الست ١٦

بتعلمنا السيدة التى اذا اضيفت لها اداة التعريف صارت الست ان فى نوعين من السعادة , نوعين مختلفين من البهجة

النوع الاول نابع من الوصال , من الرفيق , من الحبيب ... تقدر تاخد فيها نموذج اجمل اغانى الست القصيرة اجمالا الا وهى "افرح يا قلبى" و دى طقطوقة منمنمة مكتملة الاركان بكلمات المحب الوحيد احمد رامى و لحن اعجازى تتخض لما تعرف انه اتعمل سنه 1937 ! صنعته ايد القصبجى .. كل التطور و الحركة و الجمال اللحنى و التنقل الرشيق بين المقامات اتعمل سنه 37 ! ... الست فى الاغنية دى مش بس بتضرب لنا مثال فى قوة الصوت خاصة لما تفتح صوتها على اخره و تقول لك ك سميع مستسلم للجمال ده مخاطبه قلبها :

"غنى له الحان الغرام واحكي له اسباب الهيام
وافرح يا قلبي بالمرام وابلغ مناك ويا الحبيب"

الست هنا بتمنح قلبها الاذن للفرح , صوتها منطق فى "افرح يا قلبى" و كأن قلبها ده مشفش فرحة قبل كده و اخيرا اتحيت له الفرصة ينطلق ... كأن قلبها كان فى انتظار الاذن ده متحفز

زى ما قلنا ده النوع الاول من السعادة و يتجسد المعنى ده فى تعبير رامى: "اقطف معاه زهر الحياة مدام هواك وافق هواه"

و هو المعنى اللى جه صلاج جاهين بعدها بسنيين حطه فى برواز " احسن ما فيها العشق و المعشقـة" و لجمال لفظ "المعشقة" البرنس ده مجال اخر
**********
و فى النوع التانى تقدر تقول انه اللى حطه ابراهيم عبد المجيد فى تعبير "عتبات البهجة" و فن البهجة ده سر لا يعلمه الا البرنسات ... اى كيف تجعل من نفسك شخص مبتهج بغض النظر عن الاخر

و دى الهادى ادم عملها فى اغدا القاك فى تعبير:

"أنا أحيا في غدي الآن بأحلام اللقاء
فأت، أو لا تأت أو فافعل بقلبي ما تشاء"

الست هنا مبسوطة قبل اللقاء , الست وصلت ان المتعه اللى بقت فيها ممكن تغنيها عن جمال الوصال ذاته

الفكرة تكمن ان القدر يمنحك النوع الاول فى اوقات قليلة و بالتالى وجبك ك برنس تجاه نفسك انك تملا الفراغات دى بالنوع التانى

الست ١٥: يا قلبى اه

الست بتقول: "يا قلبي آه" و بتتنهد طربا... تتنهد الهانم اللى قاعدة فى الصف التالت اعجابا... اتنهد استمتاعا... الست بتكرر الاهة ... تتكرر تنهيدة الهانم ... و تطلع تنهيدتى اعلى ... الست تكرر تالت بلوعة اكبر و بتغيير فى ملامحها .. و كأن مشعل نور فجأة ... تتهند الهانم و كأن مخزون ذكرياتها انفتح فجأة  ... تطلع لى فكرة منسية من دولابى المهمل ... اتفاجئ بصوت تنهيدتى

الست بتقول: "يا قلبي آه ,الحب وراه" ... تغمض الهانم عينها ... اغمض عينى لوهلة .. الست تقول "اشجان و الم , و اندم واتوب" ... الهانم تعمل علامه خمسة و خميسة خوف على الست من الحسد ... ادوب كلام بيرم التونسى فى دماغى ببطئ ... اتخيل كل القصص اللى ممكن تطلع من "اندم و اتوب" دى ... حالة البندول اللى بندخل فيها

