السبت، 9 أبريل 2011

ثوره الشك!





فى يوم 7 فبراير (يعنى قبل الريس ما يسافر شرم) فى عز ما الناس ما كانت بتتبارى فى تسميه حركه 25 يناير , ايوه ايامها كانت لسه حركه و لم تكن قد اكتسبت بعد شرعيه الثوره بانضمام الجيش ليها كانت لسه well not power كان فى ناس يقولوا دى (ثوره الورد البلدى) او (ثوره اللوتس) عشان تبقى زى ثوره الياسمين بتاعه تونس و ناس تقولك دى ثوره الشباب ...انا ساعتها قلت يا جماعه انسب اسم ليها هو (ثوره الشك)....


قبل ما الريس يسافر شرم لما كان لسه فى الحكم كان فى اقتراح بانه يعقد فى الحكم و يسلم السلطه فى نهايه المده و خلال كده يعمل اصلاحات ...الكل يومها قال كلمه واحده : وانا ايه ضمنى؟؟؟ ما يمكن يجى ساعه الانتخابات و يرشح نفسه تانى و يقولك الناس متمسكه بيا؟؟ ....قلت يومها يا ناس هو احنا قاعدين عالقهوه ؟و السياسه مفهاش كده , مش معقول يقول حاجه و يرجع يعكسها يعنى ....بصراحه اتكبست يومها لما حد فاكرنى بجمله السادات الشهيره :" و بقولها من دلوقتى مش هجدد"!!...


جت المرحله التانيه و قالوا احنا عايزين ضمانات , قلت يومها يعنى يمضى لينا على وصل امانه ولا شيك على بياض؟؟ و قالوا لا عايزين الجيش يضمن والا مش لاعبين.....جه الجيش و ريح دماغه و قال انا ضامن ....و بعد التصريح ده توقعت الناس تهدى ما هو ده اللى قالوا عليه لكنى فؤجئت بالناس بتثور اكتر !..و بعدها ب 24 ساعه كانت البلد ولعت قدام القصر الرئاسى و فى الاخر الريس سابها مخضره...


مرحله رقم 3 : "الجيش مسك " هكذا لخصت الامر لبابا و هو فى الاوضه لاخبره بالنبأ ...و جاء الشك من الجميع هنا فالناس فى التحرير تحتفل و انا وحدى اتقلب بين الجمر ...الجيش؟؟ يعنى حكم عسكرى و احكام عرفيه؟؟ الجيش؟؟ يعنى زى 52 كده لما جم فى الاول و قالوا احنا قاعدين نحمى الدستور و بعدين غيروه و قاعدوا فى الحكم ابد الابدين؟؟ شك تانى هو احنا مش هنخلص بقى من القلق...و لكن جائتى بعض الطمأنينه بشعار " الشعب و الجيش ايد واحده" بتاع التحرير و لو انى فى مشكله نفسيه بينى و بين التحرير عموما لكن قلت اهو القلق يخلص و البلد ترجع تشتغل تانى....شهر عسل قصير كانت تلك الطمأنينه 


6 شهور بحالهم؟؟ رجع القلق تانى حسيتهم كتير ياااه 6 شهور من غير ريس ؟؟ هو الجيش عايز يبلط فيها ولا ايه؟؟ ....


6 شهور بس؟؟؟ نلحق نعمل فيهم ايه دول؟؟ هو الجيش متسربع ليه؟؟...


حكومه شفيق بقايا النظام,, عدل الحكومه ,,, عدلها تانى.. و تالت,,, شيل شفيق خالص...حط عصام شرف...مين عصام شرف ده اصلا؟؟... بيقولوا كان وزير نقل طب و ايه يعنى؟؟...شرف فى التحرير كويس باين عليه ثورى ..ايه ده مين اللى جنب شرف  فى التحرير ده؟؟ ده البلتاجى بتاع الاخوان؟؟ هو شرف اخوان؟؟ لا بس الاخوان مسكين فيه....الثوره اتسرقت الاخوان مسكوا كل حاجه ... الجمعه كلها اخوان بص حتى عالمنصه ..فين وائل غنيم؟؟ امريكانى لا لا تبع جوجل؟؟ بيعيط فى التليفزيون و بيرقص مع صحابه...مؤامره مؤامره ....


