الثلاثاء، 10 يناير، 2012

هو اللى عملته ده صح ولا غلط؟؟



ترددت طويلا قبل ان اكتب البوست ده لاحكى فيه من حدث النهارده العاشر من يناير لعام 2012...ترددت لانى مكنتش عارفه هاكتب البوست من انهى وجهه نظر فالاتجاهات جوايا متناقضه و كلها بتلف حواليا بتهمس فى ودنى برأيها ...فقررت ان اكتبها على هيئه سؤال اكتر منه رأى....


القراء بتوع المدونه كانوا دايما بيستغربوا ازاى انا فى كليه الطب و مع ذلك لا اكتب حرفا لا عن الطب ولا عن الدراسه الطبيه -بكل ما فيها- او عن المصيبه الكبرى المدعوه "مستشفى الدمرداش" بكل الاهوال التى اراها يوميا دون ان استطيع ان ادون حرف منها ....و كنت دايما ابرر ده لنفسى بان النت عموما و المدونه خصوصا هى حياه مستقله لا اود ان تكون مجرد امتداد لرائحه الفورمالين ....


سأكسر تلك القاعده لازيح عبء عن كاهلى......خلونى احكى الموضوع باختصار:


بدرس فى راوند الاطفال بقالى 3 اسابيع ....كجزء من الدراسه لازم نشوف اطفال مرضى و نكشف عليهم بنفسنا "بالايد او بالسماعه او بالطرق الطبيه كامله" ....لما روحنا الراوند عرفنا ان النظام المتبع هناك -تقريبا من قديم الازل- ان الطلبه يلموا من بعضهم فلوس و يدوها لام المريض -لو كان صغير- او للمريض نفسه -اذا كان سنه يسمح- و عاده كل واحد مننا يدفع 2 جنيه اكتر او اقل المهم اننا نلم للمريض 50 جنيه فى ايده .....لاحظ ان المريض بيتقاول عالفلوس قبل اى حاجه و بطريقه كنا نخجل منها احنا....


النهارده رحت الراوند عادى....و عدت عليا صاحبتى اللى بتلم الفلوس للمرضى و قالت لى: دينا عايزين 3 جنيه...قلت لها مش كانوا 2 جنيه  ايه اللى حصل؟؟ هو انا هاخد من بابا مصروف ليا و مصروف للمرضى؟؟...قالت لى: اصل الحاله مزمنه و نادره و ام المريض قالت لو مخدتش 80 جنيه هتمشى و مش هنشوف الحاله و دى حاله بتجى فى الامتحانات كتير.....و لذا اذعت كعادتى و دفعت ال3 جنيه و امرى الى الله....


و دخل المريض و امه....المريض حوالى 10 سنين و الام منتقبه -و للملاحظه انا لا اتهم النقاب باى حاجه عشان محدش يفهمنى غلط ,دى طريقه لبس لا تعبر عن اى شئ اخر سوى المظهر- المريض هنا  متشخصش اصلا و كشفنا عليه لن يفيده فى شئ و احنا عمليا مجرد بنتفرج مش اكتر من كده....المريض ده امه بتتاجر فى مرضه و تفرجه لطلبه الطب مقابل فلوس...يعنى مجرد مشروع تجارى للاسف..


الحاله باختصار هو عيب خلقى فى القلب تدعى "رباعيه فالوت" و فالوت ده اسم العالم اللى اكتشف الحاله و هى عباره عن اربع اخطاء فى تركيب القلب  تؤدى لضعفه بشكل عام و مشاكل اخرى ....و هى حاله خلقيه زى ما قلت يعنى من اول ما اتولد و محتاجه عمليه معقده جدا بل و سلسله من العمليات المكلفه و الصعبه عموما.....


ما انكرش انى كنت سعيده لما شفت الحاله...صحيح زعلت للولد لكن رؤيتى لحاله زى ده مهم ليا عشان فى شغلى اقدر اشخص حاله زى دى يمكن اقدر انقذ حد فى يوم من الايام...و حضرت السماعه الطبيه مستبشره بما ساسمعه .....