الست تقول : "وعلى المكتوب..ما يفدش ندم" ... الهانم تشاور بمنديلها للست ... اقول بينى و بين روحى يا سلام ... احس بنبض فى عروق ايدى ...  و يدخل على الخط الصوت العشوائى فى دماغ يقول لى ان الجملة دى تنفع مثل شعبى او جمله على توكتوك... اهش العشوائية و ارجع للمود

الست تقول بصوت هادى : "ياريت انا اقدر اختار ,ولا كنت اعيش بين جنة ونار ,نهاري ليل وليلي نهار" ... الهانم تبص بعيد و تسرح للحظة ... افكر فى ان الشيخ زكريا بينزل باللحن فى الحته دى بالذات كأنه بيجهز لنا مفاجأة ... تنط فى دماغى كل اللى قريته عن حرية الاختيار و فولتير و روسو و ابن رشد ... اهش الافكار التقدمية ... و ارجع للست

الست تعلى بالصوت و باللحن فجأة : "اهل الهوى وصفوا لي دواه , لقيت دواه زود في اساه" ... الهانم فى الصاله تقول "الله" ... تنطلق منى "الله" ... اتفاجئ مع انى عارفه المفاجأة من سنين ... امدح فى دماغى زكريا احمد ... ادعى ربنا ان الست تعيد الحته دى تانى عشان اتفاجئ تانى

افتكر كلام ناقد عن "هو صحيح الهوى غلاب" لما قال ان الاغنية دى "طرب يصل إلى حدود الفجيعة" .... احمد ربنا على نعمه صوت الست و دماغ زكريا احمد و صفاء بيرم و اللى سجل الاغنية و اللى حفظ التسجيل و الهانم اللى اتيحت لها الظروف انها تحضر

الست ١٤

لما تجى تتكلم عن "الحب من طرف واحد" تلاقى قدامك طريقين ، طريق السيدة التى اذا اضيفت لها ال صارت الست ام كلثوم و طريق السيدة التى اذا تذكرنا القمر صارت فيروز

فيروز فى كلمات الواضح القاطع زياد عمل فى اغنيه ٤ دقايق فى اجواء لا تقل غرابه عن روايات "ميلان كونديرا"  زى الهوية  و الجهل و المزحة و غراميات مرحة ... بكلمات ساخرة واضحة قاطعه تستنكر فيروز حالة الاضطراب و التذبذب و تقول " شو هالمزحه هي؟!" مع اضافه صوتيه لعشرات علامات الاستفهام و التعجب .... و تزيد جارة القمر فى استنكارها و تتسأل :

"ما بعرف كيف بتحس و ما بتعرف شو عم بتحس؟!
ما بعرف كيف بتحب و ما بتعرف اذا عم بتحب؟! "

فيروز هنا قاطعة ... عايزة اعتراف نهائى يقطع فترات الشك المشهور بيها حالات الحب من طرف واحد ، كمان عزيزتى و رافعه الهم من على قلبى ميهمهاش الحب فى حد ذاته و مفيش مشكلة مع انهاء الموقف كله بس بحسم....و بعدين تطلق رصاصة الرحمه على العلاقة كلها بنداء "حبنى بس حبنى"
                           **************************
طريق اخر اكثر التواء و صعوبه و متاعب و كثير من اللف و الدوران تاخد ام كلثوم بكلمات احمد رامى فى "حيرت قلبى معاك"

احمد رامى المحب الولهان اللى كل البشر فى المعمورة يعرفوا انه بيحب ام كلثوم يصب كل المشاعر فى كلمات اجمل ما اتغنى عن الحب من طرف واحد

بيعبر عن اهم علامات النوع المنيل ده من الحب الا و هو "التذبذب" بجملة:

"خاصمتك بيني وبين روحي.. وصالحتك وخاصمتك تاني"

فى اكثر مواقف المحب الوحيد بؤسا ، الست قاعدة مع نفسها بتقعد الصلح و الخصام ... يوم تاخد قرار بقطع خيط العلاقة البائسة دى و يوم ترجع فى قرارها لا لشئ الا اضطرابها هى فى انفصال تام عن الطرف التانى فى العلاقة اصلا

