مجموعه شباب من على الفيس بوك لا ليه فى السياسه ولا اى حاجه مجمعين نفسهم و بيعملوا مظاهرات بشعارات موزونه شعريه يمكن رومانسيه احيانا فى مواجهه فطاحل السياسه و هنا اعنى نظام و معارضه  , و نفسى المبدا ده يوصل بقى الناس ما عملتش الثوره دى عشان تنصر المعارضه على النظام لان باختصار الناس نزلت الشارع لما فقدت الامل فى ان المعارضه دى قابله لفعل اى شئ و عشان كده بتغاظ لما يطلعوا يكلمونا على انهم هما النظام الجديد ..لكن any way من النقطه دى خالص , الشباب الفيسبوكى ده عمل نظاهرات بمطالب و اصرار عليها بمبدا اللزقه برضه زى الفيلم مع وجود تعنت نظامى بمراحله المعهوده الاول بالتهميش دول زوبعه فنجان و بعدين بطريقه سيبهم يجعجعوا ثم محاوله الوقعيه و انتهى الفيلم بحريقه رمزيه اتمنى الا تحدث فى النهايه الواقعيه ...فى جزء لاحق فى الفيلم بيبتدى الفقراء و العشوائيين يطالبوا بحقوقهم هما كمان وسط تقزز من الطبقه الفيسبوكيه من هؤلاء برضه وضع مشابه مع الواقع و كفايه لفظ "فئويه"  لدرجه انها بقت شتيمه شبابيه على طريقه : تصدق انت واد فئوى!!....طبعا باستثناء يوم 28 يناير و الجمل  و كميه الدم المراق و الناس اللى ماتت و المأساه دى فالاحداث متشابهه ...طبعا مع ذكر الاخوان المسلمين اللى شاركوا فى الثوره  بالاتفاق مع نفس المبادئ....




المرحله الثانيه : انا مش معاهم















 هنا احنا روحنا بعد تقريبا شهر من بدايه الاندلاع لمرحله تانيه خااااالص ..انت فى مرحله مش بس اخوان لا ده انت وصلت لسلفيه و جماعات اسلاميه و عبود الزمر و لجنه اراقه الدماء و التكفير و الهجره لو عايز...كان فيلم "انا مش معاهم" من الافلام اللى ناقشت الموضوع ده بطريقه ممتعه فى عز ما كان تابوه درامى يخاف منه الجميع ...

دى مرحله نعم للتعديلات , اطلاله مانديلا التليفزيونات الزمر او كما احب ان ادعوه هو و صاحبه بريا و سكينه العصر الحديث , عصام العريان بيطلع من محطه لمحطه  , السلفيين بيتهموا الاخوان بانهم مش متدينين كفايه! , هدم اضرحه , تهديد بافساد الموالد , غزوه الصناديق و اللى مش عاجبه كندا تفوت جمل , الجزيه , لا نريدها علمانيه ولا ليبراليه ولا اشتراكيه ولا مدنيه بل اسلاميه اسلاميه , و الله اكبر و لله الحمد...


المرحله الثالثه : عاد لينتقم "خليك فى حالك"












و المرحله دى بدئت امبارح بس ...فى فيلم "خليك فى حالك" كانت اغنيه الفيلم بتقول عاد لينتقم فيطل علينا الرئيس محمد حسنى مبارك ليدلى ببيان للشعب المصرى بان "فتشنى فتش اه يا برداعى , لا و النبى لا انت مفتشنى " و حين تسألنى هل غضبتى من ظهور الريس؟؟ اقول بمنتهى الوقاحه و الصراحه لا ...بالعكس انا سعدت لما ظهر اولا اطمنت ان صحته بخير يعنى على الاقل من صوته ... اطمنت الى حدا ما انه فى مصر .. حسيت انه هياخد و يدى معانا شويه بمعنى انى اتغظت قوى هى الانظمه العربيه مالها بتتساقط بسهوله كده ليه؟؟ زى ما يكون زين العابدين ما صدق يهرب , بينما صمد القذافى طويلا طويلا على الاقل بين انه صاحب موقف حتى لو غلط لكن مش سهل كده ...انا افضل ان يكون من يحكم مصر فاسد ذو عقل من ان يكون كان كرسى الرئاسه خاوى او يملكه رجل لا عقل!!...نفسى يثبت لنا انه ذكى مناور و ان مصر مكنتش ماشيه بالقصور الذاتى و اهى ماشيه ..يثبتلى انه عاقليه حتى لو كانت فاسده او شريره...كلام عجيب طبعا عمرك ما سمعت رأى كده لكن على الاقل مش هنحس اننا بنكلم روحنا يبقى موجود حتى لما نشتمه ....

المرحله الرابعه المحتمله : اللهى ما يكتبها علينا يا رب ....مرحله "ليله سقوط بغداد"....




د/دودى
مدونه رفايع..مجرد رفايع 







18 التعليقات:

Casper يقول...

رأي الشخصي هو ممثل لا بأس به لكن أغلب أفلامه قصصها تافهة بتتناول جوانب سخيفة في الحياة فمن شاب متيم بشاب آخر يمشي مع الفتيات الجميلات إلى شاب تافه يخترع سلاح ردع إلى إنسان فاشل في الكلية يتورط في الارهاب وأخيرا رجل لا يوجد في حياته سوى ثلاثة أشياء الحشيش والنساء والفيس بوك

________

أي كان وبعيدا عن كل هذا نتفائل خير وندعو لمصر أن يحفظها الله من كل سوء

خالص تقديري لفكرك وقلمك
تقبلي مروري

Carmen يقول...

