عزيزتى رفايع: عاشورا

عزيزتى رفايع ، انا قضيت ليلة زى الطين

امبارح كانت عاشورا و باظت ،  و مين يعوضنى يا حكومة عن العكننه دى؟! انا اللى كنت بحضر للاحتفال بعاشورا بطريقتى الخاصة   و عملت حسابى من اسبوع و استعرت من المكتبة "الحسين ثائرا" و "الحسين شهيدا" و كنت ناويه اقراهم فى الليلة  باك تو باك ، و اشرب شاى بالخوخ و يمكن اكمل المود بشوية تواشيح ولا مدح

فبدل من ده كله يتحول اليوم انى انزل  شيفت نايت استقبال ؟!!

و ياريته كان شيفت عادى

امممم طيب انا قضيت شيفت امبارح لدرجة انى خايفه اكتب عن تفاصيله عشان اصدقائى اللى مش فى القطاع الطبى يتسرعوا و يتخضوا

ملخصه شيفت ١٢ ساعه لطفل قلبه بيقف كل نص ساعه و امه واقفه مزيج من الانكار على التوهان، و دكاترة بتحاول تعمل حاجة لكن الطريق شبه محتوم

احيانا الطب بيخبطك فى وشك بالحقيقة الكاملة

الست مش مدركة ان ابنها بيموت ، كل شوية تلاقينا بندى تنفس صناعى و بنضغط بايدنا على صدره و بنعد ...مش فاهمة اللى بنعمله معناه ايه ، تقرب من الدكتورة تقف جنبها و تقول لها: طب هو كويس؟....تبص لها الدكتورة و تحاول تتحكم فى صوتها و تقول لها: لا مش كويس

#شيفت_امبارح