و تأمل معى رحمك و رحمنى الله احمد رامى معبرا عن ملمح تانى مهم فى النوع ده من العلاقات ... لما المحب الوحيد بيطالب الطرف التانى بالتقاط الاشارات

"وأقول ماشافشي الحيرة.. على لما با سلم؟!
ولاشافش يوم الشوق.. في عيني راح يتكلم؟! "

اغنية كتبها محب وحيد للست اللى بكل قسوة الدنيا بتغنيها فى احد اجمل الحان السنباطى ، الامر اللى بتطلب بالضرورة مستمع اكثر قسوة بياخد ده كله و يتمتع بيه ...فى حالة لم تتكرر الا فى اعجاز اخر اسماه الجميع "انت الحب "

الست 14

بعد الشغل رحت المقلة اشترى لب و حمص , لقيت صاحب المقلة نفسه كان مريض عندى و طبعا بعد ما قعد يشكرنى و انا اطمنت ان الدوا شغال و ان محصلش اثار جانبيه و قعدت اتحايل عليه عشان ياخد الفلوس , القصه مش هنا بقى

القصه ان الراجل كان مشغل "بعيد عنك" و انا الاغنيه دى عندى حاجه كده وضع خاص تتحط فى فترينه و تتعرض فى متحف الفن , و صحت فيا الست الاغنية دى يااه يا ست , يا سلام على الست و هى قويه لما تنزل و تفتح قلبها و تبين اللى عاده مستخبى و هى بتقول:

"عيون كانت بتحسدني على حبي .. ودلوقتي بتبكي عليا من غلبي"

و بعد ما اخدت اللب استغليت جزء فاضى من الشارع و قعدت ادندن , وقفت فى نص السكه انهج , الاغنية صعبه قوى و انا مش بنظم نفسى مع المشى بسرعه , امال الست بتغنيها كانها حاجه بسيطة

#الست

الست ١٣

و كخطوة منى لتقليل معدلات الطلاق انا بقترح ان العريس و العروسة و هما بيكتبوا الكتاب و بيقدموا الورق التقليدى بتاع شهادة الميلاد و شهادة الخلو من الامراض يكون معاها شهادة ان العروسين -بذات العريس لا مؤاخدة يعنى- انه سمع و وعى اغنية "ليلى و نهارى" بصوت الست ام كلثوم

و ممكن عشان نتأكد من انها مش شهادة منظر و انها حاجة من عينة i agree terms of service اللى بنوافق عليها من غير ما نبص يبقى ليها امتحان صغير , حاجة من نوعية اسئلة:

س1: الحب هو...؟ اكمل مما حفظت و وضح فى ظل فهمك للاغنية

س2: "من اللي قال عزك فى ذل خضوعي؟" ... وضح نوع الاسلوب البلاغى و الغرض الفنى منه مع بيان رأيك

س3:"الهجر اهون من عذابي في قربك" اذكر وسائل تقليل معدلات الطلاق فى ظل فهمك للاغنية
******************
هو صحيح الاغنية هينزل لها مذكرات ليلة الامتحان و س و ج و مش بعيد دروس خصوصية تلم الاغنية بسرعه بس اهو يمكن حد يغلط و يسمعها و يفهمها , و اللى يفهم الاغنية دى و "تخيش" فى دماغه عمره ما يبقى زوج حيوان

#و_هو_وحده_شوية؟!
#الحب_هو_الود_و_الحنية_لا_مؤاخذة_يعنى
#Re_posting

الست ١٢

رغم كل حبى و تقدير للسيدتين اللاتى اذا اضيفت للاولى منهم ال صارت الست ام كلثوم و الثانية التى ان تذكرنا القمر صارت فيروز...رغم ده كله الا انهم قصروا فى حق السناجل و العزاب بشكل كبير ، و كل تمثيلهم ليهم كانت البنت اللى نطت من الشباك عشان تتجوز زى ما فيروز عبرت عنها فى فيلم "بياع الخواتم"