فؤجئت بالمريض مغطى وشه بالملايه و رافض ان حد يقرب منه ....و هنا ثارت قلاقل بينا و انتشرت الهمسات :ازاى يعنى ندفع 80 جنيه  و منمدش ايديا عليه ايه النصب ده؟ -تقريبا من غير صوت عشان الدكتوره الكبيره كانت واقفه و طبعا متحبش سيره الفلوس قدامها- .....صحيح المريض واخد فلوس لكن حقوق المريض تمنع اننا نكشف عليه غصب عنه !!!


و هنا وقعت مشكله اخلاقيه: ازاى هنكشف عالمريض و نعرى صدره و نحط سماعتنا -خاصه اننا 25 طالب غير الدكاتره- و هو رافض ؟؟؟.......هل من حقنا نكشف عليه غصب عنه؟؟.....و هنا تدخلت الام و ضرب ابنها قلمين -حرفيا- و زعقت له و اجبرته على  ان يتحملنا ....كان نفسى اسجل موقف و اقول انا ارفض انى اكشف على مريض بالاسلوب ده بس قلت لنفسى طب ده معناه ايه؟؟...اللى هيحصل انى لا هاستفيد ولا هافيد المريض ...و بالتالى فقدت براءتى و انضممت للسيستم الموضوع :(


       و جاء دورى فى ان اسمع صدره بالسماعه و حسيت بشعوره بالرفض و لم يكن بالاحساس الصعب خاصه مع نظره الاحتقار لى على وجهه ....   طلبت انى اشوف ضوافره -عشان اشوف علامه مميزه فى المرض ده- فرفض فلجئت للام اللى ضربت ابنها -قلمين كمان- و اجبرته  على ان يظهر ايديه ليا ......حطيت سماعتى و سمعت اللغط و العلامات المميزه للمرض الا انى مركزتش ساعتها فى اى حاجه حتى الصوت الا فى شئ واحد.....هو اللى عملته ده صح ولا غلط؟؟

24 التعليقات:

سواح في ملك اللــــــــــــــــــه- يقول...

انا معرفش حكاية قانون انك ممنوع تكشفي علي مريض غصب عنه ازاي

كل الاطفال او معظمهم لما بياخدوا حقنة مثلا بيرفضوا وبيرفسوا

وبيبقوا مش عايزين حتي الدوا ولازم ياخدوه غصبن عنهم

اعتقد ان هذا الطفل لو يعي او يدرك خطورة حالته

ماكان ليرفض

لكن ممكن يكون اتخض من منظر الدكاترة الكتير

وجهة نظري ان انتي صح

د/دودى يقول...

قانونا و اخلاقيا من حق المريض رفض الطبيب و رفض ان يتم اجراء الكشف عليه -الا فى حالات قليله قوى دى مش منهم-....المريض هنا حاله مختلف ببساطه لانه متشخصش اصلا و كشفنا عليه لن يفيده فى شئ و احنا عمليا مجرد بنتفرج مش اكتر من كده....

المريض ده امه بتتاجر فى مرضه و تفرجه لطلبه الطب مقابل فلوس...يعنى مجرد مشروع تجارى للاسف

سواح في ملك اللــــــــــــــــــه- يقول...

للاسف

كلامك صح بس هو كده كده مريض

وحالته ممكن تفيدكم في التعلم

وكده كده الست امه دي الله يسامحها

هتتاجر فيه بطريقة او اخري

فهنا انا برجح حكاية الفايدة دي

يمكن تعلمكم علي الولد ده يضره هو وهو مش ضرر بالمعني الكبير

بس يفيد 25 حالة تعلمها 25 طالب مثلكم قد تنقذوهم مستقبلا

او تتعرفوا علي امراضهم

ربنا يوفقكوا يادكتورة

بجد انتوا بتتعلموا في ظروف صعبة اوي

بس لو سلمتي نفسك لمشاعرك

حاجات كتير قوي هتتعبي منها

وقد تضرك مستقبلا كطبيبة ناجحة انشاء الله

ابراهيم رزق يقول...

