على غرار "موقعه الجمل" كان فى مصر النهارده "موقعه الجلابيه" ...كاى اهلاويه كنت بتفرج على ماتش الزمالك النهارده بروح منقسمه فاما الخارجى فبشجع الزمالك بما انه بيلاعب فرقه بره مصر و انه بيلعب باسم البلد و بالتالى تشجيعه واجب قومى زيه زى المنتخب و ضيف على كده كون امى زملكاويه اصيله و زعيمه الزمالكويه فى المنطقه و العائله و بما انى جبانه عندما يصل الامر لامى فكنت بشجع من تحت الضرس, و اما الداخلى فطبعا كنت بتمنى لهم الخساره (روح الشر جوايا بنتصر فى الاحوال دى) على طريقه بطاطس زيت العربى مقرمش من بره و طرى و لذيذ من جوه و كل ما يجيب الزمالك جون ابتسم و قلبى بتقطع و كم رقصت فرحا لما دخل فيهم الجون و لكن دون تحريك عضله واحده باستثاء عضلات العبوس على الوجه...و فضلت اعد الثوانى و الدقائق عشان الزمالك يخسر و يطلع من البطوله كنوع من الشماته (نياهااااا ضحكات متقطعه شريره) لغايه ما جاب الزمالك الجون الثالث و هنا انتصرت فيها روح الاهلى و ابديت الحزن و الغضب و انكشفت للاسف و لو انى تقريبا كنت مكشوفه و محدش صدق الوطنيه اللى نزلت عليا دى و هنا اتلغى الجون و تحررت من الكبت و ابديت السعاده و المرح و الحبور و اللى يحصل يحصل بقى هى خناقه ولا اكتر....
لغايه كده عادى جدا و سيناريو مكرر لاى ماتش للزمالك منطقى ,الزمالك بجيب اجوان و يخش فيه اجوان و انا بشجع الفريق التانى كالعاده مع ان ده مكنش بيحصل قبل حسام يمكن لانى حسيت انه مستفز و يستاهل الخساره و اهو كده كده جمهور الزمالك متعود عالخساره و عادى بالنسبه له....
و فجأه ( ان ان ان "دقات القدر") لقيت الشاب اللى اطلق عليه عالفيس بعد كده "ابو بوكسر" فى الملعب و كنوع من الغباء افتكرت انه من جمهور تونس زى اللى حصل فى ماتش هناك اللى بيسموهم "مجانين الكوره" و قلت ايه ده هى البلد سايبه ازا ى يسبوا جمهور تونس ينزل كده؟ و فؤجئت بالراجل ابو جلابيه اللى عالفيس عايزين يرشحوه رئيس للجمهوريه و بيقولوا انه اخو الراجل اللى ورا عمر سليمان و اكتشفت ان الحلوين دول جمهور مصرى!! لغايه كده اوكى اتنين نزلوا الملعب و الامن هيلمهم و هنخلص الدقيقتين اللى فاضلين و الزمالك هيخرج من البطوله و خلاص...و على حين غره لاقيت الدنيا اتقلبت و الالالف فى الملعب فى مشهد خضنى و حطيت اديى على قلبى لحد يموت و تبقى مصيبه ولا حد من تونس يجرى له حاجه و يدمروا العلاقات المصريه التونسيه و عموما انا كنت حاسه ان حسام و ابراهيم هيدمروا علاقه مصر بدوله ما قبل نهايه البطوله دى...
بعد مرحله النزول ابتدى مرحله التكسير و الدغدغه و ولدت ما سميته "موقعه الجلابيه" تكسير عظام و تكسير المرمى و كسر الكاميرات و الميكروفونات و الشتيمه فى التليفزيون بس قطعوا الارسال بعد ان سمعت ما لا يسر عدو ولا حبيب وحسب ما روى احد المخرجين انهم قطعوا الارسال بسبب خلع الملابس و علامات الاصابع امام الكاميرات ...
و النبى ربنا يكرمك بلاش موال الثوره المضاده و المؤامرات من الفضاء الخارجى و حركات ابراهيم حسن العجيبه دى على طريقه ان كائنات المريخ بزيها الاخضر نزلت بسفينتها على ارض الملعب بوظت الماتش و اخدت السفينه و رجعت كوكبها ...بلاش التفسيرات الخزعبليه دى و الابداعات العبقريه ..و بلاش جو النيه المبيته و الخطط التى توضع فى الظلام و جو القله المندسه....اللى حصل ان الناس مبقتش تخاف من البوليس و بالتالى و انا اسفه عاللفظ بقى فى "فجر" بضم الفاء من المشجعين هو احنا ليه دايما محدش فينا غلطان؟؟...
النتيجه :9 مصابين!!!يعنى الدورى شكله بخ كده يعنى مفيش كوره السنه دى....انها بدايه اختفاء الاشياء التى احبها!!!