و ده يحتم علينا نطلع من اغانيهم و نبحث لنا عن مخرج فى اغانى حبايبنا الاخريين و مش هتلاقى وقتها غير عبد الحليم و هو يشدو (و اندم لو حبيت و قسيت...و اندم لو عمرى ما حبيت) و هى الحكمة الخالدة فى عالم السناجل و تعبير عن الخوف الاهم و الاخطر خاصة ان الطريق مسدود فى النهاية

او تسلك طريق اكثر برنسه -اى اتقان علم ان تكون برنسا- و تسمع معايا للرايقة عفاف راضى تغنى كلمات الرائع مرسى جميل عزيز و الحان المتلون منير مراد فى لحن يخدعك فى البداية و يوحى ببصمات بليغ حمدى و هى بتقول:

ابعد يا حب بلاش تحايل فيا
لياليا حلوه مره اهى لياليا
هى صحيحي مالهاش لالون ولامعنى
ولا حاجه تسعدنا ولا توجعنا
لكن دى راحة البال كفايه عليا
وهى راحة البال يا عينى شويه؟!

فى تلخيص مبهر لمشكلة السنجل يجمع برنس الليالى مرسى جميل عزيز صاحب الجملة اللى ام كلثوم قالت عنها انها اجمل جمله عامية غنتها الا و هى (ساتر النسيان نزلت بقالها زمان)

التناقض الممتع بين لهجة التعالى فى تملك الليالى و بين الحزن المكتوم لما يعرف ان الليالى خاوية ، فاضية ، مفهاش حاجة حلوة ولا حتى وحشة.....و فى النهاية اطلاق نوع من السعادة الهادية و استفهام اخير  برنس فى حد ذاته

و يقابل ذلك سكوت تام من ناحية ام كلثوم ما اذكرش لها انها كانت سنجل ابدا مع انها قضت معظم حياتها الفعليه كده

الست ١١

تظل احد جملى المفضلة فى اغانى الست و هى بتقول فى نهاية كل كوبلية:
(ازاي يا ترى...اهو ده اللي جرى
وانا ما اعرفش...ما اعرفش انا)

الست -ربنا يخليها ليا- بتوصل بكلمات بيرم فى الحته دى عن حالة التوهان الكاملة المتعلقة بالعلاقات و مشاكلها ، حالة توهان صريحة و واضحة و معترفه بجهلها و ازاى الامور تسارعت و وصلت للى وصلت له...لا الست تعرف اتمنت ازاى بالافراح و رجعت كلها جراح ، و لا تعرف النظرة المستهان بيها طلع فيها كل الوعود دى و الصبر على كل اللى جاى ، ولا حتى تعرف ازاى كل ما تقول حرمت خلاص تلاقى روحها تتمنى كمان ، و لا هى مدركة سبب ان دواه زود فى اساه

She is absolutely clueless...absolutely

و فيها اختلاف مع شخصية الست الواثقة المتحكمة فى الاغانى التانية ...ولا هى بتحط قواعد ثابته و واضحة و صريحة للعلاقة زى ما اعلنت مثلا ان (مفيش فى الدنيا غرام بيعيش كده على الاوهام)  ...ابدا الست فى "هو صحيح الهوى غلاب"  مش فاهمة قواعد اللعبة اصلا و دى اقرب صورة حقيقيه للعلاقات البشرية عموما مش الحب بس

عارف...فى الجنه او اليوتوييا ايهما اقرب ، هيبقى فى مؤشر على الانسان كده فيه اللى حاسس بيه او عايز يقوله و مش هنفضل نجرى ورا بعض و نلمح تانى و ندوخ و نتلخبط....و لحد ما ده يحصل تفضل قواعد "ازاى يا ترى...اهو ده اللى جرى" هى اللى ماشية

