قواعد القراءة الاربعون

قواعد القراءة الرشيدة الاربعون
Dina Nabill style

1- مش معنى ان الكتاب بيست سيللر انه حلو

2- انك تتعلم تقرا pdf هيفتح لك عالم مختلف تماما و اوسع بكتير , اوعى تقيد روحك بالورق بس

3- الكتاب اللى اغلى من 30 جنية البعد عنه غنيمة

4- اوعى تثق بكاتب يسارى مزهق ابونا بالكلام عن الفقراء و كتابه ب70 جنية

5- القراءة مش رفاهية لا فى الوقت ولا الفلوس

6- اوعى تحط جنبك و انت بتقرا اكل او حلويات , هتتحول لدرفيل فى ظرف سنه ... الفاكهة حل كويس للمعضلة دى

7- شكل القارئ و هو قاعد تحت اباجورة بلمبة صفرا منظر عميق و رومانسى اه , لكن هيحولك لخفاش فى ظرف 6 شهور, النور الابيض هو الحل

8- تقبل من دلوقتى انك هتلبس نضارة , نسبه اللى بيلبسوها من بنى ادم 16% و بمجرد دخولك لعالم الكتب النسبه بتبقى 40%

9-المكتبات العامة صديقتك الصدوقة , دور على اقرب فرع ليك و اشترك

10- على الطلاق مش معنى ان الكتاب بيست سيللر انه حلو

11- اشترك فى نادى كتاب او صالون ثقافى دورى

12- لو مفيش نادى كتاب حواليك انشأ واحد بنفسك

13- القراءة فى المواصلات متعة لا يعلمها الا اصحاب المشاوير الطويلة , بس المشاوير القصيرة فى العاصمة طويلة برضه

14- كتب علاء الاسوانى استثناء من القرايه فى المواصلات , شكلك هيبقى وحش قوى لما الراجل اللى جنبك يقرا معاك

15- ادى ابنك/بنتك/ابن اختك/ابن الجيران كتب من اول ما يعرف يقرا و صعد المستوى بيهم كل كام سنه

16- اقرا كتب للاطفال كتير و احفظ الحواديت لو تعرف , هتنقذك لما تقعد مع طفل لوحدك فى وقت زنقة

17- لو ليك صحاب ملحدين ابقرا اقرا فى الفيزيا شوية على الاقل تفهم هما بيقولوا ايه

18- اقرا لعدوك , يا اما تعرف ان افكاركم مش بعيدة فالعداوة تروح او تعرف تضربه منين ساعه الجد

19- اوعى تثق فى كتاب طباعته شيك و بيتوزع عليك ببلاش او بسعر رمزى

20- الكتب المسموعة كنز ... و لو الانجليزى بتاعك كويس يبقى مغارة على بابا كاملة كمان

21- بلاش قراءة و انت ثانوية عامة محبكش , الوقت قدامك كتير

22- احلى قرايه فى الدنيا ليلة امتحاناتك فى الجامعة

23- القرايه فى الشغل متعه لا يعلمها الا المزوغين

24- خلى لكل كتاب مر عليك ملف ورد تكتب فيه افكارك عنه اول باول

25- لو مكتبتش ريفيو الكتاب خلال 24 ساعه من الانتهاء مش هتكتبه خالص

26- اتعلم انجليزى كويس و ارحم نفسك من قرف المترجمين و ذل دور النشر , اى كتاب باى لغة هتلاقى له ترجمة انجليزى

27- الكتب زى المخدرات فى كثير من الوجوة صعب حصرها

28- قسم ملفاتك الpdf اول باول و اوعى تعمل ملف اسمه "منوعات" و الا هتلاقى الكتب كلها بقت فيه

29- مفيش اى داعى انك تكمل كتاب و انت مخنوق منه هى مش مذاكرة ولا ثانوية عامة الا لو انت من النوع اللى بيجى له قلق نفسى لما بيسيب حاجة فى نصها

30- و رحمة نجيب محفوظ فى قبره مش معنى ان الكتاب بيست سيللر انه حلو

31- لو جالك اختيار خروجه ولا تقعد تقرا , اخرج ...الكتب مستنياك على طول

32- افصل النت عن الجهاز اللى هتقرا عليه والا هتفضل اسبوع فى اول 10 صفحات

33- مش معنى ان الكتاب اخد او اترشح لجائزة انه حلو او انه هيعجبك

34- غلاف الكتب المصرى بيقلل من قيمة الكتاب , ببساطة غلاف كتاب "فى الشعر الجاهلى" اللى قلب التفكير فى مصر عبارة عن ورقه بيضاء عليها اسم طه حسين

35- اوعى ترد على "التراس" المؤلفين الا لو عندك مرارة بصحة جيدة

36- مش معنى ان الكتاب عليه اسم مؤلفك المفضل انه هيعجبك

37- مش معنى انك قريت كتاب و عجبك و قريته تانى انه هيعجبك , غالبا هتحس قد ايه كنت مخدوع الاول

38- اقرا ل امل دنقل على قد ما تقدر

39- اوعى تحس بالخجل من انك تقول انك بتقرا كتاب معين ولا انت محتاج تثبت لحد انك عميق و لا يهمك التريقة على العمق و ايوه فيروز حلوه مع القهوة لو بتقرا ل دوريش

40- مش معنى ان الكتاب بيست سيللر انه وحش :)