سيدة مسيحية كانت قاعدة جنبى فى الميكروباص .... صليبها الدهبى الصغير لفت انتباهى .... اللى عجبنى فيه انه بيلمع .... بيلمع زى ما يكون لسه جديد .... او زى ما تكون بتلمعه هى يوميا... بتتكلم فى التليفون و هى متعصبة... واضح من كلامها انها بتتخانق ... فى وسط الكلام قالت للى بتكلمه: انا هاجى افضحه و افرج عليه امة لا اله الا الله محمد رسول الله.... وقفت فى كلامها فجأة ... حسيت انها استغربت من كلامها ... ضحكت ... هديت و صالحت اللى بتكلمه
انا بحب تركيبة مصر و المصريين
طيب فى تلك اللحظة النادرة من الروقان التدوين فيها ضرورة حتمية... قاعدة على اللاب توب بقرا رواية لكاتب نرويجى و باكل اندومى اصلها اسيوى و بسمع فى الراديو محرم فؤاد
و بالتالى فقليل من الشكر للكاتب اللى كتب الرواية الرايقة دى و للى ترجمها و للى طبعها و للى رفعها لنا عالنت نقراها ببلاش و تنوسنا فى ليالينا الطويلة ...و الشكر موصول للى زرع القمح و للى طحنه و للى اخترع النودلز و للى عملها بجنية و نص عشان تبقى تسد جوعنا فى الليل .... و لاذاعه الاغانى اللى بتذيع اغانى حلوة ببلاش منها تسجل لنا ناس ماتوا عمرنا ما كنا هنسمعهم و منها نسمعها فى روقانا... و لبليغ حمدى انه بيعمل الحان حلوة عموما و ل محرم فؤاد بالذات .. و لابويا اللى علمنى قرايه الكلام و لامى انها حببتنى فى الكتب ...و للقدر اللى ساب لى 3 ساعات رايقة اعمل فيهم حاجات مفهاش قلق ... و اخيرا و اولا و قبل و بعد كل شئ , الحمد لله
جورج وسوف: "يغنى" و انا و انا و انا ... انا قاعد اعد نجوم الضهر
"جرس الباب يصدر رنين عالى"
دينا: قال يا قاعدين يكفيكوا شر الجايين
عمى السلفى: "عابسا" السلام عليكم
صوت داخلى ١: احيييه ليكون عرف انى بكتب عنه فى الفيس
عمى السلفى: و بعدين بقى فى السيسى اللى مش نافع فى حاجة ده
صوت داخلى ٢: قشطااات يبقى معرفش ...بس ما شاء الله بيشتم فى السيسى قبل ما يسلم علينا حتى
ماما: اهلا اهلا ، شاى يا دينا .... اقفلى المزيكا
عمى السلفى: بيقولوا ان ابراج الكهربا بتاعه مدينة الفجر الاعلامى ...و المذيع الشامل احمد نصر قعد يضحك عليه
ماما: اهو عشان تستريحوا
عمى السلفى: احنا هنسريح اه بس المخابرات هى اللى عملتها طبعا
دينا: ها؟! طب ليه و ازاى و بكام يعنى؟...و بعدين ايه المذيع الشامل ده؟ ده زى شهريان بيغنى و بيرقص و بيذيع يعنى؟
عمى السلفى: ما هو عبد الناصر كان بيعمل حاجات من دى ... الكرسى واسع عليه
ماما: بقى المخابرات هى اللى ضلمت الاعلام؟ عارف احنا بنتقرب لربنا اننا نطلع عينيكوا
عمى السلفى: ما هم الستات كده ، سيدنا على كان بيقول انه لو كلم عالم يهزمه و لو كلم جاهل يغلبه
ماما: يعنى انا جاهلة؟!
عمى السلفى: ده سيدنا على اللى بيقول ، اعترضوا على الدين بقى ... المفروض نبيل يبقى له كلام
ماما: و ايه علاقة جوزى برأيى فى السياسة و بافكارى اصلا؟! و ايه علاقة اى حد بافكارى و معتقداتى؟!