#كمان_يا_ست

الست ١٠

احيانا بيكون صعب انك تتقبل اغانى الست عن نظرية "الحب الاول" لانها مهما كان معظم اللى وصلنا منها كانت كبيرة فى السن , كانت "الست" و صعب انك تبلع انها طالبة فى ثانوى تجارى بتحب الواد تباع الميكروباص اللى بتروح بيه المدرسة

لكن الست قدرت توصل للاحساس العبقرى ده فى نوعين مختلفين من الاغانى , الاول هو "سيرة الحب" و هى اعجاز منمنم عن جمال الحب الاول و المقاومة اللى بسرعه بتنهار و تفتح الباب .. و هى الاغنية المفضلة لبعض الناس

انا بفضل النوع التانى , و اسمع معايا اخ الفن و الموسيقى الست و هى بتقول بالحان السنباطى:

من بريق الوجد فى عينيك اشعلت حنينى
وعلى دربك أنًىَ رحُت أرسلت عيونى
الرؤى حولى غامت بين شكي ويقينِى
والمنى ترقص فى قلبى على لحن شجونىِ

رأيى ان مش بس اللون ده انسب للست , لأ كمان هى الوحيدة فى الكون -حرفيا- اللى بتقدر توصل المعانى التقيلة دى للمستمع اللى بكتير من الاعادة و روقان اللحن و مش بعيد شوية رشوى من الست من ال"أااه" تخليك تندمج فى لحظات , و تتدخل فى مود بريق الوجد فى عنين بتولع فيك شرارة منسية , و لحظات الشك و اليقين و الخوف اللى  بتسبق الاستسلام اللى جاى جاى , و وعد و وعود الامانى اللى بتغريك تسلم سلاحك و انت مبسوط

استشف الوجد في صوتك  آهات دفينة
تتوارى بين أنفاسك كي لا استبينه
لست أدرى أهو الحب  الذي خفت شجونه
أم تخوفت من اللوم  فآثرت السكينة

سمعت معايا "استشف" دى؟ ما اظنش ان العامية فيها لفظ يقوم بمقام "أستشف" دى خالص...كلمة بتطلع ان الناظر و المتابع له دور فى اكتشاف الوجد فى الصوت , دا انت ك حبيب بتدور فى عنين محبوبك على الوجد فى صوته فى اهاته ...و تقع فى حيره اذا دا كان حب مكسوف يظهر ولا وهم ولا خوف من العيون و اللوم

و تفضل وراك الست لحد ما تنسيك اللى كنت بتقراه , و اللى كنت بتكتبه , و تتمزج زيى لحد ما النعناع يبرد من غير ما تشربه , و تنسى كمان ان الاغنية كانت سنه 1971 يعنى ست الستات ام كلثوم كان عندها 73 سنه و هى بتغنى اللحن العبقرى ده

و انك شاب تحت ال30 و بتنهج من السلم <3

الست ٩

و فى كل حفلات الست صراع صامت بين طرفين , الجمهور و الفرقة الموسيقية ... الست تلعلع فى الكوبليه تقوم الفرقة تعزف موسقى الكوبلية التانى و هنا الجمهور يبدأ يصقف , يحصل اختلاط لحظى بين الموسيقى و ضجيج الجمهور ... الفرقة مصرة على عزف موسيقى الكوبلية الجديد و الايدى تكرر صوت التصفيق مطالبه بالاعادة .. لحد ما الست تحسم الموقف و تنحاز لاحد الطرفين ... عادة الجمهور

#كمان_يا_ست

الست ٨

ستنا فيروز جابت للراجل القديم و الجديد فى اغنية (فى أمل) فى 4 دقايق و ختمت الامر بجملة اسطورية  "حبيبي ... كرمالي تنيناتنا بنعرف شو صار"

