السبت، 30 يوليو 2011

Larry Crowne 2011






ها قد عدت لارتدرى عباءتى السينمائيه مره تانيه بعد غياب طال .... المره دى فيلم توم هانكس و جوليا روبرتس الجديد اللى محبتش احط عليه امل كبير قبل مشاهدته لتجنب حاله خيبه الامل اللى راكبه جمل بعد مشاهدتى لافلام هوليود متصدره البوكس اوفيس و لى فى فيلم "ذا توريست" بتاع انجلينا جونى و جونى ديب اسوه حسنه , و لذلك و لجميع ماسبق ذكرته قررت انى اتفرج عليه بلا اى نوع من التوقعات ...


من التترات بان الجو العام للفيلم اولا انه بطوله توم هانكس و جوليا روبرتس و انتاج توم هانكس و تأليف توم هانكس  و بالتالى فواضح ان توم هانكس واخد الفيلم مقاوله من الجلده للجلده و تقريبا هيختم بوجوده الكريم 90% من مشاهد الفيلم ...عموما و ماله ما توم هانكس عاملها قبل كده فى Cast Away 2000 اللى كان عامل فيه دور الراجل اللى كان عالجزيره لوحده بيكلم "ويلسون" كره الطائره اللى كانت مصحباه طول الفيلم فعلى الرغم من انه تقريبا كان واخد كل الفيلم الا فيما ندر لكن قدراته التمثليه و النص الرشيق منع حدوث الملل بل و جعل الملل فى الفيلم ده اشبه بالعنقاء فلا وجود لها ....


التيمه العامه للفيلم و هاطمنك تانى مفيش حرق للقصه : لارى (توم هانكس) موظف باحد المحلات الشامله و بيبان اللى بيشتغل فيه من مجه طويله و فى المشهد الاول هيفاجئ بانه اتطرد بحجه انه مش معاه شهاده جامعيه , بعد قليل جدا يتضح انه فى ازمه ماليه و مديون و كل الوطائف المتوفره سيئه فيقرر انه يدخل الجامعه ...و هناك يلتحق بمادتين الاولى "التواصل و التحدث" اللى بتدرسها جوليا روبرتس و التانيه "اصول و قواعد الاقتصاد" اللى بيدرسها ممثل ظريف قوى فيه عرق صينى او يابانى انتوا ادرى بقى ...هناك بيطور و تتطور الحكايه ...طبعا فى خط درامى تانى اصفه بالثانوى اللى هو حكايه جواليا روبرتس نفسها مع زوجها لكنه يظل خط درامى اضافى ليس اكثر...




Box Office
Budget: $30,000,000 (estimated)
Opening Weekend: $13,006,875 (USA)  
Gross: $42,738,000 Worldwide

ميزانيه : 130 مليون دولار ؟!!!....ليه ان شاء الله ؟؟...اذا كانوا المنتجين اغبياء كفايه لانتاج فيلم مكرر جدا و عادى بمبلغ ده يبقوا حريين بقى...
ايرادات امريكا فقط حتى الان : 13 مليون؟؟!!..واضح ان كمان المشاهدين الامريكان اغبياء كفايه لدفع الفرق و عليه مكسب....ولا ادفع فى فرجته عشره جنيه دى ده انا بفكر ارفع قضيه اطالب فيها بتعويض
ايراد كلى :42 مليون!...رزق الهبل عالمجانين

التالى هو تقييمى اللى ملوش اى اهميه اطلاقا (بتفكرنى بمدحت شلبى الحته دى):




* توم هانكس : دور عادى  بمساحه واسعه و تقريبا ولا ماستر سين واحد , تحس انه بيمثل براحته مفيش مشاعر اوفر او مشاعر اصلا , الدور اسهل من اللازم فمش باين فيه جمال تمثيله زى انشودتى المفضله سينمائيا "فورست جامب" مثلا ,, مش دور جوائز طبعا لكن اقل من قدراته ...


* جوليا روبرتس : اذا كان دور توم هانكس عادى فدور جوليا عادى و اقل من عادى على رأى اصاله ..مساحه نسبيا صغيره و مستوى اى ممثله ممكن تعمله مستريح ...دور لم يضف لها و لم ينقص منها ...