14 التعليقات:
أيه الكلا الحلو أيه ..........بجد حلو
ميرسى..
والله يا دودي انتي قلتي كل ما يجب ان يقال
انا بضحك بشدة لما بسمع ناس تتحدث وتقول ان فلول الحزب الوطني هي السبب في ذلك وانا اقول لهم ان كل مصيبة تحصل في البلد وميعرفوش يجيبوا صاحبها يبقى الثورة المضادة هي من فعلت ذلك
ودعونا نسأل هل الثورة المضادة كانت متفقة مع الزمالك تجيب جون في اخر الماتش وكانت متفقة برضه مع الحكم انه يحسبه مش جون
طبعا اللى بيقول كده حاجة من اتنين يا اهبل يا اهبل
ملهاش حل تالت ^_^
في النهاية انا بتفق معكي تماما ان احنا وللاسف الشديد بدل ما نكتسب من الثورة الجرأة في طلب الحق اكتسبنا بدلا منها البجاحة والوقاحة وللاسف الشديد
طبعا مش كلنا عشان لا أقع في خطأ التعميم
بعتذر عن الاطالة
بس بجد البوست رائع جدا وفكر في غاية الرقي
تقبلي مروري
Casper
كاسبر : و الله العظيم انا استمتعت بتحليك للموضوع ده اصل الثوره المضاده بقت الشماعه زى موضوع الماس الكهربائى و الجاموسه بتاعه القطر , كلنا حلوين مثقفين متعلمين ما بتطلعش من بقنا العيبه و كل حاجه بتجى من الفضاء الخارجى....تحياتى كاسبر
اصلا مش ابراهيم حسن و لا مش فاكرة مين من الاخوين حسن كان طالب الجمهور بالنزول إلى أرض الملعب ؟؟؟
مش طلبه هو دة ؟؟؟
و كويس ان الدوري اتلغى على فكرة .. خلي الناس تصحصح و تشوف بلدها رايحة فين .. و كله يشترك في العملية السياسية .. بدل ما هي ممكن تتاخد و تتاكل بدري بدري و نرجع تاني زي ما كانا و ربما أسوأ .
كان ابراهيم اللى قال كده بس كان يقصد واحد ولا اتنين زى اللى حصل فى تونس مش 3 الالف بنى ادم!! المشكله مش ان الدورى اتلغى ما فى 60 داهيه لكن طبعا مكنش نفسى تكون بالمنظر المنيل ده...
بجد شىء يحزن اللى حصل دة
دة ماتش كورة فين الروح الرياضية
مع خالص تحياتى
بحيكي بجد ع فكرك ربنا يزيدك يادكتورة
تحياتي لك
تامر : الاول اهلا بيك فى زيارتك الاولى لرفايع و التى اتمنى الا تكون الاخيره,,
ثانيا : فى الغضب بتضيع الروح الرياضيه و العروبه و كل حاجه و لذلك كانت نصيحه النبى الخالده "لا تغضب"
كارمن: شكرا لرقيق كلماتك يا رافعه معنوياتى
شوفت الاسم امبارح وعجبني كتير بس مقريتش المقال الا دلوقتي والله حزنت جدا امبارح بعد ما جه احد اصدقائي من هناك وحكالي اللي حصل بالتفصيل
اتمني اللي حصل ده مياثرش علي صورتنا الحلوة اللي العالم كله بيحكي عنها دلوقتي
مش عارف ان كان اللي حصل ده مدبر ولا الناس منساقة وراء حد ولا اية
بس اللي اتمناه ان محدش يتكلم عن اي حاجة غير اللي شافة بعينة بمعني اننا ننسي الثقافة السمعية لاني من رائي انها الثقافة السمعيه يعني هي التي خلقت الديكتاتور وهي التي تصنع م الحبه قبة وهي التي تضيع الامل بجد لو كل واحد يحكي اللي يشوفه بس مش اللي يسمعه هنبقي احسن شعب
عليم : الاول كويس ان العنوان عجبك احنا بنتعلم اصول الحاجات دى منك...
للاسف اللى حصل اثر و اللى حصل حصل لان باختصار ده العنوان الرئيسى عال cnn و بالتالى فالرصاصه نفذت و خلاص بقى...
انا معاك ان مش المفروض نتكلم دون وعى بس كلنا تابعنا اللى حصل و ما اظنش ان اللى كان هناك حتى عرف الاسباب ...عموما هيبان
مشهد مؤسف بصراحة
كان نفسي نلغي أي نشاط كروي لغاية مانفوق
صحيح سمعت إن الراجل أبو جلابية مش هايلعب الماتش جاي
عنده تمزق في الجيوب :D
ههههههههه....جديده حكايه التمزق فى الجيوب دى ...
عامله زى فيلم الكوره لا تزال فى سيالتى...
إرسال تعليق
حلو؟؟ وحش؟؟ طب ساكت ليه ما تقول....