الست ام كلثوم بقى فرشت الموضوع فى تسجيل نادر وصل 110 دقيقة كاملة , عن ايه اللى غيروا و غيرها و تأثير القسوة اللولبى على القلب الحزين مع كثير من الذل فيه و الطلب منه انه يحط فى عينه حصوة ملح و يسأل روحه

انهى احلى؟ مش فارقة...الاهم ان لما الراجل يسأل واحدة ست مالك تقدر تقف قدامك بثقة و تقوله تحب تسمع النسخة الكاملة ولا المختصرة يا روح امك؟

أم كلثوم: 1
فيروز: 1
اى راجل: 0

الست ٧

و اسمع معايا وفقك الله اخ الموسيقى و الفن للست ام كلثوم و هى بتقول فى اسأل روحك:

كنت زمان بلاقيك بحناني...بحر محبة و بر أمان
كنت بحس ان انت زماني...يومي وبكره وبعده كمان
كنت بشوفك بعيون حبي...وانت بعيد أو وانت بقربي
أقرب من بسمتي لشفايفي...أقرب من إحساسي لقلبي
بعد الود اللي راعيته لك...بعد الحب اللي وهبته لك
بعد العمر اللي انا عشته لك...فيه إيه تاني أقدمهولك

قول سيبك من انها -بكلمات عبد الوهاب محمد- بتقول له هو كان يمثل لها ايه و ليه غدره بيها ساب فيها أثر عشان مكنتش متوقعه الضربة ، و سيبك من اشكالية "كنت بشوفك بعيون حبى" دى اللى بتخلى الحبيب/الحبيية شخص مختلف متألق خالى من العيوب و حواليه هالة من النور ، و سيبك حتى من رقة تعبير زى اقرب من ضحكتى لشفايفى البرنس ده

بص معايا على تعبير (بعد الود) اللى بياخده الموجى كنقطة ارتكاز لحنية ، (بعد الود) اللى تحس انها بتعدى مرحلة ... حاجة اقرب لمفهوم ما بعد الحداثة ، ما وراء العقل .... تحس ان الست -ربنا يخليها ليا و فى ذلك قول اخر- بتتجاوز حدث ، بتدخل فى مرحلة مختلفة .... (بعد الود) دى المرحلة الشهيرة اللى الستات بتقص فيها شعرها

الست ٦

طيب نقدر نقول ان الست و هى بتقول "وإلام الأسر، والدنيا لدي؟! " بتلخص مش بس علاقة الحب ست/راجل , لأ تقريبا بتلخص علاقات البشر ببعض كلهم

#يا_سلام_يا_ست

الست ٥

خلونا كمان نتفق ان الست و هى بتقول (صالحت بيك ايامي...سامحت بيك الزمن...نستني بيك آلامي..ونسيت معاك الشجن) بتعمل حاجات فى الواحد حاجات غريبه , حكاية اننا "نسامح" الزمن براجل/ست دى صعبه قوى يا سومة ما انتى عارفه

الست ٤

خلينا نتوقف كمان عند سومة و هى بتقول ( عيون كانت بتحسدني على حبك و دلوقتى بتبكي عليا من غلبي)  و هى بتوصفلك ان العذاب مش بس فى تعبها من تعودها عليه و حياتها اللى باظت من غيره ، لكن لما يتضاف لمعادلة الحبيب/الحبيبة عنصر الناس ... و عيون الناس

الست ٣

و تجى الست تثير فيك كل الافكار الوجودية فى وشك كده و تغنى (ليه نضيع عمرنا هجر و خصام واحنا نقدر نخلق الدنيا الجميلة؟ ) تفضل تلح عليك و تطول فى حته "ليييه" دى و انت واقف معندكش تفسير انك بتضيع حياتك ... و فى الأخر تعترف انها عندها حق

ملحوظة: للى قرا فى تاريخ المصريين شوية يعرف قيمة لقب "الست" اللى منحوه ل سومه...يعرف انه اهم بكتير من لقب " كوكب الشرق " ده