* Cedric the Entertainer: كان تقريبا هو الحسنه الوحيده فى الفيلم كله باداء رشيق بين الحين و الاخر و كان دوره كجار توم هانكس اللى بيبع حاجاته طول النهار..كوميديا راقيه ضحكتنى فى المرات القليله اللى ظهر فيها 

الخلاصه : عايز تتفرج عليه يبقى على مسؤليتك الخاصه انا مليش دعوه لكن حتى لو هتتفرج ما تتوقعش انك هتشوف "فورست جامب" او "بريتى ومن"....تقييمى الخاصه 5.5 من عشره 

http://www.rottentomatoes.com/m/larry_crowne/

http://www.imdb.com/title/tt1583420/

 للتحميل مترجم :
http://forums.myegy.com/thread125133.html 

11 التعليقات:

غير معرف يقول...

مسائك عطر دودي

الواضح أن توم رجل ذكي أو بالأصح منتج ذكي

جداً لأنه عرف جماهريته والمثل العربي يقول

جحا أولى بلحم ثوره فإذا كان بإمكانه أن ينتج

فيلم تصل إيراداته إلى 300 مليون فلماذا يتاخر

عن ذالك وخصوصاً أن شريكته أيضاً ممثلة مشهورة

ولها جماهرية كبيرة وجمهور سيدخل الفيلم على

الاسامي فقط إذاً قد تكون قصة الفيلم وأحداثه

عادية لكن هناك معجبون يتمنون نظرة ومنتج يحلم

بالربح الوفير ارايت أنها معادلة متوازنة جداً ..

كل سنة وأنت طيبة

تحياتي

Tarkieb يقول...

كل سنة وانت طيبة ننزل الفيلم ونقولك..

ابراهيم رزق يقول...

الميزانية دى بالنسبة لهوليود تعتبر ميزانية عادية او فقيرة

فى افلام فى السينما المستقلة الامريكية تقترب من تلك الارقام

عرضك مسلى و وجهة نظرك شجعتنى انى متفرجش على الفيلم
هههههههههههههه

كل سنة و انتى طيبة

غير معرف يقول...

جيت بس اقولك كل سنة و انتى طيبة :)

Ms Venus يقول...

هشوف الفيلم :)

كل سنة وانتى طيبة يا دينا

الاحلام يقول...

كل سنه وانتى بكل صحه وسعاده ورمضان كريم
تحياتى الاحــــــــلام

قلم جاف يقول...

أتفق مع القول بإن الميزانية في ذاتها متواضعة بالنسبة لأفلام هوليودية ، يمكن الرقم كان كبير لما نيجي نقارنه من عشر سنين بالأفلام المصرية .. وفي نفس الوقت شايف إنها مبالغ فيها "سنة صغيرة" بالنسبة لفيلم من النوعية دي..

اقتصاديات السينما في كل حتة في العالم توحشت ، النفقات بترتفع بشكل رهيب ، وحتى هنا كمان..بل إن العدوى وصلت للتليفزيون اللي بقت مسلسلاته "سينمائية سينمائية" .. ولنا في المواطن "اكس" ومن قبله "الجماعة" درس وعظة..

وعليه ، فحتى في مصر ممكن تلاقي أهيف فيلم بيتكلف شيء وشويات..والله أعلم..

الاحلام يقول...

تحياتى الخالصه لكى د دودى تمنياتى بالتالق دائما

غير معرف يقول...

تهنئتي لكم بالشهر المبارك تأخرت بسبب السفر
كل عام وانت بخير د/ دودي
كل عام وانت الي الله أقرب

مودتي وتقديري

blue-wave يقول...

بس الفيلم دا رائع بجد

حَنيّـن نِضال يقول...

تقبلي مروري . . مررت لالقي التحية . . و اسال عن الحال و الاحوال متمنية ان تكوني بخير .. رمضان كريم و اعاده الله عليكي باليمن و البركه ^_^

إرسال تعليق

حلو؟؟ وحش؟؟ طب ساكت ليه ما تقول....