ده كان استفزاز رسمي انا بقي بعتبره نكرة ومايستحقش اننا نعيره بالا غير لمحكامته واخد حقوقنا اللي اتنهبت منه ومن اتباعه

غير معرف يقول...

عجبني الموضوع بغض النظر عن رأيي في ظهور الريس من عدمه
ولكني كنت دائما اقول ان الثورة ليست وليدة اليوم او الامس
الشعب المصري نفسه طويل
وصبر كتييييييييييييير

وان شاء الله
ان شاء الله
اللي جاي افضل

Casper يقول...

ايضا هو كده كده ترك البلد وخلاص
اعتقد أن ظهوره لا هيقدم ولا هيأخر بالعكس
هيثير حواليه الشكوك

faroukfahmy يقول...

د. دودى اختلفت الآراء حول افلام هذه الافلام وملاحقتها للاحداث واعتقد ان نجاحها من شهرة ابطالها
والذى شدنى اكثر فى مقالك ما يخص حستى مبارك ورأيك الجرئ الصريح الصادق وتشبيهك لما تريه صالحا للرئاسة
والعجيب كل العجب ان نبرات حسنى مبارك كانت مستعطفة وانها غلبت اى مقاومة فى تكذيبه ولكن هيهات كان زمان ولن نقول للزمان ارجع يازمانمع تحياتى.

رحاب صالح يقول...

اقولك اية....؟
مش عارفة
غير احساسيةبالقهر المادي والمعنوي
بجد مش عارفة لية نفسي اغمض عيني والاقي كل شيء اتغير زي ما كنت بتمني مش كل شيء اتلخبط كدة
مرت عليا مواقف خليتنا بجد احس اني في بلد غرييييييييييييييب جدا ....لا يمت اي شخص فيه للأخر بشيء ...بعديا عن كلام التليفزيون والفيس بوك ...انسي ...بجد بلد غرييييب

El - Shandwely يقول...

عجبنى التحليل أوى .. كل تفصيلة حصلت فى الثورة اللى فى البلد دى أو غيرها الفن شافها فى أشكال كتير وبأساليب مختلفة .. الفكرة كانت البداية تبقى ازاى أو ازاى الموضوع يتخطى فيلم او مسرحية ده اللى محدش فعلا قدر يشوفه بوضوح زى ماحصل

الظل يقول...

تدوينة جميلة برغم اعتراضي على ظهور الريس ف الوقت ده

ربنا يسترها علينا

ابراهيم رزق يقول...

بصفتى قريب شوية من السينما هو موضعاته افكارها كويسة ظلمت بضعف الانتاج

بمناسبة خطاب الرئيس و الافلام توجد فى مدونتى مسابقة ثقافية يا ريت تشتركى فيها بجوائز قيمة

تحياتى

د/دودى يقول...

كاسبر : هو رأى يحترم برضه هو صحيح افلامه خفيفه بس دايما بشوفها مميزه عن غيرها

د/دودى يقول...

كارمن : اهو كل واحد خد حقه و الله مالا شماته

د/دودى يقول...

ماشى بنور الله : كلها كانت مقدمات ...همسات على صوتها مع الوقت

د/دودى يقول...

farouk : اهو خد نصيبه....

د/دودى يقول...

re7ab.sale7 : نفس احساسى بالظبط...

د/دودى يقول...

El - Shandwely : اهلا فى اول زياره ليك....هو تحويل الفيلم لواقع كان هو المعجزه فى زمن ظننت الا معجزات فيه

د/دودى يقول...

الظل : بصراحه انا زعلانه من اللى بيحصله ده ...يلا كل واحد بياخد نصيبه

د/دودى يقول...

ابراهيم رزق : قريت تدوينتك و هاكلمك بوضوح انا اكتر حاجه بكرها فى دنياتى هى الشماته و بالتالى اعفينى...

ابراهيم رزق يقول...

اولا حبيت ارد عليكى عندك قبل ما ارد عندى
اولا اللهم لا شماتة
وصف القبح ليس بقبح و من يتعرض للعمل العام عليه بتقبل النقد
حديثه و نظرته المتعالية لقناة العربية واداءه التمثيلى تقدرى تقولى لى ماذا كان يعمل جمال مبارك
تقدرى تقولى لى ماذا يعمل علاء مبارك
الرسول عليه الصلاة و السلام يقول والله لو سرقت فاطمة بنت محمد لقطعت يدها صدق رسول الله
يوم خطابه قبل موقعة الجمل تعاطف معه بعض من كانوا فى التحرير و من بينهم صديق لى طبيب لكن بعد موقعة الجمل تحول الجميع فى موقفهم
ماذا يعنى ان تتصل بى زوجتى و هى تبكى بعد الاربعاء الدامى
ثم امى و هى تبكى بحرقة
انا لا اشمت انا اصف ما احسست به واذا كانت هناك فقرة بها شماتة ارجوكى قليها لى واعدك باعادة النظر فيها و حذفها اذا اعتنقت
انا لا ازعل من النقد
تحياتى واسف للاطالة

إرسال تعليق

حلو؟؟ وحش؟؟ طب ساكت ليه ما تقول....