"لا تحارب فى اكتر من جهه فى نفس الوقت"...ذلك هو الدرس الاول فى علم الحرب فى اى عصر و زمان و مكان ....
النهارده كان جمعه تصحيح المسار و بصراحه دى اكتر جمعه انا اتفقت مع مطالبها , و من قلائل الجمع اللى حسيت بان مطالبها عادله خاصه مطالب : الغاء المحاكمات العسكريه للمدنين و تعديل قانون الانتخابات الملئ بالعيوب و الثغرات كان فى مطالب تانيه طبعا لكنها فى نظرى ليست بنفس الاهميه بل اعتبرها نوع من انواع التشتيت غير المطلوب..
كان رأيى ده مبنى على نظريه ان فقط الوقفات الاحتاجيه و الجمعات اللى نجحت و اتحققت مطالبها هى تلك الوقفات المركزه فى طلب واحد او بحد اقصى اتنين ....
و فعلا النهارده اتبسطت بالاقبال و الحضور بل و تفاءلت بتحقيق المطالب و الانتهاء من الكارثه المروعه اللى بتدعى المحاكمات العسكريه اللى بقت رعب كل من يجلس على التويتر او الفيس ..بالرغم من مقاطعه الاخوان و حبايبنا السلفيين اللى دايما فى السليم و مبيرضوش يزعلوا حد غيرنا ...احنا بس اللى علمانين و ليبرالين و بيدعى علينا فى صلاه الجمعه عالمنابر بينما الحكومه سكر و المجلس العسكرى عسل زى اغنيه شهرزاد عسل و سكر عيون حبيبى عسل ضحكه حبيبى سكر و انت حبيبى يا حلو يا واد يا مجلس...
و فجأه - مع فاصل من موسيقى المفاجأت- لاقيت الدنيا ولعت من كل ناحيه و تفرق الشمل:
- شويه فى التحرير عشان المطالب المتفق عليها
- شويه اللى هما الالتراس فى مسيره لوزراه الداخليه
- شويه راحوا على السفاره
و انفجر الوضع متزامنا كل مع بعضه فجأه..و اكيد انت متابع و عارف كويس اللى حصل شويه الداخليه تتحرق , و اللى حصل فى السفاره بقى مشهور عالميا و اتفضحنا فى كل حته بمصابينه و باللى ماتوا حتى اوباما عرف و بيتأمر علينا...
- اللى عملوه الالتراس انا شخصيا متعاطفه معاه نسبيا نظرا لان الداخليه داست عليهم جدا , تخيل ان مجرد الشعارات و الهتافات السياسيه بقى مبرر لضرب الجمهور بعصيان الامن المركزى للصبح بلا مغيث ولا رقيب بل و بعد ما تتضرب تتحول عالقسم و نمشى ندور عليك بين اقسام مصر و نترجى السماح...و لاجل مصر المساواه بعد الثوره فالتراس الاهلى و الزمالك و الاتحاد و الاسماعيلى و المصرى كلهم خدوا نفس الكورس و الطريحه بنفس الطريقه بلا تحيز...بعد كل ده الثأر البايت يعمل اكتر من كده..
- اللى اتعمل فى السفاره : صحيح انا قلبى ما يطوعنيش انى ادافع عن السفاره الاسرائيليه و لا هاقدر اعمل صفحه عالفيس على طريقه "احنا اسفين يا سفير" لكن نتفق او نختلف على مدى الاجراء اللى لازم تاخده السلطات المصريه وقت حدوث الازمه لكننا قطعا مش هنفرح بتصعيد المواقف لهذا المستوى الخطر باختصار لان طنط اسرائيل ليها ماما امريكا اللى واقفه فى ضهرها و الاكيد اننا مش هنقدر او عالاقل مش من الحكمه الان اننا نعادى امريكا فى ظروفنا المهببه دى ...و ربنا يستر من التابعات القانونيه على الاقل و من التابعات السياسيه التانيه...
- السؤال المهم : هل جمعه تشتيت المسار هى الحل؟؟...و هل مع كل تلك القضايا الفرعيه هيتم الغاء المحاكمات العسكريه و تعديل قانون الانتخابات؟؟!!!
