الأربعاء، 23 فبراير، 2011

مع الكتاب الاخضر مش هتقدر تغمض عينيك "الرياضه و المسرح"




الحلقه الثالثه : الرياضه....

و بما ان اى كتاب ملهم لازم يكون له راى فى اى حاجه و كل حاجه - حتى لو مكنتش بتفهم فيها - فوجب وجود رأى فى الرياضه من ذلك القائد الملهم " بتاع كله".....تقرا و نرجع نفصصه سورى اذا كان الفصل ده اطول شويه لكنه مسلى جدا و هتلاقى الصفحات بتجرى بين اديك....










اوبااااا ده الموضوع كبير قوى بقى و يستدعى عده ملاحيظ من العيار الدينانى "نسبه الى دينا"...:

* "ان الرياضه مثل الصلاه والاكل و التدفئه و التهويه , فمن الغباء ان تدخل الجماهير الى مطعم لتتفرج على شخص يأكل او مجموعه تأكل!او نترك الناس شخصا او مجموعه يتمتعون بالتدفئه لاجساهم نيابه عنها"...(من الغباء)  كلمه سخيفه قوى صح؟!! دايما مش من المحبذ انك تستخدم النوع ده الالفاظ عشان ما تنططش على القارئ بتاعك او تحسسه بالدونيه طبعا ده فى حاله لو كنت بتتكلم صح..اما فى حالتنا هذه حيث الاقوال و التشابيهات المغلوطه فمالكش حق تتكلم و تبجح خالص, ايه اللى شبه الرياضه بالاكل و الدفا؟؟ الاكل و الشرب و التهويه و الدفء من الحاجات البيولوجيه اى من الحاجات الجسديه اللى دونها يهلك الانسان و تسوء صحته بينما الرياضه ليست بلحاجه البيولوجيه فيستطيع الانسان ان يكون مشلولا و الا يضع موضع قدم و يعيش طول عمره و تستطيع المرأه التى تتضايق من كشف نفسها امام الرجال فى ممارسه الرياضه ان تقرر عدم مشاركتها و هنا يجب احترام مبدأ الحريات من شخص لشخص و عدم التعامل مع الشعب ككتله واحده...فاذا كان سبب ذلك تشجيع ممارسه الرياضه فارى انه بالغ كثيرا..

* "فكما يحطم عصر الجماهير ادوات احتكار الثروه و السلطه و السلاح..لابد ان يحطم ادوات احتكار النشاط الاجتماعى من رياضه و فروسيه و ما اليها"...فاما ان يمتلك الجميع الثروه بالتساوى فيقتل الطموح فى ان اكون ناجحا و غنيا بمجهودى و يقتل شعورى بالمثال الاعلى و التحدى كفقير للتقدم كغيرى من الاغنياء و طبيعه البشر ان يكون فقراء و اغنياء طبقات فوق طبقات هذى سنه الحياه...و اما تساوى توزيع السلاح فيقتل البشر باختصار بقى..اما توزيع الرياضه بالتساوى فلا اجده سوى فذلكه

* "ان مدرجات الملاعب ستختفى عندما لا يوجد من يجلس عليها. ان الناس العاجزين عن ممارسه ادوار البطوله فى الحياه , و الذين يجهلون التاريخ, و القاصرين عن تصور المستقبل, و غير الجادين فى حياتهم هم الهامشيون الذين يملاون مقاعد المسارح و العروض ليتفرجوا على احداث الحياه و يتعلمون كيف تسير, تماما كالتلاميذ الذين يملاؤن مقاعد المدارس لانهم غير متعلمين..بل اميين فى البدايه"...ارد اقول ايه؟؟اذا كنت بتشتم كل سطرين انا و كل قارئى الكتاب و شعب ليبيا بالكامل , بحركه واحده ضرب المسرح "ابو الفنون" و السينما "الفن السابع" و الرياضات جميعا "كل الاوليمبيات و الكؤؤس" بل و معارض الفنون  كل دول اتضربوا بالجزمه فى لحظه..."ده الالتراس هيقطعوك"..

*س/ هى مش ليبيا عندها منتخب كوره برضه؟؟حتى مره غلبونا و كانت فضيحه يومها؟؟ و الماتشات فيها مشجعيين عادى يعنى..و فاكرين "الاتحاد الليبى" لما لعبوا الاهلى و اتضرب يومها وائل جمعه بطلقه خارطوش فى دماغه ..عااادى يعنى جمهور طبيعى..


* اما موضوع الملاكمه فاتفق معه فى المبدأ و اختلف معه فى الاسلوب ...


الى اللقاء فى الحلقه الرابعه

2 التعليقات:

عماد هلال يقول...

والله انزعجت كثير من تعليقك الأخير على مدونتى .
كيف لك أن تخافى من عرض رأيك ووجهة نظرك.
من التخوين والعار ..لا
كل الحق لك أن تعرضى وجهة نظرك ونناقشها جميعا ولنا الحق أن نختلف معك ونتفق معك ونصل الى الحقيقة فى حرية دون تخوين .
أنا برجوك أن تجنبى موضوع الكتاب الأخضر الأن وتطرحى قضيتك وروجهة نظرك دون خوف من الأخر

د/دودى يقول...

انا مش بتكلم خالص عن المدونه هنا لانى عارفه تفكيركوا بما ان قراء بعض و فى مصف الاصدقاء و عارفه مناقشتنا هتبقى دايما راقيه و مفيده....

خوفى اليومين دول بيتركز على الفيس لان قله الادب وصلت level اخر ...عموما كلامك شجعنى كتير

إرسال تعليق

حلو؟؟ وحش؟؟ طب ساكت ليه ما تقول....