رفــايّـــع: لوحات و كده يعنى

‏إظهار الرسائل ذات التسميات لوحات و كده يعنى. إظهار كافة الرسائل

الأحد، 8 سبتمبر 2013

حوليات70: البنت اللى بتفكر

النهاردة كنت عالفيس عادى بقلب فى لوحات قديمة...و فى نص كل ده طلعت لى اللوحة دى

هي ليه أثرت فيا قوى كده؟ انا بقالى نص ساعه بحملق فى تعبير وشها...و بعدين ارجع ابص على تفاصيل الورد..و ضل السلسلة على رقبتها...و فى ملمس القماش على جسما

سمعت انها اتباعت ب 85 الف دولار...و النعمه تستاهل....انا من فرط اعجابى باللوحة بفكر اطبعها و اعلقها فى اوضتى

مشمعنى الصورة دى؟؟ مع انى شفت صور كتتتتتتير قوى النهاردة...مش عارفة

فى حاجه "ما" فى الصورة دى ساحرة...شدتنى و خلتنى اتمنى اكتب كتاب فى يوم من الايام يكون ده غلافها

******************
اللوحة اسمها "فكر" من رسم فنان البلجيكي جون فرانسوا بورتال
1818 - 1895

الخميس، 21 أبريل 2011

عشاق النهار

فى مصر اللى بيحبوا الليل كتييير , برضه النيل و القاهره عموما فى الليل ليها سحرها لكن بالليل تلاقى نفسك بتشوف الاماكن اكتر من الناس و بما انى من عشاق النهار حيث الوجه و الهموم و التعبيرات بحب جدا الاغنيه دى...معرفش ايه اللى فكرنى بيها يمكن اللى بحسه اليومين دول ....الاغنيه كلمات : احمد قدري و غناء و الحان : مأمون المليجي عن لوحات صلاح عنانى

في الشوارع
شيء غريب بيناديني

شيء بيفرض جوه مني
حزن عيني

شيء ياخدني يشدني
يرمي حزني ع الشوارع

اترسم كل الوشوش
تتقسم بينا المواجع
ابقى واحد منهم
جرحي هوّه جرحهم
والحقيقة متوهاني

ف الشوارع
حلم عاشق للنهار
شفته ف عيون طيبين
حلم مطحون بالمرار
يطرح غناوي المجروحين
حلم مطحون بالمرار
يطرح غناوي المحرومين
ولامته هنعيش في انتظار
وعلينا بتمر السنين

اترسم كل الوشوش
تنقسم بينا المواجع
ابقى واحد منهم
جرحي هوه جرحهم
والحقيقة متوهاني

ف الشوارع
ليه بنسأل ميت سؤال
و الطريق نمشيه و تاني نرجعه
كل حاجه فوق حدود الاحتمال
كل واحد فينا جرحه بيوجعه

اترسم كل الوشوش
تتقسم بينّا المواجع
ابقى واحد منّهم
جرحي هوه جرّحهم
والحقيقة متوّهاني

الثلاثاء، 14 ديسمبر 2010

الفن الاسلامى "2"

استكمالا للفن الاسلامى و جمال المنمنمات ... اقدم الجزء التانى من الصور اللى للاسف متوفره بصوره مبدئيه بالابيض و الاسود الا انها موجوده فى كتب د/ ثروت عكاشه صعب المنال من حيث اقتناء كتبه اللهم ما الا المختصين و لكن اوعدكم بالبحث اعمق و لما تتوفر الخامات الاجود ان اضعها بين يديكم فى تدوينات لاحقه ان شاء الله:

دعونى اسجل اعجابى باللوحه اللى فوق دى بذات ...بجد عجبانى

دعونى اسجل استغرابى من صوره مقامات الحريرى السابقه ...شبه الفن القبطى جدا؟؟؟

د/دودى
مدونه رفايع..مجرد رفايع

الأحد، 12 ديسمبر 2010

الفن الاسلامى...."1"

كلنا وقعنا فى غرام اللوحات العالميه لبراعتها و جمالها احيانا كثيره و لفكره عقده الخواجه احيانا اخرى ....او يمكن لاننا - او على الاقل معظمنا- مادورش على اللوحات القديمه و فكره المنمنات بل و شكل العملات فى البلاد الاسلاميه و شوفنا مذاقها و نكهتها المميزه ...و لقد اقدم لكم على تدوينات مسلسله لوحات الفن الاسلام وهى مجتزئه من فكره صحيفه الكتاب اللى كانت بتقدم شعر ابوتمام و صاحبتها اللوحات لتضعك فى مناخ عربى اسلامى متكامل عشان المود يكمل....

لاحظ : ان معظم اللوحات دى مسروقه كالعاده فى متاحف اوروبا العامره....

الأحد، 3 أكتوبر 2010

اعجب!!

احلى لوحات الفنان العالمى "بيكاسو"

اعجب ما تعجب كل شئ له سبب..

ولو الكلام كان فضة والسكوت دهب..

والدموع لهب والخشوع أدب,

يحق لك تعجب.. وما عليك عتب..

وعجبي

السبت، 2 أكتوبر 2010

يعنى ايه .."3"

تعليق جه على الجزء التانى من سلسله يعنى ايه؟؟ شغل بالى برضه كان التعليق عن فاروق حسنى و لوحاته الغريبه اللى قررت اركز معاه للحظات ثم اعلنها صراحه على الملاء و على النت كله انى مش فهماها.....

فارق حسنى

بعيدا عن انه وزير الثقافه بقاله بتاع 100 سنه و قاعد على قلبنا وكـأن مصر مفهاش مثقفين غيره الا انه رسام رسام و لوحاته مشهوره على نطاق دولى و معروقه و بالتالى بقى زلام اضافته لقائمه " يعنى ايه؟؟"

مش عارفه ليه عندى احساس ان اللوحات دى رسمها عيل صغير؟؟!!...صحيح مش بحب اتريق على فن ومجهود الاخريين لكن بكره انى ادعى حاجه مش فيا و بصراحه قدرتى على فهم هذا الفن الراقى ناقصه فعلا......الحاجه الوحيده اللى عجبتنى قوى هو امضاء فاروق حسنى حته امضا بتاعه وزير فعلا....

الجمعة، 1 أكتوبر 2010

يعنى ايه؟؟ "2"

استمرارا لمسلسل خيبه الامل راكبه جمل اللى بعيشها فى محاوله بائسه لفهم لوحات الفن الحديث اقدم لكم دفعه جديده من اللوحات والفنانين على امل انى لما ابص ليهم كذا مره استطيع انى القط الفكره فى اللوحات .....

الرسام هو "الان دافى " استكولندى الجنسيه