8 التعليقات:
بصي
انا بقي مش متفق مع المليونية دي
اساليني ليه اجاوبك
اولا من التجارب السابقة
بعد كل مليونية لازم تحصل كارثة
اما معتصمين في الميدان ومش عايزين يسيبوه
لحد ميدخل عليهم ناس تانية تبقوظ القضية والاهداف
وميبقاش غير فض الاعتصام بالقوة وده تقليل من شان
القضية الي بينادوا بيها حتي لو كانت عادلة
واما يروحوا عند السفارة
يقلبوها فوضي
انا بقي عكسك
في الفترة دي لازم محاكمات عسكرية
لردع كل بلطجي يعبث بامن البلاد
لان القضاء الطبيعي بطئ
مما لايدع فرصة للردع
وبعدين لو قلنا ان فيه مندسين
طيب مالمندسين عشان يتواجدوا
لازم فيه بيئة خصبة ليهم
وطبعا مفيش احسن من التجمعات والمليونيات
يادكتورة
ميلاد الديكتاتور ياتي ردة فعل لتصرفات هوجاء
هم يصنعون فرعونا ولايدرون
كثرة المليونيات تقلل من شان المليونية نفسها
وتصنع اخطاءا تؤخذ علي الداعين لها
دا لما نجم سينما يقولولوا انت مابتظهرش في الاعلام ليه
بيكون رده لازم اكون قليل التواجد عشان متحرقش
وقيسي علي ذلك كل حاجة
كل طائفة او جماعة متحاملة علي الطائفة التانية
وتحاول تفسير قرارتها علي عكس ما يراد منها
بل وتقوم بتخوينها واتهامها عند كل فرصة سانحة.
للأسف
الأمر خرج عن السيطرة
والفكرة أصبحت مبهمة المعالم
والثورة بقيت بلا شكل أو مضمون ثابت
يتفق عليه الجميع
كلام سليم ... بالذات نقطة إنّه مش وقته ... يعني أنا بصراحة كنت هتبسط أوي من حادثة السفارة لو كانت رداً على حركة عملتها إسرائيل من شوية ... فعلاً منقدرش نعمل صفحة "احنا اسفين يا سفير"، بس الهمجية والعشوائية في الموضوع كانت برضه غلط.
وكمان إحنا كنا نازلين عشان حاجة واحدة.. أو عشان طلبات محددة.. إيه اللي حصل ؟ مش عارف !
أنا شايف لازم نطالب أن يكون يوم 9 سبتمبر عيد قومى للشباب .. الحمد لله قدروا ينزلوا العلم من فوق سفارة جوة بلدهم .. مش مهم ضحايا او وجود بلطجة .. المهم الحمد لله نزلنا العلم
الموضوع ده يعتبر خيانه عظمى ولابد التحقيق فيه من قبل الحكومه والوقوف على المدبر الرئيسى له
لان اللى حصل امبارح ده ماكانشى سهل ..... وعلى فكره انا بدأت احس النهارده انه بمثابة تدريب شعبى غير معلن على الانقلاب والسيطره على البلد يعمل شبه ثوره شعبيه غير سلميه
لانى فوجأت النهارده بخبر انهم كانوا بيحاولوا كمان اقتحام مبنى الاذاعه والتليفزيون
انا مش عايز اكبر الموضوع وان كان هو كبير اصلا .... بس المتابع لمثل هؤلاء هيعرف انهم بيتدربوا فعلا على الخطوات القادمه على ارض الواقع
بصى يا دينا
صلى على النبى زيدى النبى صلاه
انا مش بحب يقعد قدام التلفزيون او على تويتر او الفيسبوك و يقول رايه
اليوم كان ناجح غصبا عن اللى بيقولوا عليهم السلفيين اللى احسن حاجة يعملوها يربوا دقنهم و يتجوزوا اربعة و يلبسوهم خيم سوداء
