ماذا لو لو خربوها ؟؟

 ماذا لو لو وانت ماشى طلع لك عو , ماذا لو لو لاقيت تاكسى طاير فى الجو؟؟ ايه اللى انا بقوله دى؟؟ انا بتكلم فى موضوع تانى بس على نفس المنوال تخيل معايا الموقف التالى : 

ماذا لو تجمهر الالف المسيحين امام الازهر ؟؟ جاؤوا بشكوى معينه او لطلب ما و انت عارف كم الطلبات و الشكوى اللى ممكن يملكوها و تستحق الاعتصام ...ماذا لو جاءوا بصلبانهم و دى جى التراتيل الكنائسيه و اقاموا قداس الاحد امام الازهر الشريف ؟؟ ماذا لو اغلقوا المرور و شلوا المنطقه المحيطه و ليحترق البشر فى نار الجحيم ؟؟ و مررت انت بالمنطقه و لو صدفه و انت مسلم فوجدت الازهر و المنطقه المحيطه  تم حصاره بالصليب و صور يسوع  و اجراس الاحد ......هنا و قبل ان تفقد اعصابك لمجرد القراءه قل لى فى 10 كلمات احساسك وقتها ؟؟؟ بل و ازيد هل يمكن هنا ان يمتد ان تغير المكروه بيدك ؟؟


و الان بعد ان استمتعتوا ببرنامج "ماذا لو لو؟" ننقل اليكم فى قناتنا الحبيبه برنامج "احداث 24 ساعه" ....باختصار اللى فات ده كان التشبيه , الخيال , الممكن اما اللى جى فده اللى حصل النهارده و  المصدر جريده  اليوم السابع و المحيط:

فرضت القوات المسلحة حصارًا أمنيًا مكثفا على الكاتدرائية المرقسية بالعباسية، وذلك تحسبا لوقوع أى اشتباكات بين المسيرة التى تضم الاف السلفيين المتجهين من مسجد الفتح إلى مسجد النور بالعباسية مرورا بالكاتدرائية، حيث قام الجيش بتكثيف تواجد الشرطة العسكرية، بالإضافة إلى عدد كبير من عساكر الأمن المركزى لتأمين الكاتدرائية التى يحتشد عشرات الآلاف من السلفيين الآن للتظاهر أمامها والمطالبة بالإفراج عن المسلمات المحتجزات بالأديرة، وعلى رأسهم كاميليا شحاتة، مرددين "الله أكبر..الله أكبر"، "مصر إسلامية".

 في سياق متصل، نظم المئات من السلفيين وقفة حاشدة أمام مجلس الدولة بتنظيم المركز الثقافي للحوار، حملوا فيها لأول مرة لافتة كبيرة تدعوا لمحاكمة  مظاهرات تطالب بالتدخل فى اختطاف كامليا شحاتة وعزل شنودة .
الذي أصبح رئيساً لما اسموه بـ "جمهورية النصارى " على حد تعبيرهم. وتم توزيع منشورات تشرح قضية كاميليا شحاتة من بداية إسلامها حتى هذه اللحظة وسط حضور إعلامي مكثف

هذا كان الخبر اما التعليق فمش هيكون كتير المره دى لانى باختصار قلته فى المره اللى فاتت بس هتكفى بكلمتى الشهيره : يالهوووووووى... انا بس كتبت مقدمه الخيال العلمى ده عشان تقدر مشاعر غيرك لما يشوف الموقف ده ...

ملحوظه: فى مقاله عيد تحرير مسجد النور اللى هو ورا الكاتدرائيه بشارع كان نفس الناس دى معتصمه من 6 ايام و رجعوا تانى بس المره دى قدام الكنيسه مش الجامع , بتفكرنى بحكايه المفجرين اللى فشلوا فى تفجير القنبله فى سيناء فرجعوا بعدها باسبوع بس الحمد لله انفجرت المره دى ...اهو ربنا كرمه و هرب فى عربيه الخضار بالليل 

اقرأ ايضا :
عيد تحرير مسجد النور !! 

ف ج ر ؟؟؟؟

واضح ان النهارده اليوم العالمى لثلاثى الحروف ف ج ر !!!! 

فَجـــــَر : بفتح الفاء بمعنى الوقت اللى الشمس بتطلع فيه ده
 

فجّـــــر : بتشديد الجيم بمعنى فخخ بالمتفجرات فهو مفجر

فُجــــــر : بضم الفاء بمعنى القوه و القدره بالظلم فهو قادر و فاجر 

اليوم فجرا فجر عدد من الملثمين محطه للغاز فى سيناء و ده طبعا من فجرهم .....انتهى الخبر


وأسفر التفجير عن هروب أهالي حي المساعيد القاطنين بالقرب من موقع الانفجار، واعتقد الأهالي أن الانفجار عبارة عن زلزال، وشاهد الأهالي ألسنة النيران تتصاعد حتى السماء، ما دفع السلطات الأمنية بالتنسيق مع محطة الغاز الرئيسية ببورسعيد لغلق المحابس حتى يتوقف ضخ الغاز للسيطرة على الحريق. " يا اختى اسم الله"


وبحسب العاملين في المحطة: "تقدر الخسائر الأولية لتفجير المحطة بعشرات الملايين من الدولارات.. ولم يتم حصر الخسائر حتى الآن وهى غالبا في الأنبوب والمحطة وكميات من الغاز". ...."يا فلووووووووسى"

وأدى تفجير محطة الغاز الرئيسية في غرب مدينة العريش إلى توقف ضخ الغاز إلى المنازل ومستودعات الغاز في العريش وكذلك الغاز الذي يمد مصانع الأسمنت في وسط سيناء بالإضافة إلى توقف العمل في محطة الكهرباء البخارية والتي تعمل بالغاز والتي تقع 15 كم غرب مدينة العريش ....."يعنى احنا مموتين نفسنا شغل ...مش فارقه" 

لعلك مخدش بالك من الخبر اصلا او سمعته و ما اهتمتش و ده بسبب بسيط هو ان دى مش اول مره لانها حصلت فى مكان مشابه الشهر اللى فات و دخل شويه ملثمين كمموا الحارس او هددوه و وصلوا المتفجرات و منفجرتش ....و على طريقه فيلم اللى بالى بالك لما كان مامور السجن بيلغهم بان اللمبى هرب "اقول لهم ايه؟؟ اقولهم فى سجين حاول يهرب الصبح فربنا كرمه و هرب بالليل؟؟" ..المره الاولانيه حصل غلط فى المتفجرات فببساطه رجعوا كمان شهر و فجروها تانى بس الحمد لله انفجرت المره دى ...


من الغباء تكرار نفس الفعل و توقع نتائج مختلفه , بمعنى هو احنا عملنا ايه اصلا عشان الناس اللى مااشتغلتش معاها القنبله اول مره مايرجعوش ؟؟ :

1 / نفس الاداء الامنى الــــــفــــاشــــل ..

2/ عدم التامين الجيد - او التامين السئ حتى- لمحطه غاز بملايين هتصلحها الدوله على حسابها من اموال دافعى الضرائب ..هو ده مش يعتبر تبديد للمال العام برضه؟؟

3/ عدم القبض على الجناه فى المره الاولى او حتى تحديد هوايتهم او اتجاهم  على الاقل يقولوا لنا دول تبع مين...مفيش مصارحه اعلاميه يعنى امال فين التليفزيون المصرى ابو من غير وزاره اعلام و لا فالحين بس بتتبع مين جاله مغص فى طره و مين بيلعب ونج شمال فى ماتش الكوره اللى بيلعبوه فى استراحه السجن  و ضغط حسنى بقى كام و نبضه كام و اتغدى ايه!! 
 

