هو اللى عملته ده صح ولا غلط؟؟

ترددت طويلا قبل ان اكتب البوست ده لاحكى فيه من حدث النهارده العاشر من يناير لعام 2012...ترددت لانى مكنتش عارفه هاكتب البوست من انهى وجهه نظر فالاتجاهات جوايا متناقضه و كلها بتلف حواليا بتهمس فى ودنى برأيها ...فقررت ان اكتبها على هيئه سؤال اكتر منه رأى....


القراء بتوع المدونه كانوا دايما بيستغربوا ازاى انا فى كليه الطب و مع ذلك لا اكتب حرفا لا عن الطب ولا عن الدراسه الطبيه -بكل ما فيها- او عن المصيبه الكبرى المدعوه "مستشفى الدمرداش" بكل الاهوال التى اراها يوميا دون ان استطيع ان ادون حرف منها ....و كنت دايما ابرر ده لنفسى بان النت عموما و المدونه خصوصا هى حياه مستقله لا اود ان تكون مجرد امتداد لرائحه الفورمالين ....


سأكسر تلك القاعده لازيح عبء عن كاهلى......خلونى احكى الموضوع باختصار:


بدرس فى راوند الاطفال بقالى 3 اسابيع ....كجزء من الدراسه لازم نشوف اطفال مرضى و نكشف عليهم بنفسنا "بالايد او بالسماعه او بالطرق الطبيه كامله" ....لما روحنا الراوند عرفنا ان النظام المتبع هناك -تقريبا من قديم الازل- ان الطلبه يلموا من بعضهم فلوس و يدوها لام المريض -لو كان صغير- او للمريض نفسه -اذا كان سنه يسمح- و عاده كل واحد مننا يدفع 2 جنيه اكتر او اقل المهم اننا نلم للمريض 50 جنيه فى ايده .....لاحظ ان المريض بيتقاول عالفلوس قبل اى حاجه و بطريقه كنا نخجل منها احنا....


النهارده رحت الراوند عادى....و عدت عليا صاحبتى اللى بتلم الفلوس للمرضى و قالت لى: دينا عايزين 3 جنيه...قلت لها مش كانوا 2 جنيه  ايه اللى حصل؟؟ هو انا هاخد من بابا مصروف ليا و مصروف للمرضى؟؟...قالت لى: اصل الحاله مزمنه و نادره و ام المريض قالت لو مخدتش 80 جنيه هتمشى و مش هنشوف الحاله و دى حاله بتجى فى الامتحانات كتير.....و لذا اذعت كعادتى و دفعت ال3 جنيه و امرى الى الله....


و دخل المريض و امه....المريض حوالى 10 سنين و الام منتقبه -و للملاحظه انا لا اتهم النقاب باى حاجه عشان محدش يفهمنى غلط ,دى طريقه لبس لا تعبر عن اى شئ اخر سوى المظهر- المريض هنا  متشخصش اصلا و كشفنا عليه لن يفيده فى شئ و احنا عمليا مجرد بنتفرج مش اكتر من كده....المريض ده امه بتتاجر فى مرضه و تفرجه لطلبه الطب مقابل فلوس...يعنى مجرد مشروع تجارى للاسف..


الحاله باختصار هو عيب خلقى فى القلب تدعى "رباعيه فالوت" و فالوت ده اسم العالم اللى اكتشف الحاله و هى عباره عن اربع اخطاء فى تركيب القلب  تؤدى لضعفه بشكل عام و مشاكل اخرى ....و هى حاله خلقيه زى ما قلت يعنى من اول ما اتولد و محتاجه عمليه معقده جدا بل و سلسله من العمليات المكلفه و الصعبه عموما.....


ما انكرش انى كنت سعيده لما شفت الحاله...صحيح زعلت للولد لكن رؤيتى لحاله زى ده مهم ليا عشان فى شغلى اقدر اشخص حاله زى دى يمكن اقدر انقذ حد فى يوم من الايام...و حضرت السماعه الطبيه مستبشره بما ساسمعه .....


فؤجئت بالمريض مغطى وشه بالملايه و رافض ان حد يقرب منه ....و هنا ثارت قلاقل بينا و انتشرت الهمسات :ازاى يعنى ندفع 80 جنيه  و منمدش ايديا عليه ايه النصب ده؟ -تقريبا من غير صوت عشان الدكتوره الكبيره كانت واقفه و طبعا متحبش سيره الفلوس قدامها- .....صحيح المريض واخد فلوس لكن حقوق المريض تمنع اننا نكشف عليه غصب عنه !!!


و هنا وقعت مشكله اخلاقيه: ازاى هنكشف عالمريض و نعرى صدره و نحط سماعتنا -خاصه اننا 25 طالب غير الدكاتره- و هو رافض ؟؟؟.......هل من حقنا نكشف عليه غصب عنه؟؟.....و هنا تدخلت الام و ضرب ابنها قلمين -حرفيا- و زعقت له و اجبرته على  ان يتحملنا ....كان نفسى اسجل موقف و اقول انا ارفض انى اكشف على مريض بالاسلوب ده بس قلت لنفسى طب ده معناه ايه؟؟...اللى هيحصل انى لا هاستفيد ولا هافيد المريض ...و بالتالى فقدت براءتى و انضممت للسيستم الموضوع :(


       و جاء دورى فى ان اسمع صدره بالسماعه و حسيت بشعوره بالرفض و لم يكن بالاحساس الصعب خاصه مع نظره الاحتقار لى على وجهه ....   طلبت انى اشوف ضوافره -عشان اشوف علامه مميزه فى المرض ده- فرفض فلجئت للام اللى ضربت ابنها -قلمين كمان- و اجبرته  على ان يظهر ايديه ليا ......حطيت سماعتى و سمعت اللغط و العلامات المميزه للمرض الا انى مركزتش ساعتها فى اى حاجه حتى الصوت الا فى شئ واحد.....هو اللى عملته ده صح ولا غلط؟؟