صلى على النبى
زيدى النبى صلاه

الموضوع ده غير انسانى بالمرة و العالم المتقدم عندهم نماذج محاكاة للواقع و على فكرة الموضوع ده منتشر فى مصر و لو تفتكرى فيلم يا طالع الشجرة كان بيحكى على كده
اكثر حاجة بتكرهنى فى المستشفيات الجامعية هى دى و اعتقد ان الخبرة فى الطب لم تعد تعتمد على الكشف الاكلنيكى و انما تعتمد فى الغالب على الاشعة و التحاليل
تذكرت موقف شبيه كان لى صديق طبيب اسنان و هو طالب اتفق مع عامل فى بنزينة على علاجه و التعلم فيه و اختلفت معه يومها و قلت له ان هذا غير اخلاقى و لكنه قال لى هذا هو المتبع
خلاصة القول ارفض هذا الاسلوب فالطريق الى جهنم مفروش با لنوايا الحسنة

تحياتى

د/دودى يقول...

سواح في ملك اللـه: حضرت قدمت فكره المنفعه و هى الفكره المتبعه ...المشكله ان ضميرى مش مستريح

د/دودى يقول...

ابراهيم رزق : معاك ان الاسلوب غير انسانى لكن مش معاك فى ان الخبره السريريه غير هامه بالعكس ابسلتوتلى فى مصر الخبره السريريه اهم حاجه لان التحاليل و الاشعه غير متاحه فى تسعين فى الميه من الحالات زى القرى و الكفور و المستوصفات الصغيره ....و هى خبره بياخدها الطالب حتى فى امريكا فى المستشفيات التعليميه و ده نظام معروف لكن بيبقى بسيستم مختلف تماما من حيث احترام المريض و من حيث حقه فى الرفض و عدم دفع فلوس و من حيث ان الطالب يشارك فى خدمه المريض و علاجه و تشخصيه -لخلق مصلحه مشتركه- و ليس مجرد الفرجه

P A S H A يقول...

سلامو عليكم الأول
بصي أنا مش أول مرة أدخل مدونتك بس ما كنتش باشوف غير تعليقات الفيس بوك فبالتالي ما كنتش باعلق للأسف ! بيعجبني تحليلك للكتب ومناقشاتها ولكني في الغالب الأعم قد لم أكن لأعلق إلا على ما قرأته :)

بالنسبة لموضوع البوست .. أحييكي على طرحك للتساؤل فهو في رأييي خيراً من وأده .. ولكني اختلف معك في التناول .. يعني ليه شايفه الموضوع من الزاوية دي فقط ؟ كما أني أعتقد أن جملتك "و بالتالى فقدت براءتى و انضممت للسيستم" فيها جلد ذات وتحامل عليكي أو زي اللي حاسس بالنب وبيعترف على كرسي الإعتراف بغية التطهر ! .. أنا مش باهاجمك والله بس أنا أقصد إن فيه مواقف ما ينفعش فيها نبدل الأدوار .. ما ينفعش أحط نفسي مكان حد وأبني تصور قد يكون وهمي وأحاسب نفسي عليه .. طب ليه ما تصورتيش إنك بتعملي للطفل ده العملية اللي هاتنقذ حياته ؟؟ وإنك لو سبتي مشاعرك تتحكم فيكي بسبب بكاءه مثلاً مش هاتعرفي تمسكي المشرط وتشتغلي في جسمه ؟؟ .. أنا مع الأستاذ / إبراهيم رزق إن الموضوع غير إنساني بالمرة لكن هل في إيديك حل تاني ؟

أرجو أن تتقبلي رأيي بصدر رحب وأعتذر عن الإطالة :)


خالص تحياتي

د/دودى يقول...