4/ نفس الوعود الجوفاء التى اما لا يمكن تنفيذها او كونها مهدئات كالعاده او فلنقل مخدرات ..خاصه ان الكلام ده بعض زياره شرف الاستاذ شرف لسيناء ب 3 ايام !! و نفس القعده بتاعه كل مره اللى مرضتش اكتب عنها يومها و قلت يا دينا بطلى تنتقديه ما كل الناس بتمدحه طب اديله فرصه يمكن ....بس ديل المسئولين لا ينعدل لو ركبوا فيه قالب فالحين بس "  لا التهميش‏..‏ لا الاضطهاد‏..‏ لا التفرقة في المعاملة " و الاهرام يكتب و التليفزيون المصرى يمدح و الناس تصفق كالعاده ....

5/ نفس نظريه حبيبك يبلع لك الزلط و عدوك يتمنى لك الغلط ...اين الاعلام الحر المستقل ابو صوت عالى فى ملثمين فشلوا فى تفجير القنبله فهربوا و رجعوا فجروا بعد شهر ؟؟!! هى الحريه و الديمقراطيه انك تستطيع انتقاد من فارق السلطه بالفعل ام من بيده القرار ؟؟


6/ اقرا الخبر ده و  لاحظ تاريخه "كلاكيت تانى مره"
http://www.masress.com/baladnews/11589
 

ملحوظه هاااامه : عشان خاطرى , و النبى , بالله عليك , لاجل عيون مصر , لخاطر مصر اما يا بهيه يا ام طرحه و جلابيه ,......محدش يقولى انها ثوره مضاده و فلول !!!!!

د/دودى

مدونه رفايع ...مجرد رفايع

الى الضوء!!

"كل الاجيال ترغب بشده و تتطلع الى شئ واحد ..الى الضوء..تريد ان تشعر بالامان و ان يغمرك الايمان بان العالم يمكن ان يتحول الى عالم افضل , اكثر عدلا...هذه الرغبه و التى هى اقدم من (ماركس) , و أحدث من (ماركس), هى بمثابه شئ يشبه المخدرات...فى بدايه الطريق كانت تغمرنا السعاده لان الضوء كان قريبا للغايه لاننا كنا متأكدون من قدرتنا على الوصول اليه ..و فى نهايه الطريق تجرعنا المراره لاننا ادركنا بوضوح  كم هو بعيدا عنا بعد ان حسبناه قريبا ...بعد التجارب ارى ان الضوء اصبح بعيدا بل ابعد عما كان فى بدايه الطريق ..و من المفترض انه من الواجب الا اشجعكم على اتخاذ هذا الطريق..لكن هناك شيئا بوسعى ان اؤكده لكم : ان الحياه بدون هذا الطريق , بدون هذه المراره , بدون هذا الالم هى حياه يرثى لها ..حياه لا تساوى..."

من فيلم the blind chance 1981

للعبقرى المبدع البولندى المخرج كيسلوفيسكي

عيد تحرير مسجد النور !!

صعقت بل و زهلت لما قريت الخبر ده !!!و لانى قريته من موقع معظم اخباره على طريقه "باريس هيلتون تعلن اسلامها و ترتدى الحجاب و تغير اسمها لطاهره " او خبر بتاريخ 15 ابريل يؤكد موت مبارك اكلينيكا فاستبعدت كونه حقيقى على الاطلاق ...بعد التمحيص و الفحص و جوله سريعه على المواقع و الجرائد اكتشفت ان الخبر حقيقى و حصل !!!!!

اما الخبر فهو كالتالى من موقع اليوم السابع :

حافظ سلامة ينهى علاقة الأوقاف بمسجد النور وأنصاره يخطبون الجمعة

الجمعة، 22 أبريل 2011 - 14:38

 

http://www.youm7.com/News.asp?NewsID=396497

وسط مشاحنات واشتباكات بالأيدى، أعلن الشيخ حافظ سلامة قائد المقاومة الشعبية بالسويس انتهاء علاقة وزارة الأوقاف بمسجد النور بالعباسية، مؤكداً أنه أصبح المسئول عن المسجد بداية من اليوم.

كانت الاشتباكات بالأيدى قد وقعت فى ساحة المسجد قبل صلاة الجمعة بين أنصار الشيخ حافظ سلامة وأنصار أحمد ترك إمام المسجد المعين من قبل وزارة الأوقاف، بسبب الخلاف بينهما حول صعود المنبر، وتدخلت قوات الجيش لفض الاشتباك فيما تولى الداعية الإخوانى حازم صلاح أبو إسماعيل إلقاء الخطبة حسما للخلاف بين سلامة وترك.

وشن أبو إسماعيل فى خطبته هجوماً عنيفاً ضد وزارة الأوقاف ووصفها بـ "الوزارة الآثمة"، واتهمها بالسعى لوقف شئون الدعوة الإسلامية، وأكد أبو إسماعيل أن عدداً من الدعاة طالبوا بتقديم مسئولين فى وزارة الأوقاف إلى المحاكمة عقب نجاح ثورة 25 يناير بتهمة التعاون مع جهاز أمن الدولة ضد الدعاة ورواد المساجد.

واتهم سلامة وزارة الأوقاف بنهب أموال المسجد، وأوضح أن لديه وقائع تثبت وجود حالات فساد فى عملية إدارة المسجد، وأعلن سلامة أن المسجد أصبح من الآن تحت إدارة جمعية الهداية الإسلامية، وقال "من الآن لن يرتقى هذا المنبر أحد إلا عن طريق جمعية الهداية الإسلامية".

و هنا ينتهى الخبر و يبدأ التعليق :

يا لهووووووووووووووووى !!! هى وصلت كده؟؟؟ هى فوضى؟

اين هيبه الدوله ؟؟؟؟ فين يا استاذ شرف الدوله لما يقرر شيخ احتلاله لمسجد و استقلاله عن الوزراه بعيدا عن المراقبه و ان دعى الى الجهاد و دخول الاديره كما سمعت من المتحمسين منهم بالفعل!!هى خلاص البلد فكت و مبقاش فيها ظابط و رابط و كالعاده الخوف المسيطر من انكم تزعلوا حد هو المتصرف؟؟....لا اعرف ما هو التصرف الصحيح المفروض على وزراه الاوقاف فعله و لكنى متاكده ان السكوت ليس الحل...

و اللى ما يعرفش مسجد النور اوضح لك ....تربطنى بمسجد النور علاقه هامه لانه موجود الحيط فالحيط بكليه الطب جامعه عين شمس فهو فى العباسيه ملاصق لمستشفيات الدمرداش و هو جامع كبير عريق فخم جدا و اعتبره دائم المشاكل لان مظاهراته ما بتخلصش و عاده بتبقى قدامه و اخرها من 4 ايام بسبب كاميليا شحاته كالعاده و دى صور من المظاهره دى و اعتذر لجوده الصوره المتدنيه نظرا لانها من تصويرى :

ربنا يستر .....