قول لا من اجل يسوع...قول نعم لله و رسوله ...اللى بيقول لا دول وطنيين ..اللى يقول نعم اخوان و فلول ... اللى هيقول نعم هيدخل الجنه... الحق سويرس هيرشح نفسه لا يا عم ده نفى ...التزوووير رجع تانى...مفيش تزوير و دور ...لو طلعت النتيجه نعم هنرجع التحرير.. فين الديمقراطيه اللى بيقولوا عليها...4 مليون بس؟؟...ده الاخوان دول جامدين قوى ....لا قشر البندق لا ....اه قلب البندق اه ..قلب البندق بيدق و يرق و يشق ده كان زماااان...


شك, شك , شك ...ابعدوا الدبابيس من دماغى بقى!!!


الحق الشرطه العسكريه بتحتك بالناس...يستهلوا كفايه بقى البلد تعبت...لا لا لا احنا اللى جايبن الجيش و نقدر نمشيه فى اى لحظه...مليونيه؟؟؟ لا القانون الجديد يمنع الحاجات دى.... شرف باع الشرف و قلب عالثوار..متوقعوش بينا و بينه يا اعداء الوطن...يا فلول ...


الجيش متفق مع حسنى....لا طبعا بلاش الحركات دى متوقعوش بنا و بين الجيش يا فلول... 700 الف مليار دولار فى سويسرا...كل دى فلوس يا ولاد التيت؟؟..الارقام دى مبالغ فيها...الفلوس دى هترجع ازاى...يا عم هو اللى راح بيرجع ...مؤامره مؤامره

السلفيه , الاخوان, الجماعات الاسلاميه . الاقباط , التكفير و الهجره........شك شك شك شيلوا الدبابيس

س/ اخبار الشغل ايه؟؟؟؟؟

ملحوظه: المقاله دى جائت بعد رعبى و خوفى من مقالات اشبه بدى
http://cinemascopemagazine.blogspot.com/2011/04/blog-post.html

16 التعليقات:

Casper يقول...

للاسف بعد سقوط الرئيس السابق اصبح لدينا 90 مليون رئيس للبلد

لكِ الله يا مصر

...

د/دودى يقول...

كاسبر : هههههه....
فى ماتشات الكوره 90 مليون محلل كروى
فى الدين 90 مليون مفتى
فى السياسه 90 مليون محلل سياسى

Casper يقول...

هيا دي مشكلة الشعب المصري
كل واحد بيفتي فيما لا يعلم
لو كل واحد ترك كل مجال لأهله كانت كل مشاكلنا اتحلت

عماد هلال يقول...

أحنا لازم نهدى ونفكر كويس ، مش مهم قوى ندخل فى عالم الثقه مرةواحده ، خاصة أن الثقه لا تأتى للحياة مثل الورد الصناعى مرة واحده .. والشك بداية اليقين ..وأنا أشك اذن أنا موجود ..هناك وليد جديد يالا بينا نحتضنه ونحبه..لابد من تعظيم الثقة مع الجيش.. وبلاش ترك الامر للمزايدين .

Elsayed Azab يقول...

فعلا السياسة مش هتأكل الناس عيش زى مبيقولو وزى مضمون كلامك ك سؤالك الأخير ..

بس هقولك على حاجة لما تشوفى التاريخ الحديث كله والثورات اللى حصلت فيه هتلاقى ان كلها كان بعدها ثورة مضادة .. وعندنا هنا لم الشرطة كلها تنسحب فنفس الوقت يبقى ايه ثم ايام الثورة الكنايس كلها كانت من غير امن ليه بعد الثورة مل تبداتجنى ثمارها نلاقى اطفيح وتورط عضو حزب بوطنى ونائب الدائرة فيها ومظاهرات فئوية فى توقيت واحد فى كل المصالح العامة .. واخرها امبارح لما حاولو يوقعو بين الجيش والشعب .. وغيرها

أنا باحترم وجهة نظرك جداااا .. زى ما ليا وجهة نظر برضو تتلخص فانه لا بد من تطهير البلد كاملة من كل فلول الحزب الوطنى بحاجتين اتنين بس حل الحزب الوطنى وكل اتباعة من كل المناصب والتانية محاكمتهم .. علشان مش كل ما البلد تهدأ يحاولو يولعوها .. أنا عاوز استقرار بلدى مش استقرا الفساد فى بلدى تحت اى طرف اومسمى اوشعار..