P A S H A : بابقى سعيده قوى لما "الصامتين" يكلمونى يمكن لانى صامته برضه فى مدونات الاخريين ....عشان كده انا مبسوطه بان ريفيو الكتب عجبك...

احساسى بالذنب نابع بان اللى بنعمله غير اخلاقى على الاقل قانونيا ...يمكن عشان كده ضميرى مش مستريح لما طفل عنده عشر سنين يتعامل كمشروع تجارى و لا يروح مدارس ولا تعليم و يشتغل طول عمره "كمريض محترف" للطلبه الطب بيهجموا عليه زى الذئاب ....اتضايقت من نفسى لانى ما اعلنتش اعتراضى و رضيت بالامر الواقع

عارف لو كنت حاسه انى بكشفى عليه هافيده فى حاجه -او عالاقل انه موافق- مكنتش هاتضايق....و انا كمان رأيى من رأيك هو نظام غير انسانى بس هاعمل ايه؟؟

اشكرك على اهتمامك بمشكلتى

هبة فاروق يقول...

طبعا بحييك على اخلاقك ورقه شعورك ..لان احيانا الدكتور بيتأثر بما يشاهدوا خاصه فى المستفيات العامه مثل تلك الحاله وقسوه الام مقابل بعض المال ..ويصبح فيما بعد متبلد المشاعر ويصبح اكثر قسوه على الاخريين من المرضى
ارجو منك رجاء خاص ان تكونى كما انت تحملين مشاعر الرأفه والرقه ولا تتأثرى بما حدث
وسؤالك جوابه اننا احيانا نتعرض لمواقف صعبه تمنعنا عن اتخاذ قرار بشانه ..ولكنى كنت اتمنى ان توبخى هذه الام لقسوتها فى التعامل مع ابنها المريض

Tamer Nabil Moussa يقول...

هو صحيح شىء غير انسانى بس انتى سكتى عشان الموضوع كان بالنسبة ليكى دراسة حالة ومرض ما وكمان عشان لو خرجتى عن القاعدة هتكونى انتى اللى غلط

بس من راى ان الانسان لازم يكون عندة مبادىء لايخرج عنها تحت اى ظروف

مع خالص تحياتى

Tarkieb يقول...

المفروض كنت تقولي اي حاجة للست وتفهميها إن اللي بتعمله ده اتجار بعاهة ابنها وان اللي انت بتعملوه مع الولد لخدمة ناس كتيرة تانية ولازم يكون بالحسني مش بالعافية وان الفلوس مش مقابل الخدمة ولكن دي هدية بسيطة للولد ....اما ان الجميع يدور على مصلحته على حساب المريض ....وان مورال ناس متعلمة لا يفرق عن واحد غير متعلم....هو ده العيب بدليل انك كاتبة عنوان يدل على عدم رضاكي.

د/دودى يقول...

هبة فاروق : نفسى زى ما قلتى احافظ على افكارى من غير ما السيستم يعدلها زى اللى حصل مع اللى اكبر منى....كان نفسى اضربها قلمين مش بس اوبخها بس احرجت الصراحه

د/دودى يقول...

Tamer Nabil Moussa : فعلا زى ما قلت انا تقريبا اجبرت بعامل الظروف ....بس ده مش معناه انى موافقه

د/دودى يقول...

Tarkieb : طبعا ده اتجار بعاهه الطفل و لوكانت فى بلد محترمه كان اتاخد منها و الدوله ترعاه احسن منها...

اخبار رياضية يقول...

مقال رائع .. فعلا المناقشة حل لكل مشكلة

اخبار مصرية يقول...

موضوع ممتاز جدااا

Tears يقول...

يا بنتى نظام التعليم ده كله غلط...ده انتى لو خدت الجامعه فى استراليا و شفتى مستوى التعليم و اللى حاصل فيها فى اى تخصص ح تكتشفى ان اللى فى مصر نصب

قهوة بالفانيليا - شيماء علي يقول...

