الاثنين، 23 يناير 2012

شغل الثوره ده مش عندنا !!







و قالت رافعه حاجبها و بنظره النصف عين : "شغل الثوره ده مش عندنا ...انتوا تقدروا تغيروا النظام لكن انا مليش دعوه"........


stop......لمعرفه من المتحدث و فى اى مناسبه قيلت تلك العباره نرجع الشريط لورا من بدايه الحديث و احكم انت....زى ما عملت فى دينا انتى مش معتزه باسلامك ......


المكان : مستشفى الاطفال بالدمرداش
الزمان: يوم الاحد اللى فات 
الشخصيات: الدكتوره  لا داعى لذكر اسماء عشان ما ليش نفس اسقط السنه دى بعد العمر ده كله , انا , صديقه متحمسه من النوع اللى لا يقبل الحلول الوسط ......
الموقف: تدريس الراوند الصباحى 


الدكتوره : هو انتوا اتعلمتوا هتمتحنوا ازاى ولا لسه؟؟


انا: احنا مش بتعلم اى حاجه اساسا فى اى حاجه


الدكتوره:  لا ده انتوا لازم تتمرنوا من دلوقت عشان بتيجوا و تعيطوا ...


صديقه : هو الموضوع محتاج تمرين قوى كده؟؟...طب هو النظام ايه بالظبط؟؟


الدكتوره: الامتحان بيجى على هيئه مريض قاعد و مكتوب جنبه سؤال و فى دكتور بيراقبك....خلال 3 دقايق المفروض تسلم عالمريض و تعرفه على نفسك و تشرح له هتكشف عليه ازاى و يوافق على كده و بعدين تعقم ايديك و تدفيها  كويس عشان متحطش ايديك عالمريض  و ايديك ساقعه و تقرا السؤال و تبتدى تشتغل و بعدين توصل لتشخيص تكتبه فى الورقه و الدكتور بيراقبك خلال كل ده يعنى لو طلعت تشخيص صح و عملت حاجه ناقصه فى الخطوات هتنقص فى الدرجات ....لاحظ كمان ان الورقه اللى بتكتب فيها صغيره جدا قد الكف فلازم تتمرن على عمل كل ده خلال ال3 دقايق و تتمرن ان الورقه تقضى ....


انا : -داخليا بلا صوت او تعبير على وجهى- يا نهار اسود ايه الذل ده كله هو احنا كفار؟؟


صديقه: طب و ده ينفعنا فى ايه؟؟


الدكتوره : يعنى ايه ؟؟ هو النظام كده؟؟


صديقه: "فى غلاسه واضحه" ايوه يعنى ده مفيد لينا فى ايه فى الحياه يعنى؟؟


الدكتوره : -فى عصبيه- يعنى ايه؟؟


انا: "محاوله التوضيح" هى تقصد يا دكتوره انتوا بتمرنونا اننا نشتغل بسرعه قوى كده ليه ...هو فى الممارسه الطبيه المهاره دى مطلوبه "و هنا تتدرعت الى الله ان يكون الجواب :ايوه طبعا ده اساسى فى الطب ...عشان صحبتى  المتحمسه لا يصيبها الشلل"


الدكتوره : "فى ارتباك واضح" لو واحد عيان لازم تعرفى تتصرفى بسرعه طبعا...


صديقه: فى 3 دقايق و فورقه قد الكف؟؟؟!!!


الدكتوره : هو ده النظام مش احنا اللى حطينه ...رئيسه القسم فى مكتبها اللى معترض يروح لها


صديقه : -فى حاله عصبيه واضحه- بس كده النظام معمول غلط


الدكتوره: اللى قبلكوا اتعرضوا برضه و طلبوا زياده الوقت من 3 الى 7 دقايق ....بس انتوا عددكوا كبير و بالطريقه دى المرضى هيتعبوا


صديقه: طب ما تخلوا الامتحان على يومين


الدكتوره: -فى تعالى مستفز- هو احنا فاضيين ...انتوا هتجيبونا طول النهار و كمان يومين, اللى ممكن نعمله اننا نصغر السؤال بحيث تلحقوا غير كده منقدرش نعمل حاجه


صديقه: -ترغى و تزبد و على وشك الجنون- بسسسسس.....


انا : -مقاطعه لمحاوله انقاذ صديقتى من الوقوع فى الفخ او ان تقتل الدكتوره- "بلهجه ملطفه و مرحه" طب ما توسعوها علينا يا دكتوره ربنا يوسع عليكوا "مذيله الجمله بابتسامه"


الدكتوره: "فى انتفاضه مفاجأه" ايه الاسلوب ده ؟؟؟ 


صديقه: اسلوب ايه حضرتك احنا بتناقش


الدكتوره: -بمنتهى التناكه- صاحبتك بتتكلم باسلوب غريب ايه توسعوها و الكلام ده ؟؟!!