عشاق النهار

فى مصر اللى بيحبوا الليل كتييير , برضه النيل و القاهره عموما فى الليل ليها سحرها لكن بالليل تلاقى نفسك بتشوف الاماكن اكتر من الناس و بما انى من عشاق النهار حيث الوجه و الهموم و التعبيرات بحب جدا الاغنيه دى...معرفش ايه اللى فكرنى بيها يمكن اللى بحسه اليومين دول ....الاغنيه كلمات :  احمد قدري  و غناء و الحان :  مأمون المليجي عن لوحات صلاح عنانى

 في الشوارع
شيء غريب بيناديني

شيء بيفرض جوه مني
حزن عيني

شيء ياخدني يشدني
يرمي حزني ع الشوارع


اترسم كل الوشوش
تتقسم بينا المواجع
ابقى واحد منهم
جرحي هوّه جرحهم
والحقيقة متوهاني


ف الشوارع
حلم عاشق للنهار
شفته ف عيون طيبين
حلم مطحون بالمرار
يطرح غناوي المجروحين
حلم مطحون بالمرار
يطرح غناوي المحرومين
ولامته هنعيش في انتظار
وعلينا بتمر السنين


اترسم كل الوشوش
تنقسم بينا المواجع
ابقى واحد منهم
جرحي هوه جرحهم
والحقيقة متوهاني


ف الشوارع
ليه بنسأل ميت سؤال
و الطريق نمشيه و تاني نرجعه
كل حاجه فوق حدود الاحتمال
كل واحد فينا جرحه بيوجعه


اترسم كل الوشوش
تتقسم بينّا المواجع
ابقى واحد منّهم
جرحي هوه جرّحهم
والحقيقة متوّهاني

سلامات يا حوار

بعد فاصل موسيقى من الحان الف ليله و ليله ...كان يا مكان فى سالف العصر و الاوان و ما يحلى الكلام الا بذكر النبى عليه الصلاه و السلام , يحكى ان فى مصر ام العجايب و ذات المعجزات كان فى حاجه كده اسمها ( الحوار الوطنى) كان وليد يتهدهد فى مهده ....و قعدوا يشتغلونا - كالعاده- الحوار راح , الحوار جه , الحوار دح, الحوار كخ ....و فجأه ان ان ان ااااا اختفى كأن شئ لم يكن و براءه الاطفال فى عينيه....


فاكر لما التليفزيون المصرى و خاصه قناه الاخبار ذاعت الحلقه الاولى - و تقريبا الاخيره- من الحوار على الهوا بحضور شخصيات عامه و حزبيه لو مش فاكره هو كان اقرب لقعده المصطبه قدام البيت فى ليله صيفيه ....اتفقنا و اختلافنا على جوده و تنسيق الحوار و شعورنا بنقص بعض العناصر بل و قله اهميه ما يقال اصلا و لكن لم اتخيل للحظه فكره ان ما شاهدته من حوار و شوق للحوار و خطط بعيده المدى على الحوار سيكون الحوار الاول و الاخير  و خاصه مع وجود شخصيات عامه مرموقه بشرتنى بالخير....هل كل شخصيات او علنى اقول معظمها او حتى بعضها من الشرفاء و الكبار ذوى العقول ممن تمنينا ان يشاركوا فى عالمنا بعد سنوات و سنوات من التهميش و تفضيل اهل الثقه على اهل الكفاءه لا يستطيعوا افاده مصر حتى بفكره واحده؟؟




و بما ان الرب واحد و العمر واحد و انى تعبت من انى امشى جنب الحيط خاصه انى ايام امن الدوله مكنتش بخاف و دلوقتى بقيت بحسس عالكلام قبل ما بقوله  و هو ما يسبب نيران فى حلقى اكثر من تنين الصين العظيم , قررت انى اقول رأيى و خلاص...
انا شايفه ان الحوار ده اتلغى بسبب رأى و ضغط شباب التحرير على عصام شرف !!...بل ان رأيى ان عصام شرف عزل الذى احترمه يحيى الجمل من اداره الحوار الوطنى ليس لكونه نائبه كما حاول ان يقعننى بل لان شباب التحرير معترض على شخصه !! بل و ارى ان مجاهره الجمل برفضه لاى طرف من اطراف الحوار فرض شروط مسبقه او الضغط بان فلان يجى و فلان ما يجيش..فمثلا رفض شباب الائتلاف حضور حسام بدراوى و بغض النظر على موافقتك او معترضك للشخص فمبدا فرض الرأى قبل الحوار اثار الجمل ...دعونى اعترف بانى لست من محبى شرف - الله فى الله- لاحساسى دوما بقابليته للضغط و الاذعان للشباب التحرير و الضغط الجماهرى عامه  بل و تغيير اراءه بعد اعلانها و هذا ما اعتبره ضعفا ليس اكثر...


هل لمجرد عدم رضا و مباركه شباب الاتئلافات يلغى الحدث من اساسه او يؤجل لاجل غير مسمى؟؟   هل رجعنا لايام تفضيل من فى صفنا على من يملك عقل؟؟


بل و دعونى اخبط عالاخر و رزقى على الله و اطرح سؤال على طريقه الحكمه  القائله (ان سؤال واحد يستطيع ان يفتح كل ابواب الحجيم) : ما هى حدود و قدرات ائتلافات الشباب للضغط و التأثير ؟؟ و الى متى؟؟ و هل بوجوده رئيس و مجلس سينتفى هذا الدور ام سيصبح لوبى ضاغط فعال لما يريد ؟؟؟بل سؤال اقوى:  من يحكم مصر اصلا؟؟؟....تذكروا كلاماتى ان السلطه المطلقه مفسده مطلقه الى الجميع و يا فرعون اش فرعنك قال ....و لا على ايه!!!!

د/دودى

مدونه رفايع...مجرد رفايع 

short movie about love 1988

فيلم قصير عن الحب او بالانجليزى  short film about loveاو بلغه الفيلم الاصليه Krótki film o milosci  هو تانى فيلم اشوفه للمخرج البولندى كيسلوفيسكي مخرج ثلاثيه الالوان...كان اول فيلم اشوفه له short film about killing اللى كتبت عنه قبل كده لكن اعترف ان فيلم الحب عجبنى و اثر فيا اكتر اما لان موضوع القتل عموما مقبض للنفس بينما الحب (او خلينى اقول العلاقات الانسانيه افضل) اخف كتير و اقرب للقلب و الروح...

بتقييم 8.3 على موقع imdb تتوقع مشاهده فيلم قوى و الحمد لله لم يخيب ظنى...اجمل حاجه فى افلام كيسلوفيسكي خاصه القصير منها انه بيتناول الامور البديهيه كأنها غير بديهيه يعنى لما يناقش القتل بيبص له بزواياه الخاصه دون خوف من صدمه المشاهد باراء مخالفه له و لما يناقش الحب يطرحه بطريقته الخاصه من غير تردد و لا الوقوع فى فخ الرومانسيه الهوليوديه الضحله ...الحب مش الرومانسيه هو ما يناقشه كايسلوفيسكي , حب من غير هدف ولا داعى ولا اصول ثابته مش اتنين ظروفهم متشابهه و عايشين مع بعض وخلاص ....دى قصه توميك ذو ال 19 سنه فى عشقه بادواته البسيطه : المنظار , البريد , اللبن.

الفيلم ده بذات ( وعلى الرغم من انى مش بحب استخدم التشبيهات كتير) تحس انه قصيده سينمائيه , لوحه فنيه متكامله , كفايه طريقه استخدام كيسلوفيسكي للموسيقى التصويريه فهى موجوده دون ان تشعر و خاصه استخدامه للبيانو كخلفيه للاحداث بطريقه النقر و كأن حد بيتعلم يستخدم البيانو لاول مره ...

