الأربعاء، 16 نوفمبر 2011

الهلال و الجمل و المانجا ..




هتضحك عليا ان قلت لك انى اشتقت لرموز الهلال و الجمل ....من غير تريقه او ضحك فعلا انا مشتاقه و بترحم على ايام الهلال و الجمل عارف ليه؟...لان ببساطه مجرد وضع رمز الهلال او الجمل على يافطه المرشح يعلم المرشح نفسه و المنتخب و المرشحين الاخريين و حتى القاضى اللى واقف عالصندوق كون هذا المرشح فاسد و حرامى غالبا و فائز بالتاكيد سواء اخد اصوات ام لا .....




اما الان فالرموز لا تعنى اى شئ ببساطه فالكل فاسد محتمل او ثورى محتمل او عبيط غالبا ....فمثلا مرشح رمز المانجا يعنى ايه؟؟ هل مثلا يعنى انه فاكهانى او انه مرشح هيرطب على قلبك فى الصيف؟!!؟..و هل المرشح رمز المانجا سيتعاون مع المرشح رمز الجوافه ام لا و يكونوا كوكتيل تمام بالاستعانه بالمرشح رمز الخلاط اللى نازل عمال .....هل معنى المرشح رمز العربيه احسن من مرشح رمز العجله كونه اغلى و اسرع ولا انصار البيئه هيرشحوا العجله لانها لا تلوث البيئه و موفره للطاقه ؟؟!!


طبعا انت فاكرنى بهزر ...فى الدائره اللى جنبنا فى فعلا مرشح المانجا و الجوافه و الخلاط و العجله و العربيه و اشياء اخرى اقل ما توصف بيه بانها مسخره .....




8 التعليقات:

ابراهيم رزق يقول...

الو يا مانجا الو

طالما توجد امية

سوف توجد هذه الرموز

و سلميلى على الجمل

تحياتى

د/دودى يقول...

انا بس عندى احساس ان حفظ كل هذا الكم من الرموز عايز دكتوراه مش اميه ...اضحكك عارف ان السلفيين فى دائرتنا واخدين رمز السكينه ..

قلم جاف يقول...

الشيء المخيف فعلاً هو أن الغباء السياسي للتيارات الدينية والمال السياسي قد يدفع الناس للتصويت للفلول على سبيل التصويت الاحتجاجي..

د/دودى يقول...

زى ما زمان الناس انتخبتهم كيدا فى الوطنى فقد ياتى اليوم و ينقلب الحال...قال المتنبى و كم فى مصر من مضحكات لكنه ضحك كالبكاء

Radwa Ashraf يقول...

عادى .. انا شفت واحدة واخدة مز الصاروخ و التانية رمز ابريق الشاى و واحد ظريف خالص واخد رمز الدبدوب

ده غباء سياسى و المفروض الناس دى تتعاقب عليه !
مش ترشح نفسها !!

Kem يقول...

بصى هو مبدئيا الرموز مش لازم يبقى ليها معنى ، ولكن الطبيعى انها ترمز لشئ . بس برضو مش بالضرورة ان اللى يكون اختار رمز المانجة كان بيفكر فحاجة معينة :)))
بس الغريب هو ان مفيش حد اختار مثلا الفاس , او اى حاجة تدل على تراث مصر الزراعى مع انه فالاساس اللى بيحتاجوا الرموز عشان يصوتوا عادة بيبقوا فالقرى و النجوع و اسهلهم بكتير انهم يلاقوا حاجة يعرفوها و بتدل عنهم بدل ما يقعدوا يشبهوا ع بندقية الصيد و على رمز الفواجرا بالشامبينيون :))

عبد الرحمن سالم يقول...

رمز المانجة أكيد أحسن من (المودام/الآنسة) اللي كانت عاملة لنفسها رمز (الصاروخ).

صاروخ ؟!

رموز مسخرة فعلًا :D

غير معرف يقول...

ماتعتبريش كلامي فيه عنصرية دينية ضد المرشح.......... هههههههه.... بصراحة رمز المانجا أكتر رمز يليق عليه :)

إرسال تعليق

حلو؟؟ وحش؟؟ طب ساكت ليه ما تقول....