نضارة=طب

بعد خرجت من المكتبة و استعرت كتب لقيت الدنيا حر لدرجة غير طبيعية و انا مستعيرة ٥ كتب منهم تجليات الغيطانى "٨٠٠ صفحة" و كتاب تاريخ الجنون فى العصر الكلاسيكى بتاع ميشيل فوكو و ده يجى ٦٠٠ صفحة غير الكتب التانية كمان ، الكتب تقيلة على ايدى و شنطتى صغيرة و فوق كل ده مفيش مواصلات عايزة تقف

الشيطان البراجوزاى الصغير اللى جوايا حرضنى على انى ارتكتب الخطيئة المالية الكبرى و اوقف تاكسى ابيض مكيف يرحمنى ، بصيت فى الشنطة لقيت المرتب فاضل فيه متين جنية مجمدين و عشرين جنية راكنة على جنب قلت ده نصيبها بقى

-دينا: شبرا الخيمة يا اسطى؟
-السواق: اتفضلى يا بنتى
-دينا: ياااه الحر وحش و الله
-السواق: هو حضرتك دكتورة؟
-دينا: هو باين عليا قوى كده؟!
-السواق: شايلة كتب كتير و بنضارة تبقى اكيد دكتورة
-دينا: "تمتم" مش لازم يعنى و بعدين دى مش كتب طب
-صوت داخلى ١: قولى له لا ، اوعى تقولى انك دكتورة بشرى اسمعى الكلام
-صوت داخلى سلفى: المووووت ، الكدب حرام...هتبررى ايه بكدبك فى الاخرة؟!
-دينا: اه يا حاج دكتورة

بس يا سيدى و قضيت السكة كلها شكاوى من اول مراته اللى جالها جلطة لابنه اللى فى غيبوبة و عايز له مكان فى الرعاية لضغطه اللى بيوطى و هو سايق....و ما نبنى من ده كله الا ان العداد كان ١٤ جنية و ما ادنيش بقية العشرين على اساس انى ضكتورة و وكلاها ولعة و كدهون :(

#ادى_اخره_اللى_يمشى_ورا_السلفيين
#ماله_الكدب_الابيض؟
#انا_دكتورة_و_مرتبى_٢٧٠_جنية_بعد_العلاوة
#نضارة=طب
#فى_جنة_الخلد_ايتها_العشرين_الحبيبة