فى الحياه انا بستخدم جمله "الشيطان يكمن فى التفاصيل" لكن فى السينما "الابداع يكمن فى التفاصيل" بحب جدا المخرج اللى يحترم عقلى و يهتم بكل حاجه مش جو الفرح اللى بنعمله فى سينماتنا المصونه ...لما تشوف الفيلم مثلا - ده لو شفته- لاحظ مشهد وقوع اللبن و شوف جمال تفاصيله بعين كاميرا كيسلوفيسكي...

لا تنتظر فى هذا الفيلم الاتى :
1 : ابهار بصرى
2: سرعه و جرى وراء الاحداث
3: ديكورات ضخمه
4: مطاردات
5: سوبر مان من الرجال , او سوبر ومان فى النساء....

استمتع فى هذا الفيلم بالتالى :
1: قصه انسانيه تصلح لاى عصر
2: اهتمام بالتفاصيل و دقتها
3: جرعه شعوريه كبيره
4: فيلم اوروبى من عيار عام 1988
5: تقلب الاحداث!!!

عموما لو شدك الفيلم ...التحميل من الروابط

http://www.megaupload.com/?d=Z7DSWFZ6
http://www.megaupload.com/?d=HYRRYK4K

ORhttp://rapidshare.com/files/34687525...FLMAK.rmvb.001
http://rapidshare.com/files/34688258...FLMAK.rmvb.002

لهواه التزود....المقاله دى حلوه عن الفيلم

http://www.joetsang.net/art/love/love.html

عوده رامى الساقط معاهم!!! فى الثوره

بلاش تتخض من العنوان ..هو طبعا حاجه تضحك و يمكن تكون غريبه لكن افلام احمد عيد و بالاخص الجديد منها ماشى مع ترتيب احداث البلد قوى , لسه مش فاهمنى ؟؟؟ طب اقرا التدوينه و انت تلاحظ بنفسك ...


المرحله الاولى : رامى الاعتصامى  

فى المرحله دى بذات فى اول كام يوم تشابهه الاحداث الواقعيه مع الفيلم كان بيضحكنى انا شخصيا ...مجموعه شباب من على الفيس بوك لا ليه فى السياسه ولا اى حاجه مجمعين نفسهم و بيعملوا مظاهرات بشعارات موزونه شعريه يمكن رومانسيه احيانا فى مواجهه فطاحل السياسه و هنا اعنى نظام و معارضه  , و نفسى المبدا ده يوصل بقى الناس ما عملتش الثوره دى عشان تنصر المعارضه على النظام لان باختصار الناس نزلت الشارع لما فقدت الامل فى ان المعارضه دى قابله لفعل اى شئ و عشان كده بتغاظ لما يطلعوا يكلمونا على انهم هما النظام الجديد ..لكن any way من النقطه دى خالص , الشباب الفيسبوكى ده عمل نظاهرات بمطالب و اصرار عليها بمبدا اللزقه برضه زى الفيلم مع وجود تعنت نظامى بمراحله المعهوده الاول بالتهميش دول زوبعه فنجان و بعدين بطريقه سيبهم يجعجعوا ثم محاوله الوقعيه و انتهى الفيلم بحريقه رمزيه اتمنى الا تحدث فى النهايه الواقعيه ...فى جزء لاحق فى الفيلم بيبتدى الفقراء و العشوائيين يطالبوا بحقوقهم هما كمان وسط تقزز من الطبقه الفيسبوكيه من هؤلاء برضه وضع مشابه مع الواقع و كفايه لفظ "فئويه"  لدرجه انها بقت شتيمه شبابيه على طريقه : تصدق انت واد فئوى!!....طبعا باستثناء يوم 28 يناير و الجمل  و كميه الدم المراق و الناس اللى ماتت و المأساه دى فالاحداث متشابهه ...طبعا مع ذكر الاخوان المسلمين اللى شاركوا فى الثوره  بالاتفاق مع نفس المبادئ....




المرحله الثانيه : انا مش معاهم

 هنا احنا روحنا بعد تقريبا شهر من بدايه الاندلاع لمرحله تانيه خااااالص ..انت فى مرحله مش بس اخوان لا ده انت وصلت لسلفيه و جماعات اسلاميه و عبود الزمر و لجنه اراقه الدماء و التكفير و الهجره لو عايز...كان فيلم "انا مش معاهم" من الافلام اللى ناقشت الموضوع ده بطريقه ممتعه فى عز ما كان تابوه درامى يخاف منه الجميع ...

دى مرحله نعم للتعديلات , اطلاله مانديلا التليفزيونات الزمر او كما احب ان ادعوه هو و صاحبه بريا و سكينه العصر الحديث , عصام العريان بيطلع من محطه لمحطه  , السلفيين بيتهموا الاخوان بانهم مش متدينين كفايه! , هدم اضرحه , تهديد بافساد الموالد , غزوه الصناديق و اللى مش عاجبه كندا تفوت جمل , الجزيه , لا نريدها علمانيه ولا ليبراليه ولا اشتراكيه ولا مدنيه بل اسلاميه اسلاميه , و الله اكبر و لله الحمد...


المرحله الثالثه : عاد لينتقم "خليك فى حالك"

و المرحله دى بدئت امبارح بس ...فى فيلم "خليك فى حالك" كانت اغنيه الفيلم بتقول عاد لينتقم فيطل علينا الرئيس محمد حسنى مبارك ليدلى ببيان للشعب المصرى بان "فتشنى فتش اه يا برداعى , لا و النبى لا انت مفتشنى " و حين تسألنى هل غضبتى من ظهور الريس؟؟ اقول بمنتهى الوقاحه و الصراحه لا ...بالعكس انا سعدت لما ظهر اولا اطمنت ان صحته بخير يعنى على الاقل من صوته ... اطمنت الى حدا ما انه فى مصر .. حسيت انه هياخد و يدى معانا شويه بمعنى انى اتغظت قوى هى الانظمه العربيه مالها بتتساقط بسهوله كده ليه؟؟ زى ما يكون زين العابدين ما صدق يهرب , بينما صمد القذافى طويلا طويلا على الاقل بين انه صاحب موقف حتى لو غلط لكن مش سهل كده ...انا افضل ان يكون من يحكم مصر فاسد ذو عقل من ان يكون كان كرسى الرئاسه خاوى او يملكه رجل لا عقل!!...نفسى يثبت لنا انه ذكى مناور و ان مصر مكنتش ماشيه بالقصور الذاتى و اهى ماشيه ..يثبتلى انه عاقليه حتى لو كانت فاسده او شريره...كلام عجيب طبعا عمرك ما سمعت رأى كده لكن على الاقل مش هنحس اننا بنكلم روحنا يبقى موجود حتى لما نشتمه ....

المرحله الرابعه المحتمله : اللهى ما يكتبها علينا يا رب ....مرحله "ليله سقوط بغداد"....

د/دودى

مدونه رفايع..مجرد رفايع 

ثوره الشك!

فى يوم 7 فبراير (يعنى قبل الريس ما يسافر شرم) فى عز ما الناس ما كانت بتتبارى فى تسميه حركه 25 يناير , ايوه ايامها كانت لسه حركه و لم تكن قد اكتسبت بعد شرعيه الثوره بانضمام الجيش ليها كانت لسه well not power كان فى ناس يقولوا دى (ثوره الورد البلدى) او (ثوره اللوتس) عشان تبقى زى ثوره الياسمين بتاعه تونس و ناس تقولك دى ثوره الشباب ...انا ساعتها قلت يا جماعه انسب اسم ليها هو (ثوره الشك)....