انا اسفة .. بس المريض خد فلوس نظير الكشف ..!!
يبقى لازم يتكشف عليه !!
دة امتحانات و مذاكرة .. !!
جد مش هزار .. مادام دة اللي ماشي .. و مفيش حل غيره .. يبقى خلاص .

AHMED SAMIR يقول...

انتي صح تماما
دي عالم واطية سواء الولد او امه
انا اسف جدا اني اقول كدة
بس بما انك دفعتي فلوس يبقى لازم تستفيدي بالفلوس دي و الا تبقى نصب
انما الصح بقى بجد
انكم تقفوا كلكم كقسم رافضين الاسلوب دة من الاساس و ترفضوا تدفعوا لأهالي المرضى و لا مليم و تصعدوا الموضوع ان شا الله حتى يغيروا نظام الامتحان
هي دي الايجابية

gaser يقول...

بصي الله اعلم بالظروف اللي خلت الام تعمل كده يعني ممكن تعمل كده علشان تجمع فلوس علاج للولد ممكن علشان تأكل اخواته الله اعلم بس انت كنت ممكن تفهميها ان اللي هي بتعمله ده غلط و بالنسبة لفكرة الاحساس بالذنب علشان الولد او كده كان في اكتر من طريقة تتعاملوا بيها معاه علشان يرضى ان هو يخليكوا تكشفوا عليه مثلا كنتوا تجيبوله شوكولاتاية D: ساعتها بتهيالي هيعمل اي حاجة انتوا عايزينها

اخبار الرياضة يقول...

جميل جدا تبادل الاراء

ع.سالم يقول...

إمممم.. الموضوع مؤلم نوعًا ما، مش عارف أحدد مين اللي غلطان بالظبط، الأم لإنها بتتاجر بمرض إبنها، ولّا الإبن لإنه مفتحش إيديه من الأول، ولّا إنتوا معشر كلية الطب لإنكوا بتوافقوا من الإساس على موضوع دفع الفلوس ده، ولكن إحقاقًا للحق إنتوا معذورين.. أنا عارف إن كل الناس كده للأسف، إستغلاليين، وده بيحصل عند قريبي في طب الأسنان برضه..

ولكن بالنسبة لكِ إنتِ فأنا شايف إن إنت مغلطتيش، إنتي كنتي بتأدي واجبك بهدوء وإحترام وهوّا كان رافض قامت الست الوالدة ضربته من غير ما تقوليلها مثلًا "ما تخلينا نشوف إبنك ده يا حاجة"... إنتِ أكيد مش غلطانة ده اللي أنا متأكد منّه، لإني لو كنت مكانك كنت هعمل نفس اللي عملتيه :)

Umzug Wien يقول...

thanx

w7l يقول...

Wow !! This is the first time i knew that u pay for patients to examin them !!! El7amdullah in jordan the patient may reject u for no good reason but at least u didnt pay anything for him

Is it right or wrong what u did?? Well its not wrong and its not right , in eithecs patient has the right to refuse examination but in this case the patient is just a kid , and his mother can decide that for him, and as long as she ok with that then u can examine him, but on the other side morally speaking is not ok to emaine oatient after being slapped and hurted and forced to be examined


لو اني محلك كان فحصت المريض على كل الجهات ، لانه النظام غلط من المبدا ، اكان الام توخذ مصاري او انها تجبر ابنها على الفحص ، على الاقل انت بتعرفي الان شو هو هاد المرض و يمكن بكره تقدري تغيري او حتى تنقذي حياة حد ، بشكل او باخر يمكن الام و المريض و ٨٠ جنيه عملو منك طبيب افضل للمستقبل مع ان الطريقة غلط

إرسال تعليق

حلو؟؟ وحش؟؟ طب ساكت ليه ما تقول....