انا : -داخليا و بلا تعبيرات تذكر- الله يرحم بقينا نتكلم عالاسلوب ....الله يرحم جدك كان بياكل المش بالشوكه


الدكتوره: شغل الثوره ده مش عندنا .....انتوا تقدروا تغيروا النظام لكن انا مليش دعوه


صديقه : حضرتك هى الثوره مالها و مال الموضوع


الدكتوره : شغل الثوره و شباب الثوره و تغيير كل حاجه ده مش هنا .....هو النظام كده مفيش تغيير و واحده غيرى كانت قالت لكم اخبطوا دماغكوا فالحيط


****************************
- و هنا فقدت الامل فى احتماليه تغيير اى شئ فى اى شئ ...دكتوره معقده ما تعرف فلول ما تعرف المهم انها لا طايقه الثوره و لا طايقه التغيير -ولو للاحسن- و لا طايقه الشباب كلهم -خاصه الطلبه بتوعها- ....حسيت اننا ممكن نغير نظام دوله لكن مستحيل نغير العقول البوار.....الدكتوره شايفه ان النظام غلط و مع ذلك لا تبذل مجهود و لو واحد من ميه فى اصلاح ما تراه خطأ !!!!


**********************************


ملحوظه : فى الامتحان السابق تجرى طقوس للتعذيب اخرى غير تلك الطقوس الرسميه التى ذكرتها الدكتوره ....و هى اساليب الكل يعرفها لكن لا يتحدث عنها احد و هى :
1: دفع 50 جنيه لكل طالب فى بدايه الامتحان "اجبارى" للدفع للمرضى


2: التعقيم الذى ذكرته الدكتوره يتم من جانبنا احنا ...بمعنى ان مفيش مكان تغسل ايديك بين الحاله و الحاله او جونتى تلبسه بتوفره الكليه ...الطالب عليه ان يشترى مناديل معقمه "ديتول مثلا" على حسابه الشخصى و وقت التعقيم من وقت الامتحان


3: على الطالب احضار سماعته الطبيه (يتراوح سعرها بين 480-160 جنيه) و الشاكوش الطبى (حوالى 25 جنيه) و جميع ادواته الخاصه .....مع ان لو جنب كل مريض الاداه اللى هاشتغل بيها هنوفر عالدفعه شراء احتياجات باكتر من 50 الف جنيه


4: حالات الابتزاز التى تحدث فى منتصف الامتحان فعلى الرغم من انك دفعت 50 جنيه فالاول الا ان ده ميمنعش ان ام المريض تجى فى منتصف ال3 دقايق و تسكت و تقولك طب هات 50 جنيه كمان و الا مش هتكمل .....و حصلت مع اصدقاء ليا امتحنوا قبل كده


اثقلت عليكوا؟؟!!!!....معلش بس برضه يسقط يسقط حكم العسكر فالاول و فى النص و فى الاخر

6 التعليقات:

سواح في ملك اللــــــــــــــــــه- يقول...

ههههههههههه

طب مالهم العسكر بموضوعكوا

مش دي طريقة معمول بيها من ايام المخلوع

ههههههههه ناقص بقي لو واحد زعلان مع مراته

يطلع يهتف ضد العسكر

تعرفي مشكلتنا ايه كشعب خاصة في الايام دي

لو ملقيناش حد نثور عليه

هنثور علي نفسنا ههههههههههه

ابراهيم رزق يقول...

صلى على النبى
زيدى النبى صلاه

بصى يا ستى الجاموسة فى طابور الحكومة بتوصل
يعنى لو وقفتى اى حد فى طابور حكومى هتلاقيه فى نهاية الطابور قاعد على مكتب
الست الدكتورة اللى ربنا يخليها لجوزها اللى درست طب و بتدرس طب و اصل الطب اللوجيك فقدته و فقدت اساساسيته
حتى فقدت القدرة على الاجابة المنطقية
هى بتمشى سورى على خطى الحمار اللى قبلها دون ان تفكر لحظة فى ان طريق الحمار ده رايح فين
مجموعة من العقد و الكلاكيع توارثتها و تحاول ان تورثها
لا و حياة ابوكى ثورة و يجب ان تكون ثورة على كل فاسد و جاهل و بيراقراطى
و لو رديتو بكده علاء عبد الهادى هيزعل منكو
يجب ان يكون هناك تغيير
يجب ان يكون هناك تغيير
يجب ان يكون هناك تغيير
فى الفكر و الاسلوب و المستقبل
و الا اولى بكى ان تجلسى فى بيتك تطبخى ملوخية و تتزوجى ربما يأتى جيل اخر يقدر على التغيير
اسف جدا جدا على الاطالة

فافى يقول...

د /دودى :
الخلاصه ان يمكنك تغيير نظام لكن مانقدرشى نغير العقول البوار عشان مصر تبقى احسن (وده فقدت الامل فيه بعد الجلسه الافتتاحيه بتاعة مجلس الشعب )يبقى لازم نتولد من جديد
تحياتى لقلمك
وعلى فكره ابقى خدى بالك من بعض الغلطات الاملائيه اعتقد انها تضرعت الى الله وليس تدرعت :)

Sara يقول...

:D
معلش يا حبيبتي

بكرا تروق و تحلى

اسعار الذهب يقول...

مع كل احترامى لكِ
الله يشفيكِ

عبد الرحمن سالم يقول...

يالهويييي... إنتي بتلاقي البشر دول فين ؟؟

ربنا يكرمها/ويشفيها.
وربنا يوفقّك في مهنة الطب دي :)


بالمناسبة.... فيلم أسماء غير كئيب تمامًا..لازم تلحقي تشوفيه، موجود في السراج مول دلوقتي :)

إرسال تعليق

حلو؟؟ وحش؟؟ طب ساكت ليه ما تقول....