قبل ما الريس يسافر شرم لما كان لسه فى الحكم كان فى اقتراح بانه يعقد فى الحكم و يسلم السلطه فى نهايه المده و خلال كده يعمل اصلاحات ...الكل يومها قال كلمه واحده : وانا ايه ضمنى؟؟؟ ما يمكن يجى ساعه الانتخابات و يرشح نفسه تانى و يقولك الناس متمسكه بيا؟؟ ....قلت يومها يا ناس هو احنا قاعدين عالقهوه ؟و السياسه مفهاش كده , مش معقول يقول حاجه و يرجع يعكسها يعنى ....بصراحه اتكبست يومها لما حد فاكرنى بجمله السادات الشهيره :" و بقولها من دلوقتى مش هجدد"!!...


جت المرحله التانيه و قالوا احنا عايزين ضمانات , قلت يومها يعنى يمضى لينا على وصل امانه ولا شيك على بياض؟؟ و قالوا لا عايزين الجيش يضمن والا مش لاعبين.....جه الجيش و ريح دماغه و قال انا ضامن ....و بعد التصريح ده توقعت الناس تهدى ما هو ده اللى قالوا عليه لكنى فؤجئت بالناس بتثور اكتر !..و بعدها ب 24 ساعه كانت البلد ولعت قدام القصر الرئاسى و فى الاخر الريس سابها مخضره...


مرحله رقم 3 : "الجيش مسك " هكذا لخصت الامر لبابا و هو فى الاوضه لاخبره بالنبأ ...و جاء الشك من الجميع هنا فالناس فى التحرير تحتفل و انا وحدى اتقلب بين الجمر ...الجيش؟؟ يعنى حكم عسكرى و احكام عرفيه؟؟ الجيش؟؟ يعنى زى 52 كده لما جم فى الاول و قالوا احنا قاعدين نحمى الدستور و بعدين غيروه و قاعدوا فى الحكم ابد الابدين؟؟ شك تانى هو احنا مش هنخلص بقى من القلق...و لكن جائتى بعض الطمأنينه بشعار " الشعب و الجيش ايد واحده" بتاع التحرير و لو انى فى مشكله نفسيه بينى و بين التحرير عموما لكن قلت اهو القلق يخلص و البلد ترجع تشتغل تانى....شهر عسل قصير كانت تلك الطمأنينه 


6 شهور بحالهم؟؟ رجع القلق تانى حسيتهم كتير ياااه 6 شهور من غير ريس ؟؟ هو الجيش عايز يبلط فيها ولا ايه؟؟ ....


6 شهور بس؟؟؟ نلحق نعمل فيهم ايه دول؟؟ هو الجيش متسربع ليه؟؟...


حكومه شفيق بقايا النظام,, عدل الحكومه ,,, عدلها تانى.. و تالت,,, شيل شفيق خالص...حط عصام شرف...مين عصام شرف ده اصلا؟؟... بيقولوا كان وزير نقل طب و ايه يعنى؟؟...شرف فى التحرير كويس باين عليه ثورى ..ايه ده مين اللى جنب شرف  فى التحرير ده؟؟ ده البلتاجى بتاع الاخوان؟؟ هو شرف اخوان؟؟ لا بس الاخوان مسكين فيه....الثوره اتسرقت الاخوان مسكوا كل حاجه ... الجمعه كلها اخوان بص حتى عالمنصه ..فين وائل غنيم؟؟ امريكانى لا لا تبع جوجل؟؟ بيعيط فى التليفزيون و بيرقص مع صحابه...مؤامره مؤامره ....


قول لا من اجل يسوع...قول نعم لله و رسوله ...اللى بيقول لا دول وطنيين ..اللى يقول نعم اخوان و فلول ... اللى هيقول نعم هيدخل الجنه... الحق سويرس هيرشح نفسه لا يا عم ده نفى ...التزوووير رجع تانى...مفيش تزوير و دور ...لو طلعت النتيجه نعم هنرجع التحرير.. فين الديمقراطيه اللى بيقولوا عليها...4 مليون بس؟؟...ده الاخوان دول جامدين قوى ....لا قشر البندق لا ....اه قلب البندق اه ..قلب البندق بيدق و يرق و يشق ده كان زماااان...


شك, شك , شك ...ابعدوا الدبابيس من دماغى بقى!!!


الحق الشرطه العسكريه بتحتك بالناس...يستهلوا كفايه بقى البلد تعبت...لا لا لا احنا اللى جايبن الجيش و نقدر نمشيه فى اى لحظه...مليونيه؟؟؟ لا القانون الجديد يمنع الحاجات دى.... شرف باع الشرف و قلب عالثوار..متوقعوش بينا و بينه يا اعداء الوطن...يا فلول ...


الجيش متفق مع حسنى....لا طبعا بلاش الحركات دى متوقعوش بنا و بين الجيش يا فلول... 700 الف مليار دولار فى سويسرا...كل دى فلوس يا ولاد التيت؟؟..الارقام دى مبالغ فيها...الفلوس دى هترجع ازاى...يا عم هو اللى راح بيرجع ...مؤامره مؤامره

السلفيه , الاخوان, الجماعات الاسلاميه . الاقباط , التكفير و الهجره........شك شك شك شيلوا الدبابيس

س/ اخبار الشغل ايه؟؟؟؟؟

ملحوظه: المقاله دى جائت بعد رعبى و خوفى من مقالات اشبه بدى
http://cinemascopemagazine.blogspot.com/2011/04/blog-post.html

a short film about killing 1988

"الحياه هبه من خالقها...فهل لبشر حق انتزاعها؟؟" اشكاليه جدليه فلسفيه من مئات السنين لم يحسمها احد سواء فى مصر او العرب او العالم ...هل يمكن ان يكون الفعل "ق ت ل" مقبول لاى سبب؟؟ هل القصاص يجعله فعل محمود بينما القتل الفردى هو الجريمه...



"منذ هابيل لم تكن عقوبه الاعدام رادعه للبشر ليمتنعوا عن القتل" هذه هى الذريعه التى يقدمها لنا المبدع البولندى المخرج  كيسلوفيسكي فى فيلمه "فيلم قصير عن القتل" short movie about killing صاحب التقييم 8.2 على ال imdb و المنتج عام 1988 اللى شوفته و تأثرت ببساطته و عمقه المطلق...



هل يختلف قتل الاطفال لقطه فى الشارع كنوع من اللهو...عن اغراقهم لفأر فى المجارى ...عن قتل سائق تاكسى بعد سرقته بلا سبب...عن شنق قاتل سائق التاكسى كعقاب...اليس فى كل الحالات هناك روح تزهق و قاتل يستمتع بقتله و روح تصعد لباريها بيدى روح اخرى؟؟...هل بتغيير السبب يختلف الفعل؟؟ قبل ان تعارضنى بمبدأ القصاص و ان من قتل يقتل او مبدأ العين بالعين دعنى اولا اوضح نقطتين اما الاولى فاننا هنا نتكلم من منطلق فلسفى بحت كاشكاليه جدليه فهو كمبدأ ال brain stroming حين نفكر بلا حدود او قيود مسبقه و اما النقطه الثانيه فهى رغبتك لحدوث مفاجأه او عائق ما يمنع تطبيق حكم الاعدام فى نهايه الفيلم بل انه حزنك على تطبيق العداله فى نهايه الفيلم و جرح احساسك عن رؤيتك لمقتل القاتل....



short film about killing فيلم قوته فى بساطه و انسيابه فيوضح لصانع الافلام نصائح بسيطه : لا تجعل فيلمك مثير فالحياه ليست مثيره , لا تجعل فيلمك مبهر فالحياه ليست مبهره , ما فائده هل هذا الكم من الاكشن فكم موقف اكشن رأيته فى حياتك؟, اذا اردت صنع فيلم فانقل الحياه و لا تصنع عالم موازى حيث النساء افروديت و الرجال سوبر مان , الشخصيات ليست باللونين الابيض و الاسود قط فالقاتل يحن من الحين و الاخر و القتيل يكره الاطفال و القطط و الكلاب و المحامى بين ذاك و تلك , لا يجب ان تمتلك كل الامكانيات لتصنع فيلم مميز فقط عقل مخرج و قلب مؤلف و ممثلين ادوات لا اكثر ولا اقل, يمكن ان يكون فيلمك انتاج 1988 و يزال يكتب فى تفاصيله...



