بلد شهادات

"تدخل دينا و امها الى مكتب الفيش و التشبية"

دينا: عايزة اعمل فيش مستعجل لو سمحت

موظف: طب هاتى بطاقتك و اقفى هناك

دينا: حاضر "تقف"

موظف: انتى يا ست انتى متقفيش هنا عشان الحيطة ، اقفى هناااك

ماما: بس بالراحة ، اسفين حاضر

موظف: لا مش اسفين ، مينفعش ، انا مش هاشتغل كده...هو انا مش قلت اقفى هناك؟ هو انتوا مش مصريين؟ مش عرب؟ مش بتفهموا عربى؟ مش بتكلم لاوندى انا ...قلنا هناك

ماما: يا استاذ حاضر بس وطى صوتك انا زميلتك فى الحى يعنى موظفين زى بعض ...هناك الرجالة واقفة و مش عايزين نتزنق وسطهم بس

موظف: "يعيد البطاقة الى دينا" يبقى تاخدى بطاقتك و تستنى لما كل الرجالة دى تخلص

ماما: خلاص خلاص معلش اعتبرها زى بنتك

موظف: اووووف يا ساتر ، طب هاتى البطاقة ، لحد ما اندى عليكى

صوت داخلى ١: و بتزعلوا من فساد السلطة فى الحكومة و الرياسه؟! ده الراجل مسيطر على كمبيوتر ب٥٠٠ جنية و عامل فيها الامبراطور اغسطس !! ولو مسكوا واحد مفتاح حمام هيعين نفسه مدير عموم الحمامات و المناديل على ابونا برضه

موظف: دينا نبيل تجى

دينا: "تجلس امامه" عايزة ٢ فيش لو سمحت

موظف: هو كل واحد عايز فيشين و ٣ ؟!!! هو واحد الدنيا زحمة

دينا: "تعيد ضبط النظارة" غصب عنى يا استاذى واحد لنقابة و واحد لمديريه..."تضغط على الحروف" نقابة الاطباء و مديرية الصحة

موظف: "تتلطف نغمة الصوت" مش تقولى يا دكتورة؟ تخصص ايه بقى؟

دينا: ما هو انت لازم تعمل لى الفيش عشان اعمل الكارنية للنقابة و اتخصص بقى

موظف: يا سلام على عينى ، و بلغى اعتذارى ل والدتك

دينا: "تبتسم"

صوت داخلى ٢: بلد شهادات صحيح