عزيزى رفايع ٢

الا قولى لى يا رفايع هو حالك ازاى و انتى منسية؟ اعتقد احساس صعب صح؟

انتى عارفه يا رفايع انى اكتشفت النهاردة بس انى عمرى ما كتبت جواب حقيقى لحد؟ اقصد بورقة و قلم و ظرف....حتى الملاحظات المكتوبة اللى كنت بتبادلها انا و ماما بطلت بقينا بنتصل ببعض و حوار "انا هتأخر" و "انا فى المكتبة" و "هاتى معاكى رمان و انت راجعه"

انتى عارفه يا رفايع انى اكتشفت كمان انى معنديش حد ابعت له جوابات؟! مش بس حب و رومانسية لا بجد معنديش "حد" ابعت له فعلا ، لا صديقة بعيدة ولا حاجة تستدعى

ابتديت احس ان الكلام و الخواطر دى اتفه من انها تتقرى ، ده الناس مش بتقرا ل ماركيز هتقرا ليا انا؟!

عارفه يا رفايع؟ انا اختارتك انتى كمذاكرات ليه؟...ياريت تعرفى لان انا مش عارفه بالظبط ، يمكن لانك حل وسط بين العلانية المطلقة بتاعه الفيس و السرية التامة بتاعه المذاكرات الشخصية ، يمكن بستخدمها زى الرساله فى ازازة فى البحر مستنيه حد يقراها بالصدفة

رفايع....انا بقول "انا" كتير و دى علامة مش صحية اصلا!!