يقدم لك  كيسلوفيسكي وجبه سينمائيه دسمه فلا انت بحاجه الى موسيقى تصويريه ولا الى خدع سينمائيه بل مؤثرات صوتيه فحين تشاهد  قاتل يمارس قتله فى حياتك جل ما ستسمعه هو صوت ارتطام الحجر على رأس القتيل و صراخه هنا لن تستمع الى موسيقى تشيكوسفيكى ولا موزرت ولا اى ملحن اخر ...فاذا كان هذا هو الواقع فلما الفذلكه و التلفيق ...



اذا كنت من ضعاف القلوب فاما الا تشاهد هذا الفيلم -وان كنت ستخسر - او لتتحلى ببعض الشجاعه..



لتحميل الفيلم :










http://www.megaupload.com/?d=UQRUASQC
http://www.megaupload.com/?d=BVQZ25YH



OR



http://rapidshare.com/files/346912840/A.Short.Film.About.Killing.1988.AFLMAK.rmvb.001
http://rapidshare.com/files/346931031/A.Short.Film.About.Killing.1988.AFLMAK.rmvb.002

النسخه الافضل منك Limitless 2011

ملحوظه : هذه المقاله لا تفسد مشاهدتك للفيلم و هى مخصصه لمن لم يشاهد الفيلم ...بل ستحفزك لمشاهدته

 NO Spoilers  

Limitless (2011)

    

 "What if a pill could make you rich and powerful?" ماذا لو استطاعت حبه دواء ان تجعلك غنى و قوى؟؟ هو ده سلوجان و شعار فيلم limitless او بالعربى "بلا حدود" , الفيلم لسه جديد و فى السينمات و لكن شكرا للتكنولوجيا الحديثه اللى تخليك تتفرج على الافلام و هى فى السينما و انت فى بيتك تحت اللحاف مع فشار البيت السخن..

"How many of us ever know what it is to become the perfect version of ourselves?" تفتكر النسخه المثاليه منك هيكون شكلها ايه؟؟ ماذا ستكون شخصيتك عندما تكون اذكى و اقوى و لاماح سريع البديهه؟؟ عندما تمتلك 100% من عقلك بينما ان فى وضعك الحالى لا يمكنك الوصول الا ل 20% منه؟؟ عندما تتضاعف مساحه ذهنك 5 اضعاف بتناولك لقرص يوميا؟؟

ايدى مورا الكاتب المبتدئ هو بطل الفيلم , يبدأ المشهد الاول بايدى على سطح مبنى 20 دور على واقف على طرف السور مقرر الانتحار و هنا يرجع فلاش باك لاولى القصه لتتعرف ماذا اوصله لهذا؟؟؟ ...ترجع للبدايه فايدى مؤلف مبتدئ عنده عقد انه يكتب روايته الاولى لكن نقص الالهام كان له بالمرصاد مع تذبذب حياته الشخصيه يجد الحل مع صديق قديم فى حبايه تغير من كيمياء المخ بحيث يمكنك الوصول لمخك بالكامل...تتوالى الاحداث المثيره و يبدء صاحبنا فى التعاطى و يتسع مخه ليكون سوبر مان العصر الحديث  ليكمل كتابه فى 4 ايام ليبهر الجميع ...لكن الحياه ليست بهذه السهوله و لكل شئ اثار جانبيه  هل يكمل ؟ هل يتوقف؟ من هؤلاء الذين يطاردوه؟ كيف يحصل على الاقراص؟ ماذا لو اوقفها ؟ هل يمكن ان يموت بسببها؟؟ هل يكشف السر؟ هل ينكشف السر؟ كيف تستطيع استغلال مخك؟ باى طريقه تحول الذكاء الى اموال؟هل يكمل فى الكتابه ام يستطيع ان يستخدم عقله فى اتجاه مربح اكثر؟ كيف وصل به الامر الى حد رغبه الانتحار فى المشهد الاول؟ هل ينتحر فعلا؟؟ هى دى احداث الفيلم المثير المسلى limitless...

روبرت دى نيرو فى الفيلم و انا كنت فاهمه غلط انه البطل و لكن دى نيرو ليس بالبطل ولا ضيف الشرف فهو دور متوسط الحجم عالى المقام و بيفكرنى بظهور مايكل دوجلاس فى wallstreet باجزائه الاول و الثانى..

بصراحه برضه النهايه معجبتنيش حستها مقحمه على الاحداث....عموما فيلم limitless فيلم مسلى و مثير

لتحميل فيلم limitless 2011 مترجم

بحجم 454 ميجا

اقرأ ايضا:

مايكل دوجلاس وول ستريت

http://www.jheberg.com/download-590FD647C7C7-aflmakl2011ts.html


http://www.duckload.com/dl/yAHQ2


http://amonshare.com/lspseymqnt3u/AFLMAK.L.2011.TS.rmvb.html


http://www.keepfile.com/15kj7o90w7ih/AFLMAK.L.2011.TS.rmvb


http://loadfiles.in/d8kadf6s0k84/AFLMAK.L.2011.TS.rmvb


http://www.fileserver.cc/5r4jvj2krwyc.html


http://loombo.com/kc3v00vn9bnj


http://uploadfa.com/qel0krxeaq1h


http://cramit.in/sx9udigvtd1k


او

بحجم 272 ميجا بجوده اقل من النسخه السابقه

Hotfilehttp://takemyfile.com/1121866

DuckLoad
http://takemyfile.com/1121853

FileCrown
http://takemyfile.com/1121854

FileKeen
http://takemyfile.com/1121855

IFilez
http://takemyfile.com/1121857

FileServe
http://takemyfile.com/1121871

Uploaded
http://takemyfile.com/1121862

NetLoad
http://takemyfile.com/1121859

Turbobit
http://takemyfile.com/1121861

RapidShare
http://takemyfile.com/1121860

MegaUpload
http://takemyfile.com/1121873

JumboFiles
http://takemyfile.com/1121858

SendSpace
http://takemyfile.com/1121872

MegaShare
http://takemyfile.com/1121864

IFile
http://takemyfile.com/1121856

GettyFile
http://takemyfile.com/1121863

DepositFiles
http://takemyfile.com/1121870

ZShare
http://takemyfile.com/1121865

30 يوم فى الشرف

هابى بارز داى تو يو ...شهر حلو يا شرف!!


النهارده 4 ابريل يمر شهر على توليه عصام شرف الوزراه اللى مسك يوم 3 مارس 2011 و بما ان كل مده التولى هتبقى 6 شهور اذا الحساب مش هيبقى بطريقه اول 100 يوم على الطريقه الامريكيه حيث الحساب فى اليوم المئه على ما حققه المسئول و كفايه قوى شهر لاننا نحقق و ندقق و نركز...دعنا الاول نتفق ان الشرف ده كان طبيعى و مطلوب فى اى مسئول و بالتالى فشرف الاستاذ شرف ليس محل اعجاب اكتر منه المفروض انه الطبيعى -بس احنا اللى كنا نسينا- و بالتالى نحن نقيم الاداء و الاداره و ليس الشرف و الامانه:


أ- سلبيات :

 1/ اداره مصر كمحل البقاله...حيث التعامل يوم بيوم على طريقه افتح الدكان و يا فتاح يا عليم يا رزاق يا كريم عندنا ايه النهارده؟؟ من غير لا رؤيه مستقبليه و لا خطه عمل...