دينا: احم الشاى يا جماعه ، استهدوا بالله
عمى السلفى: ايه ده الشاى ده تقيل؟
ماما: كويس...اشربه عشان ضغطك يعلى شوية
عمى السلفى: و السيسى عايز يعمل لهم كاتدرائية يعبدوا فيها الشيطان زى ما عمل عبد الناصر
دينا: اشرب يا عمى الشاى احسن ما اجيب لك مريندا
كان بودى اقولكم ان مفيش امل ولا فى انسانية فاضلة فى العالم و فى البلد ... بس اللى شفته النهاردة للاسف مش كده ....شفت مستشفى حكومى بتاخد ست من شرق اسيا لا معاها فلوس ولا معاها باسبور و فى ظرف٣ ساعات تكون اتكشف عليها و اتحجزت و لبست لبس العمليات و اتخدرت و عملت العملية و فاقت ....و اتعمل لها اللى مفيش برايفت ممكن يعمله لها.....ادفع لها فى الهيصة دى كلها ١٢٠ جنية من اهل الخير اللى لا يعرفوها ولا عمرهم قابلوها ... شفت ولاد الحلال بيساعدوا ست فى بلد غريب عنها ...و شفت ناس بتهتم بيها و ترجم لها مع انهم ميعرفوش بلدها فين على الخريطة...شفت ناس بتدعى لها ربها ان يقومها بالسلامة رغم انها بوذية و اشك انهم يعرفوا مين بوذا ده اصلا...شفت سفاراتها جاية بتتمخطر بعد ما كل حاجة خلصت و المصريين قاموا بالواجب. ..كان نفسى اقولك مفيش امل و انسانية بس العجيب العجاب ان طلع فى !
ربنا يوقف لك ولاد الحلال و يوقفك فى سكة الغلابا
النهاردة قضيت يوم رايق ... طفيت الموبايل و النت رحمنا من روحه و قطع ... قضيت يوم من اخواتى و ولاد اختى ..اتحججنا بالعيال عشان نلون البيض و ساعه الجد لونا احنا و منعنا العيال يلمسوا الالوان... ناكل رنجة و بصل لما نهيس و نحاول نجرب الفسيخ و نفشل زى كل سنه ... و اتفرجت على "الدنيا ربيع و الجو بديع" و "حلاوة شمسنا" و "ادى الربيع" و "يا حلاوة الورد يت جمال الورد"...ابدينا احترامنا للفراعنة الرايقين ... و ضحكنا و لعبنا كوتشينة و اخترعنا العاب جديد...و سمعنا الست... و لما النت جة لقيت دخلت لقيت اللى بتريق على الفسيخ و اللى بيقولك حرام و اللى بيقول "هو انا الوحيد اللى مش بحتفل بشم النسيم" و اللى بيقول "عيد باى حال عدت يا عيد" ...ايه الكآبة اللى انتوا فيها دى يا جدعان؟! و ليه مصرين ان تخلوا البعد عنكوا غنيمة؟!
