الاثنين، 28 نوفمبر، 2011

روح نقصهم صوت :)





النهارده 28 نوفمبر اليوم اللى تلت مصر نزلت تنتخب فى المرحله الاولى ....و بما انى شبراويه خيماويه اصيله اى من شبرا الخيمه التى تصر الهيئات السياسيه على انها جزء لا يتجزأ من القليوبيه -مع ان العبور برضه تبع القليوبيه و متسألنيش ازاى- فبالتالى كنت انا و محافظتى كلها جزء من المرحله الثالثه البعيده جدا فى شهر يناير المعظم.....


حاجه تغيظ لما مصر كلها -او عالاقل معظم صحابى- ينزلوا انتخابات و انا لا ....خاصه انى متحمسه للنزول مع انها مش اول مره ليا فى الانتخابات زى معظم المصريين و هى المره التانيه اللى اكتب فيها عن الانتخابات فى رفايع ...


عيل صغير عمل صوبعه كده مسدس
http://suchasmallaffairs.blogspot.com/2010/11/blog-post_2458.html




عموما انا هاوجه كلامى لكل المنتخبين لكل المراحل و ان كان معنى بها اكتر اصحاب دوائر المرحله الاولى و الثانيه...انزل انتخب و خلاص حتى لو حاسس ان صوتك ملوش لزمه لكن اعمل اللى عليك و خلاص...انزل مش عشان خايف من الغرامه 500 جنيه اللى غالبا مش هتدفعها لكن انزل عشان تراقب و تتفرج و تشارك و نسيب الباقى على ربنا و حسبى الله و نعم الوكيل ...انزل نقص الطرف اللى مش عايزه يكسب صوت اى كان رأيك....


كان هذا هو الكلام اللطيف المنمق الحيادى تماما....و بما انى فى مدونه شخصيه مش فى جريده حكوميه فمن حقى ان اكون غير حياديه و متحيزه كما اشاء و بالتالى دعنى اتحدث بصراحه او وقاحه اذا شئت....


انا عارفه ان الاخوان هيكسبوا و ربنا يستر على البلد و لكن انا عن نفسى هانزل انقصهم صوت ...مش مهم يكسبوا او يخسروا المعركه الانتخابيه لكنهم بالتاكيد لن يكسبوا معركه صوتى .....

12 التعليقات:

ابراهيم رزق يقول...

الله يفتح عليكى يا معلم دودى

بيتغوا ان الناس مش عارفة حاجة فبيرضوا ضميرهم بالدين

دين ايه و لاد .......... اللى ايديهم لسه ملوثة بدم الشباب الشهداء كأنهم لا يسمعوا لا يروا لا يتكلموا

تحياتى

Bent Men ElZman Da !! يقول...

انا فعلا استغربت جدا ان القليوبيه مش فى المرحله الاولى !!
الكل متوقع ان الاخوان هيكتسحوا
اهو مره ياخدوا فرصتهم

د/دودى يقول...

ابراهيم رزق : الناس كده كده مش فاهمين حاجه قوى فبيقولوا ان صوت الانتخابات صدقه جاريه و اهو كله ماشى ...و الاخوان كانوا عارفيين كويس ان كل تاخير كان ضد مصلحتهم عشان كده مهمهمش اى دم

د/دودى يقول...

Bent Men ElZman : تقريبا لقوا القليبويه كبيره مع القاهره و الاسكندريه فحبوا يأجلوها بس حاسه ان الفرق بين المراحل كبير بزياده...

انا متوقعه ان الاخوان هيكسبوا لكنى لا اتمنى هذا بمنتهى الصدق و انتوا عارفيين مواقفى من زمان..اذا كانوا هما مضغوطين زمان فكلنا كنا كده مش معنى هما ياخدوا فرصتهم و احنا لا...

هبة فاروق يقول...

هههههههههههههههه
عارفه يادودد انا اؤيد ما فعلتيه
لانى مثلك استبعدت الاخوان واخترت حزب الوفد
تحياتى

AHMED SAMIR يقول...

انا خايف على مصر من المتأسللمين سياسيا
بس دي اختيارات الشعب و لابد ان نتحمل اختياره

ع.سالم يقول...

"انا عارفه ان الاخوان هيكسبوا و ربنا يستر على البلد" ..

الجملة دي أكتر جملة بقولها الأيام دي !

Sara يقول...

هو دا الشر الحقيقي :D
ههههههههههههههههه

لا بجد معاكي حق يا دندن :)

انزل نقصهم صوت و انتخب اللي على مزاجك :)

و كـُنّ مع الثورة ;)

د/دودى يقول...

هبة فاروق : انا كمان بوازن بين الوفد و الكتله بما ان تكتل الثوره ملوش تمثيل مشرف عندنا ...

د/دودى يقول...

AHMED SAMIr : معاك فى خوفك و معاك ان اذا اختارهم الشعب فالشعب حر لكن انا هاعمل اللى عليا و ان كسبوا ساكون فى صف المعارضه اؤدى واجبى كمصريه خايفه على بلدها

د/دودى يقول...

ع.سالم / نفسى ربنا يخيب ظنى او يستجيب للدعاء...

د/دودى يقول...

sara : انا شريره انا عارفه...نفسى ابقى مع الثوره لكن للاسف الشديد الشباب مقدرش يعبر عن نفسه خالص المره دى ...

إرسال تعليق

حلو؟؟ وحش؟؟ طب ساكت ليه ما تقول....