2/ حكومه تلهث...حكومه شرف هى حكومه رد فعل لا افعال حيث انها فضلت تجرى ورا الاحداث بعد حدوثها , المسيحين زعلانين راضوا المسحيين , الدكاتره متضايقين ادوهم فلوس, وزراه الاثار زعلانين من الاندماج افصلوهم , و بالتالى يحصل على حقه فقط من يعلو صوته و من يصمت يداس بالاقدام فلا تتعجب عندما يعلو صوت الاخريين..


3/ انا لا انا عباس فيها مسئوليه...على طريقه مسرحيه فايز حلاوه لما كان فى شخصيه عباس اللى مابيخدش اى قرار لانه فى مسئوليه و مع المسئوليه تأتى العقاب و الخوف و بنفس المنوال لا وزير يستطيع اتخاذ اى قرار جاد لا تخصيص ارض ولا بيعها لخوفهم من المحاسبه و من الناس وان كان ظلما و بهتانا..


4/ كجزء من نتيجه النقطه ال3 مفيش حركه فى البلد لا بناء ولا انشاء مصانع ولا نيله فالخوف من المسئولين يرعب المستثمر اللى يشبه بالطير على رأس الواقف يطير مع اى حركه مهما صغرت..


5/ تكنوقراط...انا كنت و مازالت من اعداء فكره التكنوقراط نظرا لانهم مجموعه من الموظفين عديمى الابتكار و الروتين هو دستورهم فلا ابداع ولا خطوات واثبه و بالتالى فهى حكومه شربه الخضار التى بلا طعم ولا يعبر اكثر من ذلك من وزير الثقافه اللى بيحسسنى دايما انه موظف فاين هذا من احلامى مع تولى ابن الصاوى للوزره حين يكون كل قصر ثقافه ساقيه صاوى..


ب- ايجابيات:

1/ الغاء امن الدوله (و ربنا يستر من موضوع الامن الوطنى)


2/رجوع الامن للشارع (و ان كان جزئيا و على خجل و موضوع ماتش الزمالك هبب الدنيا)


3/ عوده المصريين من ليبيا باعدادهم الضخمه و ما يكلف ذلك من عناء.


4/ استطاعه تنظيم الاستفتاء بجداره.


ج- سلبيات؟؟ ولا اجابيات؟؟ ولا ما اعرف

 1/ قانون تجريم الاعتصام؟؟
* مع : كفايه بقى اللى البلد فيه ده هو احنا هنفضل فى الشارع كده؟؟ وقف الحال ده فى مصلحه مين؟؟ يعنى يرضيك وقف المرور و حرق المنشأت و القرف ده؟؟

* ضد : انتقد الفنان خالد الصاوي سياسة الدكتور عصام شرف رئيس الوزراء الحالي واصفاً إياها باﻻنتحار السياسي وذلك علي خلفية القرار الذي اصدرة مجلس الوزراء أمس اﻻربعاء 23 مارس 2011 بتجريم الاعتصام والتجمهر والتحريض, وحق التظاهر السلمي حيث كتب خالد الصاوي علي صفحته علي موقع الفيس بوك "حق الانسان المعاصر في الاحتجاج السلمي بكل طرقه مش حيسقط بقانون متفصل ولا باعلام خبيث ولا حتى بغطرسة السلاح.. اللي حيسقط لو فكر يمس الحق ده هو عصام شرف اللي كان محتج معانا ولما مسك الوزارة راح حلف قدام الجماهير وبعدها على طول اتفضت الاحتجاجات بالعنف والتعذيب، وحراسه اعتدوا على الناس يوم الاستفتاء عشان يوسعوله، ودلوقتي بيهندس في تجريم الاحتجاجات أصلا.. انتحار سياسي ده يا دكتور" .

وابدي الصاوي انزعاجه الشديد من إنتهاك الجيش للحرم الجامعي وتدخله لفض اﻻعتصام السلمي للطلبة بالعنف الشديد حيث قال "من غير تزويق ولا مراوغة: انتهاك الجيش للحرم الجامعي لفض احتجاج سلمي للطلاب بالعنف هو جريمة جديدة ضد حريات وكرامة الإنسان المصري اللي بيحلم يرفع راسه بعد طول ذل، ده اللي حيقوله التاريخ بوضوح مهما اتقال من تبريرات، ومهما أبدينا من تواطؤ بالصمت" .
وأضاف الصاوي "الثورة مستمرة لحد ما تحقق أهدافها.. بأي ثمن.. ومهما طال الوقت.. وفوق كل المعوقات"

2/ تحقيق كل المطالب على طريقه now means now :

مع : لازم نهدى الناس , هو احنا هنفضل لاغيين الشعب , الثوره ملك الشعب و محدش بياخد حاجه اكتر من حقه , صبروا كتير و ده من حقهم.

ضد: ما هو كل ما بيحقق حاجه يطلع غيرهم امال فين هيبه الدوله ؟ , ده وقته؟ , فين الحزم و السيطره؟...

3/ الحوار الوطنى؟؟

مع : يااااه احنا كنا محتاجينه من زمان

ضد: نعم؟؟ امال فين التحرير؟؟

س و ج :

س: هل تعتقدى ان الفريق احمد شفيق كان الامور ستكون افضل؟
ج: اجاوب رغم اعجابى بشفيق الا ان كان هيضاف فوق البلاوى دى كلها اختلافنا على شخصه و بالتالى مكنتش هتفرق كتير....




كم من عشره تحب تديها؟؟؟

موقعه الجلابيه!!

على غرار "موقعه الجمل" كان فى مصر النهارده "موقعه الجلابيه" ...كاى اهلاويه كنت بتفرج على ماتش الزمالك النهارده بروح منقسمه فاما الخارجى فبشجع الزمالك بما انه بيلاعب فرقه بره مصر و انه بيلعب باسم البلد و بالتالى تشجيعه واجب قومى زيه زى المنتخب و ضيف على كده كون امى زملكاويه اصيله و زعيمه الزمالكويه فى المنطقه و العائله و بما انى جبانه عندما يصل الامر لامى فكنت بشجع من تحت الضرس, و اما الداخلى فطبعا كنت بتمنى لهم الخساره (روح الشر جوايا بنتصر فى الاحوال دى) على طريقه بطاطس زيت العربى مقرمش من بره و طرى و لذيذ من جوه و كل ما يجيب الزمالك جون ابتسم و قلبى بتقطع و كم رقصت فرحا لما دخل فيهم الجون و لكن دون تحريك عضله واحده باستثاء عضلات العبوس على الوجه...و فضلت اعد الثوانى و الدقائق عشان الزمالك يخسر و يطلع من البطوله كنوع من الشماته (نياهااااا ضحكات متقطعه شريره) لغايه ما جاب الزمالك الجون الثالث و هنا انتصرت فيها روح الاهلى و ابديت الحزن و الغضب و انكشفت للاسف و لو انى تقريبا كنت مكشوفه و محدش صدق الوطنيه اللى نزلت عليا دى و هنا اتلغى الجون و تحررت من الكبت و ابديت السعاده و المرح و الحبور و اللى يحصل يحصل بقى هى خناقه ولا اكتر....