ومع ايضا ايمان كل مصرى انه يجب عليه ان يعمل بما يرضى الله وينحى جانبا فى هذه الفترة التاريخية والحاسمة من تاريخ بلده عليه ان ينحى جانبا مصلحته الشخصية امام المصلحة العامة لبلدة ..

دمتى بكل ود وعز وسعادة ان شاء الله ..

تحياتى

د/دودى يقول...

كاسبر: و الله الدنيا تبقى فل لو الفتى مكنش شغال على ودنه

د/دودى يقول...

استاذى عماد: دائما متفائل ... حضرتك شايف ان الشك اول اليقين و انا شايفه ان بدايتها شك و ما اظنش الثقه جايه فى هذا الجو المعتم...

د/دودى يقول...

السيد : انا عن نفسى ابتديت احس اننا انتقلنا من مرحله الثوره المضاده لمرحله الفوبيا و البرناويا بل و الشيزوفيرنا....انا عن نفسى عايزه تطهير مش قطع رقاب مش عايزه زى ما 23 يوليو عملوا....

Kem يقول...

على فكرة ان يمشى رئيس و يجى 90 مليون دى حاجة كويسة مش وحشة و ده الاحسن لان مش كل واحد من التسعين مليون هيعمل اللى هو عايزه انما التسعين مليون هيعملوا الحاجات القليلة اللى معظمهم هيتفق عليها زى الاستفتاء كده
الفكرة مش ان الواحد المفروض يتكلم فى الحاجة اللى بيفهم فيها المفروش يتكلم فى الحاجت اللى تخصه و السياسة تخص الشعب اجمع بس برضو مش بتاكل عيش

د/دودى يقول...

اغانى الشتا : كلنا ريس بيقول رأيه بس...محدش بينفذ ولا بيشتغل و نفسى اعرف ايه وجه التعارض بين الشغل و الابداع و بين اننا نهتم بالسياسه...

Carmen يقول...

بجد الواحد تعب ومبقاش عارف فين الصح

د/دودى يقول...

كارمن : مش عارفه اذا كان ده ممكن يريحك بس دى حالتنا كلنا اطمنى انتى مش لوحدك..

ابراهيم رزق يقول...

السلام عليكم

انا كنت فى التحرير من يوم 28 و الله كانت احلى ايام بصى كل اللى فى التحرير كان ليهم هدف واحد كل التيارات كان هدفها واحد حالة من انكار الذات و العمل
بعد الثورة كنت بارح التحرير ثم انقطعت اسبوعين حتى الجمعة الاخيرة و انا راجع مكتئب جدا جدا جدا
اصبحت التحرير بجانب انها سوق لبيع حمص الشام و سندوتشات الكبدة و السمين و الكشرى و السجائر و الاعلام و التمر هندى و العرسقوس و البوسترات و التشيرتات
سوق لبيع الزمم و عرض المصالح و اكتساب الغنائم و تصفية الحسابات و اكتساب ارضيات و الناس مش فاههمة لذا اول شغار ليا انا ابراهيم رزق الغلبان
الشعب يريد ان يفهم
اذا اعتبرتى انى بامثل بعض الشعب
تحياتى

د/دودى يقول...

ابراهيم : انا بصراحه منزتش التحرير خالص لعده اسباب مش وقتها دلوقتى لكن من السمع و المتابعه لاحظت الحاجات اللى بتقول عليها و ليا صحاب بيقولوا شكل الناس اختلف عن الاول...اما بالنسبه للشعار فعامل زى شعار عمرو اديب لما بيقول الشعب يريد ان يعرف ايه النظام؟؟...

انت كده خوفتنى اكتر

غير معرف يقول...

السلام عليكم و رحمة الله و بركاته اخواني اخواتي الأعزاء . أردة أن أدعو اخواني الغاليين لزيارة مدونة الامل و اعطائي رأيكم فيها
تقبلو مني فائق الاحترام و التقدير

سلام

د/دودى يقول...

مدونه الامل : و لو ان انا مش بحب جو الاعلانات ده ..بس اسم المدونه عجبنى

إرسال تعليق

حلو؟؟ وحش؟؟ طب ساكت ليه ما تقول....