انا مش بحب طعم العيش الطرى و السخن اصلا مهما حبيت ريحته و اتغزلت فى جمال شكله و مدحت فى اللى اشتراه ، العيش البايت اللى تسخنه و "تقمره" على ايدك ده مزاج مختلف و لسه عندى قناعه ب خرافات امى القديمة ان "الخبيز السخن يوجع المعدة"
و لسبب ما امتد الحب ده للكتب ، فنادرا لما بشترى كتب جديدة بنار المطبعة -مش بس. لاسباب مالية- لا لانى حتى لو اشتريتها هاركنها لحد ما الدوشة عليها تروح خاصة ان كل حالات الاستثناء اللى عملتها فشلت معايا فشل غريب و متفق عليه
و اخيرا مش معقول كل الطلبات اللى بشوفها و توصل لى ناس عايزة "حاجات خفيفة و سريعه و حلوة و بنت ناس و عبقرية و اقل من ٢٠٠ صفحة" .....امال هنقرا الاخوة كرمازوف و لمن تدق الاجراس و الحرب و السلام و زوربا و الاخر مثلى و الحرافيش امتى بالصلاة عالنبى؟!!
كان فى فى رباعية الاسكندرية ل لورنس داريل شخصية مؤلف بيطالب ان كل صفحات الكتاب تبقى ملحومة لان فى رأيه القارئ اللى معندوش الجرأة يمسك للمؤلف السكينة و يفتح الورق بنفسه ميستهلش القراية
على الطلاق ما هينفع كلنا نتخصص جلدية و نقرا هيبتا ...على الطلاق ما هينفع ، انتوا بتوفروا صحكتوا لايه نفسى افهم؟ ده العافية للدود على رأى جدتى
الناس كلها بتسأل على تخصص مفهوش سهر و كتب مفهاش ورق...هنضرب الارض تطلع بطيخ هو فى ايه؟ ما نعض فى الدنيا شوية
#كلكم_عايزين_تبقوا_فتوات_امال_مين_اللي_حينضرب؟
0 التعليقات:
إرسال تعليق
حلو؟؟ وحش؟؟ طب ساكت ليه ما تقول....