طب و اللحمة؟!

"الزمان سنه 2000 , تجلس دينا كطالبة فى رابعة ابتدائى داخل فصل المدرسة الحكومى"

-مدرس العربى : النهاردة درسنا عن العالم المسلم الجليل الطبيب ابو بكر الرازى , يحكى ان العالم الاسلامى الجليل ده يا اولاد حب يبنى مستشفى فى يوم و اقترحوا له 3 اماكن يختار بينهم فعمل ايه يا ولاد؟ .. جاب 3 حتت لحمه و علقهم فى ال3 اماكن دول و اول مكان اللحمة باظت فيه استبعده و التانى برضه و اختار المستشفى فى اخر مكان باظت فيه اللحمة لانه يبقى افضل مكان لان الهوا فيه انقى و احسن

-دينا الطفلة: "ترفع يدها" بس كون اللحمة ما تبوظش ده معناه ان المكان ساقع مش معناه ان الهوا نقى , اللحمة بتبوظ من الحر مش من التلوث

-مدرس العربى: لا طبعا يا دينا ما هو الهوا النقى معناه انه بارد و نضيف

-دينا الطفلة: طيب و ايه الحكمة فى انه يقعد العيانين فى حته ساقعه مش كفايه اللى هما فيه يعنى؟! و بعدين ما التلاجة الهوا فيها مش نضيف ولا حاجة و اللحمة مش بتبوظ فيها

-مدرس العربى: بلاش تضييع وقت , القصه الهدف منها مش فكرة البرد  و اللحمة , الدرس عشان تعرفوا قيمة عالم اسلامى جليل افاد دينه

-دينا الطفلة: "تغمغم" طيب :/

"الزمان سنه 2014, تجلس دينا ممسكة بالتابلت على وجهها علامات ذهول"

-دينا: :o :o

-ماما: مالك يا بت؟ وشك عامل كده ليه؟

-دينا: ابو بكر الرازى يا ماما

-ماما: ايشمعنى؟

-دينا: ده وقت قافية؟! انا بنهار قدامك , الرازى طلع ملحد يا ماما .. عبد الرحمن بدوي عامل له فصل مخصوص من تاريخ الالحاد في الإسلام... احيييه , طب و اللحمة؟!

-ماما: لحمة ايه؟ انتى جعانة؟!