اخلص اخر صفحة فى كتاب يوسف زيدان الجديد المسرب على التابلت ...وشى يمعتض لا اراديا...افكر انى لازم اكتب ريفيو طويل مفصل...المجموعة وحشة فى عمومها اه بس فيها قصص متألقة بتلمع و ده يستحق التوقف....اروح اسجل اسم المجموعة فى ملاحظات قراءة شهر ابريل...بقوا ٥ كتب و مكتبش ولا ريفيو...احاول اخد نفس و اكتب على التابلت...مفيش فايدة دماغى واقفة...اقرر ان صعوبه الكتابة على التاتش هو السبب الاوحد....اسيب التابلت و اقعد قدام الكمبيوتر الكبير...الاقى فيه لعبة المزرعة اللى بحبها...افتحها...اسقى البط و احط برسيم للخروف و افتح مصنع مربى جديد .... اشترى مزرعة عيش غراب بالفلوس الدهب...ابص للساعه اكتشفت ان عدى ساعتين....اقفل الكمبيوتر
اقنع نفسى ان مفيش حل غير انى اقعد قدام لاب توبى العزيز....افتكر انه بايظ من شهر و نص ... استلف من ابن خالتى نسخة ويندوز مسروقة ... اصطب فيها.. تعدى ساعة...يفتح اخيرا...ابدأ اصطب برامج القراية و الكتابة و الاغانى و متصفحات النت....تعدى ساعه كمان....افتح ملفات الكتب...افكر نفسى انى اقرا لعزت القمحاوى....اقرر انى مش هاعرف اكتب غير لما اسمع ايديت بياف ... ادوس بالماوس على الاغنية ...تتطلع رسالة خطأ ....كارت الصوت محتاج تعريف....افتح النت ادور عليه...احمله....السرعة بطيئة لان اختى بتحمل الحلقات المسربة من مسلسلها الاجنبى المفضل...ال٢٠ ميجا يخدوا ساعه .... ابدأ اكتب .....دماغى صفحة بيضا
اقفل ده كله و افتح كتاب.....سادس
لما تروح حفلة/معبد/مسجد اثرى/ متحف/جنينة ، ممكن لو سمحت تتصور مرتين بس؟ مرة فى فى الاول لوحدك و مرة فى الاخر مع صحابك و كفاية....جرب تستمتع بالخروجة نفسها بعينك مش من ورا العدسة خاصة انك مش فوتوجرافر يعنى .... بلاش عشان نفسك خليها عشان الغلابا اللى عايزين يتسمتعوا و يتفرجوا على الشئ المعروض مش شاشة تليفونك و فلاشك ....لو سمحتوا يعنى
عيب انك تبقى فى وادى الملوك فى الاقصر و نازل دورين بسلالم خشب عشان توصل للمقبرة اللى فيها اجمل حيطان و احلى سقف فى الكون و بدل ما تدى نفسك لحظة تنبهر تطلع ام موبايلك .....ادينى لعينيك متعة
ملحوظة: لما تروح تطبع الصورتين دول كممثل عن الخروجة فى البومك ، صورتين ابرك من ١٠٠ و الله ...
عمى السلفى: ايه اللى بتتفرجوا عليه ده؟
دينا: عادى فيلم اجنبى ... بس شفته قبل كده لو عايز تغير غير
عمى السلفى: عندكم قناة الشرق؟
دينا: قلت لك قبل كده يا عمو ملناش فى القنوات دى
عمى السلفى: الاعلام باظ خلاص ، عندك احمد جاموسة اللى على صدى البلد و الهبل اللى بيقوله
صوت داخلى ١: "جاموسة" ؟! على اساس انه قلش و نضحك و كده؟!
دينا: انا كمان مش بحبه...بيقول حاجات متقالش على تليفزيون
عمى السلفى: ولا ابو حمالات التانى اللى ابوه مات و هيحصله هو على جهنم
دينا: "صمت"
عمى السلفى: هههههه انما مذيع الشرق بقى طلع على الهوا و قال "يا سيسى يا ابن الكلب يا حرامى" هههه تخيلى ... شجاع
دينا: اه هو ده الاعلام الحقيقى فعلا -_-
عمى السلفى: انا جايب لك هدية من الحرم بقى ، بركة..."يناولها كيس مغلق"
دينا: "تفتح الكيس" امممم سبحة؟ كويس ... ازازة برفان صغير "تفتحها" افففف يا ساتر ... ايه ده و كتابين؟ .... "تضع الشنطة بجوارها" هدية مقبولة يا عمو
"بعد اسبوع"
دينا: مشفتيش الحاجات اللى عمى جابها لى هدية؟
ماما: متقريش الكتب دى يا دينا ، بقى دى حاجات تتقرى؟ .. جايب لك كتب فى السحر؟!
دينا: تصدقى نسيت اقراهم فعلا؟ هافتحه ابص فيه .. "تفتح الكتاب فتنفجر فى الضحك" يا نهار الوان الطيف؟ ايه المسخرة دى؟!