الست ٢

عزيزى ابراهيم محلب , تحية طيبة و بعد

بخصوص تغيير الساعه , اطمن مش هاشتمك انا عارفه انك اتعودت على التهزيق على قرارتك من النوع ده

الجواب اللى مش هيوصلك ده مكتوب مخصوص شكر ليك على تأخير الساعه , اه و النيعمة

اللى حصل يا حضرة معالى رئيس وزارء المحروسه ان روتانا زمان و اذاعه الاغانى الساعه 11 بيجيبوا اغنية للست اللى مزاجى طالب معايا اغانيها مؤخرا , و كنت طول الوقت بفاضل هاسمع دى ولا دى

لحد ما دولتكم المصنونه اخرت الساعه و بما ان روتانا زمان مش مصريه و الاذاعه مصريه فاللى حصل ان الساعه 11 بقت بتجى مرتين فى اليوم , الاولى الساعه 10 لما بتفرج عالست بعنيا و استنى فستانها و حركة رجلها على اللحن , و التانية الساعه 11 لما بقلب عالراديو و اسمعها بودنى و معاها مذيع واقع فى غرامها بيقدم لها نص ساعه

عزيزى محلب, هكذا احتمل العمر نعيما و عذابا

مرسل لسيادتكم من دينا الميزو دكتوراه فى النفخ و مسك الكلبسات , و تفضلوا بفائق الاحترام

الست ١

ام كلثوم: "تشدو" تعال طفي النار واشرب من النبع الجاري... يا جنة العطشان للي ضناه السفر ومالت الأغصان عليه وحن الشجر ظلك رعاني... وهناني وهون الوجد عليٍِ

ماما: ايه الوجد ده يا دينا؟

دينا: الشعور او الاحساس باين

ماما: اهو انتى كده تموتى فى الفتى متقولى ما تعرفيش عادى

دينا: و هنروح بعيد ليه؟ لا خاب من استشار و اهو مولانا جوجل يحسم الامر

ماما: ها طلعت يعنى ايه؟

دينا: اوبا ده الموضوع طلع كبير ، طلع ليها معنى لغوى و معنى صوفى ده غير ان واحد مقتنع انه اسم جن و عفاريت و ان اللى اسمها "وجد" هيجى لها امراض الدنيا كلها

ماما: خلينا فى اللغوى

دينا: بيقولك يا ستى ، الوَجد –بمعنى انفعال القلب- مصدر: وَجَدَ بالشيء وجدا، وهو بخلاف "الوجود" فإنه مصدر وجد الشيء وجودًا ووجدانًا ...و الوجد اسم معناه الشغف و يقال ارقه الوجد

ماما: طيب خلاص

دينا: طيب نشوف المعنى الصوفى بالمرة ، بيقولك : اصطلاحًا: يختلف الصوفية في بيان معنى "الوجد" وحقيقته، فمنهم من يراه مستعصيًا على التعريف لأن العبارة لا تقع عليه، وكأنه من باب الوجدانيات القلبية التي يصعب تصوّرها وتصويرها، ومنهم من عرّفه بعبارات تباينت ألفاظها ومعانيها، مثل تعريفه بأنه "ما صادف القلب من فزع أو غم أو رؤية معنى من أحوال الآخرة"، أو هو: "لهب يتأجج من شهود عارض القلق"، أو: "ما يصادف القلب ويرد عليه، بلا تكلف وتصنع.. إلخ

للوجد مراتب ثلاث: أولها: التواجد، وهو استدعاء الوجد بالذكر أو الفكر، وهو أضعف المراتب، لأنه مكتسب، وهو للمبتدئين في السلوك، ويختلف الشيوخ في أمر هذه المرتبة، فمنهم من يمنعها لما فيها من التصنع وعدم الصدق، ومنهم من يجيزها لما فيها من التعرض للأحوال الشريفة، والمختار عندهم: صحة التواجد مطلقًا، استنادًا للحديث الشريف: "ابكوا، فإن لم تبكوا فتباكوا" (أخرجه ابن ماجة في الزهد).. والمرتبة الثانية: مرتبة "الوجد"، وهو حصول الشعور الذي استدعاه السالك بتواجده، فإذا راوحه هذا الشعور، أو غلب عليه سمّى "وجدا". فإذا استمر وتوالى على القلب فهو "الوجود"، وهو: المرتبة العليا والأخيرة، وهو ذروة مقام الإحسان.