و غصبا عن الاخوان اللى بتحركهم مصالحهم و اتفاقهم مع حزب الوفد اللى علاء عبد المنعم و مصطفى الجندى فضحوا الجميع و جمدوا عضويتهم بالوفد و لم يخرج من جماعة الاخوان ينفى ما حدث
ما اتهم به الالتراس باطل باطل باطل و تشهد ضهورهم المصابة بعصا الامن المركزى
اما اعمال التخريب فمن يقوم بها وزارة البلطجة الداخلية عن طريق متخريجها من اكاديمية البلطجة احدى انجازات العادلى و مبارك
اذا كانوا هؤلاء بلطجية فيشرفنى ان اول بلطجى
ارجو من يكتب اتركوا الكنبة او اتركونا
طبعا لا اقصدك بهذا الكلام و لكن اقصد اصحاب الاستديوهات المكيفة
تحياتى
مساء الورد د/دودي
كثرت بشكل ملفت الجمعات والجمعة الوحيدة التي كانت
فاصلة هي الجمعة التي تسببت بسقوط مبارك أما أن
يجتمع الأخوة ليختلفوا أو تثار المناكفات هنا وهناك
فهذا لن يخدم القضية أبداً واسرائيل تستحق الحرق ولكن
ليس هذا وقته فوسائل الأعلام اليهودية استغلت الحدث
للتصوير بأن الثورة أدت إلى فوضى تسببت بإقتحام
السفارات فنحن الوحيدون الذين نرى اسرائيل كيان
مغتصب في حين يراها العالم بأنها دولة مضطهدة لذلك
يجب أن تكون الخطوات مدروسة حتى تكبر صورة الثورة .
تحياتي
علقت على الفيس ، لكن قلت أضيف حاجة كمان :
اليوم دة فشل غصب عن عين اللي روجوا ليه ، لإنهم مش واضحين ، وبيكرسوا لصورتهم المتغطرسة في عين الشارع..
اللي بيقول إن "كل من عداي هو كنبة" ما يفرقش كتير عن اللي بيقول "كل من عداي هو كافر".. أو "كل من عداي هو وغد"..وجوه لعملة متطرفة واحدة سواء كانت باسم الدين أو باسم الوطن..
دة لو المجلس العسكري ما نفسهوش في السلطة أعتقد إنه بعد التصرفات اللي حصلت حيفكر فيها ، تطرف موازي لتطرف وغطرسة موازية لغطرسة..
بالمناسبة ، اللي بيعتبرهم السادة الأفاضل كنب وكراسي وربما جزم ومرضى عقليين ليهم أسئلة وعايزين يفهموا ، وما دام قلة الأدب هي الحل وما دام منطق الغجرية ست اخواتها ، وما دام الأغلبية المستقلة غير المسيسة بتتشتم من كل خلق الله ، فنفس الأغلبية بتكرر أسئلتها المشروعة للنخبة المثقفة القائدة (على غرار "حكم الفرد المستبد المثقف اللي هوة أنا"-تعريف "سئيل الندمان" للديكتاتورية في مسرحية "لينين الرملي" و"محمد صبحي" "تخاريف").. فإن النخبة ما جاوبتش يبقى من حق الأغلبية المستقلة غير المسيسة وغير المتمذهبة تقول عليهم ناس مفلسين فكريا وما عندهمش شيء يقولوه ، وإن رفضت تجاوب فمن حق الأغلبية المستقلة غير المسيسة وغير المتمذهبة تقول عليهم متغطرسين ومتعالين ولا يقلون شيئاً عن "مبارك" وحزبه..
لن نختار بين تطرفين ، تطرف ديني وتطرف متمسح بالثورة ، ولن نختار حكم الأعيان بديلاً لحكم الرعيان ولا حكم الإخوان ، ولن نستبدل "مبارك" الشخص بـ"مبارك" المنطق ولا بمن صنعوا ملياراتهم من التنصيص مع "علاء" قبل أن ينقلبوا على "جمال"..
عذراً لحدة اللهجة وعنفها..
إرسال تعليق
حلو؟؟ وحش؟؟ طب ساكت ليه ما تقول....