ماما: قلت لك بلاش
دينا: هاقرا لك حته تخصنا كدكتورة اسمعى يا ستى
"قال ابن القيم ان الصرع صرعين : صرع من الارواح الخبيثة الارضية و صرع من الاخلاط الرديئة و الثانى هو الذى يتكلم فيه الاطباء فى سببه و علاجه
و قد نص ابقراط فى بعض كتبه فذكر بعض علاج الصرع و قال: هذا و انما ينفع من الصرع الذى سببه الاخلاط و المادة و اما الصرع الذى يكون من الارواح فلا ينفع فيه هذا العلاج
و اما جهلة الاطباء و سقطهم و سفلتهم و من يعتقد فى الزنادقة فضيلة فاولئك ينكرون صرع الارواح ، و لا يقرون بانها تؤثر فى صرع المصروع و ليس ذلك الا جهل منهم ...و من له عقل يضحك من جهل هؤلاء و ضعف عقولهم"
ماما: عجبك كده؟
دينا: اشرح حاجة من الكلام ولا واضح؟ ... عموما انا من الزنادقة الجهلة السفلة دول يا مامى فى رأى عمو...لما يلف و يجى لى بقى
-عاملة ايه؟
-هو انا مش اللى عاملة ، ماما اللى عاملة رز و بسلة هو انا صحيح بقول لها تجيب بسلة خضرا بدل المجمدة دى عشان طعمها بيفرق و صحيح هى بتنكر و تقول انها خضرة بس لسه فيها خلاف ....رجلى دخل فيها جسم غريب مش عارفة ازاز ولا شوك بس بتوجعنى و حطيت عليها مرهم و ربطتها ....اه و النهاردة و انا فى نص الشارع قدام المجمع فى التحرير بعدى الشارع دخت و الارض لفت بيا و زى ما يكون السواقين بيلعبوا نيد فور سبيد و بيزودوا السرعه ما انقذنيش غير رحمه ربنا ... لسه بقرا فى المجلد ال٢٤ من قصة الحضارة و مطول معايا شوية ... خلصت كتابين و نفسى مسدودة انى اكتب لهم ريفيو ....ماما عايزانى اشترى جزمة و انا بقول له مش لازم....ابويا عنده زغطة من امبارح....اللاب توب بايظ بقاله شهر ... عندى حالة صفاء ذهنى و روقان غير مبررة اطلاقا مؤخرا ....و متضايقة شوية ان برنامج شوبير بقى الساعه ١١ و مبقتش اعرف اسمع حفلة الست فى الراديو....اتأخرت فى رجوع الكتب فى المكتبة و تلاقى عليا غرامة .... بسمع سعاد محمد كتير اليومين دول...
- "صمت"
-اه ...و الحمد لله
-طب كويس ...كنت عايزك فى خدمة
فى يوم هاكتب روايتى ، هتبقى اطول من الجبل السحرى و الدون الهادئ و البؤساء و سيرة ابو زيد الهلالى و الشاهنامة مجتمعين ... محدش هيطيق يقراها صحيح...بس انا هاكون استريحت ، و هاقدر انام و يومها مش هاظبط منبه
ديدرو كتب زمان رواية عبقرية اسمها "جاك المؤمن بالقدر" و الرواية الحلوة جدا دى ملهاش اى علاقة باللى هاكتبه ... اقدر اكتب كتاب اسمه ماما المؤمنة بالقدر
حكت لى مره فى ساعه صفا عن حادثة حصلت لها و هى فى ثانوى بتعتبر انها نقطة تحول ... البيوت زمان كانت قريبه من بعض و كل الجيران اهل ، و فى ليلة صيفية طلبت جارة من امى -لانها المتعلمة الوحيدة المتوفرة- انها تقرا لها كتالوج مكواة جايه لها من بره و تركبها ليها
جدتى لسبب لا يعلمه احد زقت امى فى الاوضة و قالت لها مالكيش دعوه ادخلى انتى مع انها صديقة صدوقة للجارة دى ، و هما بيتكلموا بالصدفه يمر جار تالت ليهم بيشتغل كهربائى .. يضحك و يقول لهم بقى جايبين العيلة دى تقرا و انا موجود؟! ركب الفيشة فى الكوبس.....اتكهرب....مات