لغايه كده عادى جدا و سيناريو مكرر لاى ماتش للزمالك منطقى ,الزمالك بجيب اجوان و يخش فيه اجوان و انا بشجع الفريق التانى كالعاده مع ان ده مكنش بيحصل قبل حسام يمكن لانى حسيت انه مستفز و يستاهل الخساره و اهو كده كده جمهور الزمالك متعود عالخساره و عادى بالنسبه له....

و فجأه ( ان ان ان "دقات القدر") لقيت الشاب  اللى اطلق عليه عالفيس بعد كده "ابو بوكسر" فى الملعب و كنوع من الغباء افتكرت انه من جمهور تونس زى اللى حصل فى ماتش هناك اللى بيسموهم "مجانين الكوره" و قلت ايه ده هى البلد سايبه ازا ى يسبوا جمهور تونس ينزل كده؟ و فؤجئت بالراجل ابو جلابيه اللى عالفيس عايزين يرشحوه رئيس للجمهوريه و بيقولوا انه اخو الراجل اللى ورا عمر سليمان و  اكتشفت ان الحلوين دول جمهور مصرى!! لغايه كده اوكى اتنين نزلوا الملعب و الامن هيلمهم و هنخلص الدقيقتين اللى فاضلين و الزمالك هيخرج من البطوله و خلاص...و على حين غره لاقيت الدنيا اتقلبت  و الالالف فى الملعب فى مشهد خضنى و حطيت اديى على قلبى لحد يموت و تبقى مصيبه ولا حد من تونس يجرى له حاجه و يدمروا العلاقات المصريه التونسيه و عموما انا كنت حاسه ان حسام و ابراهيم هيدمروا علاقه مصر بدوله ما قبل نهايه البطوله دى...

بعد مرحله النزول ابتدى مرحله التكسير و الدغدغه و ولدت ما سميته "موقعه الجلابيه" تكسير عظام و تكسير المرمى و كسر الكاميرات و الميكروفونات و الشتيمه فى التليفزيون بس قطعوا الارسال بعد ان سمعت ما لا يسر عدو ولا حبيب  وحسب ما روى احد المخرجين انهم قطعوا الارسال بسبب خلع الملابس و علامات الاصابع امام الكاميرات ...

و النبى ربنا يكرمك بلاش موال الثوره المضاده و المؤامرات من الفضاء الخارجى و حركات ابراهيم حسن العجيبه دى على طريقه ان كائنات المريخ بزيها الاخضر نزلت بسفينتها على ارض الملعب بوظت الماتش و اخدت السفينه و رجعت كوكبها ...بلاش التفسيرات الخزعبليه دى و الابداعات العبقريه ..و بلاش جو النيه المبيته و الخطط التى توضع فى الظلام و جو القله المندسه....اللى حصل ان الناس مبقتش تخاف من البوليس و بالتالى و انا اسفه عاللفظ بقى فى "فجر" بضم الفاء من المشجعين هو احنا ليه دايما محدش فينا غلطان؟؟...

النتيجه :9 مصابين!!!يعنى الدورى شكله بخ كده يعنى مفيش كوره السنه دى....انها بدايه اختفاء الاشياء التى احبها!!!

Amelie 2001

Amélie (2001)

"تحتاج احيانا لمن يعبث بحياتك ليغيرها للابد" هى دى الحكمه المستنتجه من الفيلم الممتع الفرنسى ايميلى او بالاسم الكامل Le Fabuleux Destin d'Amélie Poulain و معناه بالانجليزى The Fabulous Destiny of Amélie Poulain".  ...طبعا انا عارفه ان فيلم ايميلى انتاج 2001 يعنى من 10 سنين كامله و مش جديد ( ياااه هو سنه 2001 بقالها 10 سنين بحالها هى الايام بتجرى كده ليه) لكنى شفته امبارح و بالتالى اقدر اقول انه جديد بالنسبه ليا على الاقل...هتقولى طب ما انتى بتتفرجى على افلام كتير مش معنى يعنى الفيلم القديم ده اللى استفزك انك تكتبى عنه؟؟ هتعرف الاجابه لما تكتشف مدى اعجابى بالفيلم ده...

ايميلى بنوته صغيره لام و اب تقليدين يمكن زياده عن اللزوم , بنوته وحيده لمرض مزمع (حلوه مزمع دى عموما لما تتفرج هتفهم الموقف) , ايميلى بتتعلم فى البيت من غير صحاب من غير لعب حقيقى , لعبه ايميلى حياه الناس بتعدلها اما بالعقاب و اما بتصليح الاتجاه و اما بالمكافأه و كتير من الحيل و الخدع , كل اللى قلته دى اتقدم فى اول 4 دقائق فى الفيلم بطريقه ممتعه جميله خفيفه مميزه عن اى حاجه يمكن شفتها...

تخيل لو كل انسان ليه ملف بحيث يعرف من خلال سطور من خلال ما يحب و مايكره (تخيل شكل ملفك يبقى ايه؟؟) اهو الفيلم بيقدم كل شخصيه تظهر من لاول مره بالطريقه دى بنظام كاركتيرى ممتع للمشاهد , حاجات صغيره بتكون شخصيتك يمكن تحسها حتى تافهه لكنها فى الاول و الاخر اجزاء البزل اللى بتكونك اهى هى دى الرفايع فعلا...بالمناسبه كده فاكر كان فى فيلم مصرى اسمه (حد سامع حاجه؟) بتاع رامز جلال هو طبعا فكرته العامه already مسروقه من احد الافلام الامريكيه Stranger than Fiction 2006 لكن لو تفتكر كان المؤلف بيجيب فى اول ظهور كل شخصيه تقديمه قصيره عنه دى بقى مسروقه من اميلى 2001 , حاجه تغيظ سرقه كده عالمكشوف..

الفيلم ده فى راوى يتميز بصوته المريح و حضوره القوى يصل لمرحله تشوقك لسماع صوته , فاكر فيلم (مواطن و مخبر و حرامى) ؟؟ بس على احسن شويتين و مش طول الوقت كده...بيظهر فى الاول بكثافه شويه و بيقل فى المنتصف و يزيد فى الاخر...

جو الفيلم العام طفولى ممتع و كأنك فى قصه خرافيه , على الرغم من انتاج الفيلم 2001 و ان احداثه بتدور 1995 لكن جو الفيلم يحسسك بجو الستينات و يمكن خمسينات حيث الفستاين الانيقه و الالوان المبهجه...لوحظ على هذا الفيلم ان من كتر رغبه المخرج فى تكوين جو لفرنسا المثاليه شال من محيط الكاميرا اى سود او عرب صحيح الموضوع ده تم اخذه بشكل سلبى لكن بصراحه ده خلى الفيلم منسجم اكتر و سلس جدا...

معجبه بالفيلم؟؟ قطعا , من الاخر مينفعش تكون متفرجتش عليه....معظم الروابط اللى عالنت بايظه بس اللينكات دى متجربه

http://www.megaupload.com/?d=K4GO28LF

او

http://multimirrors.com/dwn.php?id=bc687b4df179bc947d70f11edf73b576

ملحوظه : بعض مشاهد الفيلم بتكون خارجه احيانا صحيح هى متناسقه دراميا و مش مقحمه بس لو معاك اطفال او انت محافظ ابقى قدمها...

Audrey Tautou بطله ايميلى ذات الابتسامه الساحره هى هى بطله "شفره دفينشى" ....

د/دودى

مدونه رفايع..مجرد رفايع