والوجد ثمرة للواردات الإلهية، التي هي بدورها ثمرة الأوراد والأذكار، ولذا كانت الأوراد شرطًا في حصول الوجد، ومن أقوالهم المأثورة: "من ولا ورد له بظاهرة لا وجد له في باطنه".

ماما: مكنتش كلمة يا دينا ، خلصنا

دينا: انا هاعتزل من البيت ده ، محدش مقدر مواهبى العميقة فى البحث على جوجل
ّ

الشكوى المدارية

البوست ده مستهلك سيكا و بيحاول  -على قد مقدره كاتبه- ان يبعد عن الابتذال

محمد منير احلى واحد فى الكون "يقفش" احساس و حالة بعينها و يكدسها فى جمل قصيرة كأنها قصة قصيرة فى حد ذاتها

و مثال على كده احد الاغانى المفضلة ليا : برة الشبابيك

آخر مره اما سبتك
كتمت الشكوة ليه
مش كان احسن حاسبتك
وعرفت القصة ايه
لكن محسبتكيش
وقلتلك لية مافيش
كأنك يا حبيبتي امرك مايهمنيش
انا خايف من ده فيا
من الشكوة المدارية
بالذات في الليلة دية

شوف كده يا مولانا و استمخ معايا بالحته دى ، الواحد منا يفضل يقولك انا كول و اللى فى قلبى على لسانى و بتاع و كلام نعناع و لما ازعل من حد اروح اقوله فى وشه ولا يهمنى ....و الكبلز الجداد يوعدوا بعض اللى مضايق من حاجة يقول و بلاش لف

بس منير بيقفش -و اسمح لى اقول منير   حاف- بداية الصدع اللى بيحصل فى الاتفاقات ، اول ما تلاقى روحك زعلت منه و مش عارف تقول له ... تتكسر الحرارة و يتحط بدالها تجلد و جمل غير منطوقة ، حاجة كدة زى رأيى سارامجو ان مفيش حاجة اسمها "صمت بليغ" فى جمل مبتورة مبتسرة اتقالت بالفعل بس ما نطقهاش اللسان ، او زى نوفيلا ميلان كونديرا "لعبة اتوستوب" لما كل التغييرات فى الابطال مكبوته و السطح هادى

*********

و على الرغم من انى بحب محمد منير -و اسمح لى اقول له منير حاف كده- بس الراجل ظلمنا كبنات الصراحة .... المعانى حلوة قوووى بس رجالى بشنبات ، حاجة زى

الفرصه بنت جميله راكبه عجله ببدال
شعرها بيطير قدامها بيدارى علينا جمالها
العاقل لو يلحقها يتبدل بيه الحال الفرصه
لو ننده مبتسمعش اصلها بتسد ودنها
لو راحت مبترجعش دى شقيه وليها دللها

التعبير العبقرى الرائع ابن العشرتلاف و خمسماية ده مش عارفه اقوله ، هو انا يا ربى ماليش نفس احلم بفرصه انا كمان؟! بس بنت و شعر و بدال ازاى يا عم منير؟ اغنى الاغنية دى ازاى ما غير ما الناس اللى دماغها شمال تظن بيا الظنون على كبر؟!

طنط سيمون دى بفوار عندها حق احنا "الجنس الاخر" للاسف ، كل حاجة لازم تتعمل لنا مخصوص من محلات المقاسات المميزة :(