نصائح تلخص يوم طويل :
١- متروحش ايفنت الاكل الهندى اللى فى الاوبرا او فى الازهر بارك ، التنظيم زفت ، الاكل غالى ، و مش يكفى الاعداد ابدا ، و مفيش قعدة محترمه
٢- فى مسرحية حلوة اسمها "بدلة البرق و الصقيع" بتتعرض فى مسرح الهناجر جميلة و شغل الاضاءة و الديكور فيها مميز ...حاول تروحها
٣-متصدقش امك لما تقولك متاكلش بره هاعمل لك محشى ... هتقضيها جبنة هى اصلا ما بتصدق تخلص من قرفك و اكلك
٤-فى حالة اصرارك على تجاهل النصيحة الاولى ، اعمل حسابك على ادوية تسمم و مضادات للقئ و فضى نفسك يومين تمرض فيهم براحتك
٥- الروايات و كتب التاريخ صديق جيد عموما و فى ايام المرض بذات ... جرب ٤٥١ فهرنايت لو مقرتهاش
٦- بلاش رمرمة
و كل اللى فاكراه انى كنت بقرا "الانجيل يرويه المسيح" ل جوزيه سارامجو .. كنت فى شيفت ليلى فى بنك الدم ...الساعه كانت ٣ صباحا و مفيش متبرعين وقتها...الفراغ شجعنى اريح فى قعدتى و ارفع رجلى على السرير....سارامجو كان بيكتب عن الساعات الاخيرة لعيسى و عن عطشه...و حكى عن الراجل اللى سقاه ميه و خل .... اقسم انى دوقت طعم الخل على شفايفى لحظتها
هى الناس بعد الحاجات الحلوة بتستعجل الجدية؟ جدودنا كانوا بيقولوا (راحت السكرة و جت الفكرة) ، طيب يعنى الفكرة جاية جاية ... متسربعين ليه؟!
استمتع بفرحتك و لو صغيره .. حطها تحت لسانك و سيبها تحلى مرارة حلقك بالراحة ، ببطئ ، رجع الكرسى لورا و بحلق فى السقف و تخيل البلاوى اللى كانت ممكن تحصل بس رحمه ربنا رفعتها عنك ، غمض عينك شوية ، اشرب نعناع اخضر مغلى ، حط نعناع و ليمون فى الخلاط و حط عليهم تلج ، اسمع الست و هى بتندندن (حبيب قلبى يا قلبى عليه ، و لو حتى يخاصمنى) ، يا ابنى ده الفرحة شئ بطبيعته نادر ...استمتع باللحظة و اعصرها لاخرها
Carpe diem يا ابنى
طيب..بعيدا عن ان بابا تعبان , و بعيدا عن معضلات الشرق الاوسط اللى زهقنا من لخبطتها , و بعيدا عن ان فكرة هش الدبان بسهم الماوس اثبتت فشلها , و بعيدا عن نتيجة التكليف المفروض تطلع النهاردة , و بعيدا عن مأساة نقص السراير فى الرعاية المركزة , و بعيدا عن اداء يوسف وهبى العجيب فى "كرسى الاعتراف" .... بعيدا عن ده كله , فراس السواح عامل كتاب جميل جدا عن اخوان الصفا
رحت ب بابا عند الدكتور و طمنى شوية ... الدكتور احترمنى و دى حاجة غريبه و شفت وسط تعب ابويا نظرة فخر ... بكرة هاحلف قسم الاطباء و ربنا يسامحنا .... ام كلثوم بتغنى لى لوحدى "وصفولى الصبر" .... اشتريت فستان و مفيش حاجة تشيل الهم اكتر ان البنت تشترى فستان فيه فيونكات بيضا ... ديورانت لسه بيحكى عن تأثير ابن رشد على ابن ميمون و تأثير الاتنين على الفلسفة الغربية... ام كلثوم صوتها حلو قوى فى الحان عبد الوهاب... الدكتور قال لى ان التخصص اللى عايزه اخده واقع و لازم افكر تانى.... ماما جابت لى سمسمية...الست صوتها حلو فى اى لحن و لو بتنادى على جرجير .... فراس السواح ده كاتب برنس عموما...لسه مش عارفه اقرا روايات ...صوت ام كلثوم رحمة ربنا ليا
حضرت امبارح الجمعية العمومية فى النقابة و بعد ٦ ساعات فيها قلت جااى و مشيت رغم وعدى لنفس انى احضرها كاملة....كرانشى اللى بالفراخ ده اجمل اختراع بعد التيار المستمر و قبل التيار المتردد بتاع تسلا حتى ...بابا النهاردة احسن شوية... من اول مرتب هاجيب كيندل و سكانر ...ديورانت بيحكى عن نشأة روسيا و ازاى اتكونت....صناديق الزبالة فى محطات المترو قلت قوى و بنقول يمكن له علاقة بالقنابل...بقالى ٤ سنين مش بشرب لبن...الحفلة كان فيها مغنى من الموسيقى العربية و نديت عليه يغنى "عبد الودود" بتاعه الشيخ امام و غناها فعلا و محدش تقريبا كان عارفها غيرى انا و المطرب و كانت متعة ...رئيس اليمن اللغة عنده ضايعه شوية...سارامجو وحشنى...نفسى هفانى اسمع "القلب يعشق كل جميل" بتاعه الست
الكوسة المقلية شئ فخيم و مش واخد حقه...لازم اقرا لفيليبب روث بقى...النهاردة اكتشفت ان جدى اللى مات قبل ما اتولد كان عنده نفس هوسى بالنعناع الاخضر....اشتريت كتاب "أخبار الزمان. ومن أباده الحدثان ، وعجائب البلدان والغامر بالماء والعمران" ل أبي الحسن علي بن الحسين بن علي المسعودي ....نتيجة التكليف قربت و لو ان محدش يعرف بالظبط امتى....الكيتوفان و اخواته من اروع ما ابتكر الانسان....عايزة اشترى شنطة بس اللى عجبتنى طلعت ب١٥٠ جنية فاقنعت نفسى انى مش محتاجاه ولا حاجة...قناة النيل دراما بتذيع مسلسل "دواعى امنية" اليومين دول...بفكر ارجع التغريبة الهلالية للمرة التالته ... وصلت فى قصة الحضارة للمجلد ال٢٤...زهقت من قعدة البيت
طيب نقدر نقول ان الست و هى بتقول "وإلام الأسر، والدنيا لدي؟! " بتلخص مش بس علاقة الحب ست/راجل , لأ تقريبا بتلخص علاقات البشر ببعض كلهم
#يا_سلام_يا_ست
خلونا كمان نتفق ان الست و هى بتقول (صالحت بيك ايامي...سامحت بيك الزمن...نستني بيك آلامي..ونسيت معاك الشجن) بتعمل حاجات فى الواحد حاجات غريبه , حكاية اننا "نسامح" الزمن براجل/ست دى صعبه قوى يا سومة ما انتى عارفه
خلينا نتوقف كمان عند سومة و هى بتقول ( عيون كانت بتحسدني على حبك و دلوقتى بتبكي عليا من غلبي) و هى بتوصفلك ان العذاب مش بس فى تعبها من تعودها عليه و حياتها اللى باظت من غيره ، لكن لما يتضاف لمعادلة الحبيب/الحبيبة عنصر الناس ... و عيون الناس
و تجى الست تثير فيك كل الافكار الوجودية فى وشك كده و تغنى (ليه نضيع عمرنا هجر و خصام واحنا نقدر نخلق الدنيا الجميلة؟ ) تفضل تلح عليك و تطول فى حته "ليييه" دى و انت واقف معندكش تفسير انك بتضيع حياتك ... و فى الأخر تعترف انها عندها حق
ملحوظة: للى قرا فى تاريخ المصريين شوية يعرف قيمة لقب "الست" اللى منحوه ل سومه...يعرف انه اهم بكتير من لقب " كوكب الشرق " ده
