الدكتور عايز كده: البنات يطلعوا بره

و مع نهايه الجزء الاول من السيكشن اضع سماعات الاذن موصلا بالموبايل و اغمض عينى قليلا للاسترخاء و اسمع فى الحان زياد الرحبانى "ما في حديث .. و الجو تعيس .. ضيعانو كيف خلص الحب .. بأي حديث مافي حديث .. لشو الحديث .. خلص الحب... مافي مجال لأي سؤال إلا بحال بعد في حب".....


و فى وسط كل هذا الهدوء النسبى افتح عيونى لاجد هرج و مرج و حوارات.....انزع السماعات و اهتف : فى ايه؟؟؟...جاء الرد: النايب بيقول خرجوا البنات بره عشان الدكتور مانع الاختلاط.......


لحظه صمت و اندهاش....اضيف بشفيق استايل : اااايه؟؟؟....احاول استيضاح الامر فاكتشف التالى :
دكتور القلب الشهير المعروف انه سلفى مبلغ النايب (الدكتور الصغير اللى لسه متخرج جديد) بالفصل بين الطالبات و الطلبه لان الدكتور ميسمحش بالاختلاط بين الطلبه....


مرضتش اتحرك قبل ما اتاكد فرحت للنايب الصغير و وجهت له سؤال مباشر: ايه هو السبب الرسمى للوضع ده؟؟؟....فاجابنى انها تعليمات الدكتور و انه كل مره يجى يدرس بيدى "اوردر" بكده....


ما اقدرش اوصف احساسى وقتها ....مزيج من الغضب و الكراهيه و الضعف و قله الحيله....


الوضع كالتالى حوالى 50 بنت و 9 شاب فى راوند واحد طول عمرنا مع بعض ...عمرنا محسينا اننا بنات و شباب....5 سنين مع بعض كطلبه طب مش اكتر ....5 سنين لا عمرنا شبكنا فى ايد بعض او حصل موقف خارج و لو مره .....و زى ما انتوا شايفين عدد الشباب قليل و كده كده بيقعدوا مع بعض فى اخر صف ....


يجى دكتور يقرر فجأه انه يعلمنا الادب و الدين و يدخل الخلاف و الوقيعه بين صحاب و هتشوف بالتفاصيل...


فؤجئنا بالنايب بيطلع البنات من الاوضه (اللى هى قاعه كبيره حوالى 60 كرسى) و يطلعنا فى الطرقه الاول ثم يقول لنا ندخل فى غرفه ضيقه جدا لا تزيد عن 20 كرسى و يقولنا نستنى الدكتور الاضافى هنا لان الدكتور الاصلى هيدرس للشباب فى -التسعه- فى القاعه الكبيره....


هنا حصل الهرج الاكبر بين البنات ازاى ندخل قاعه بالحجم ده؟؟....و بدأت اقتراحات الاضراب و عدم حضور السيكشن او تقديم شكوى....


هنا بقى حصلت الجزء الثانى من البهدله الا و هو صراخ النايبه فى وش زميلتنا و زعيقها ليها لانها معترضه على اللى بيحصل ...و بنتشتم و نتبهدل قدام العيانين الرايح و الجاى.....


و لما نقرر اننا نقف على باب القاعه الكبيره و نرفض دخول "الحق" بضم الحاء ....نفاجئ بصديقتنا خارجه من القاعه غاضبه و لما سألنا عن سبب زعلها اكتشفنا ان الشباب  اللى المفروض انهم صاحبنا اللى واخدين مكانا جوا كاتبين على البورد "لما تبقوا زى بنات اليورو ابقوا ادخلوا" !!!!!!!!! و هنا جاء الجزء التالت من البهدله و مسح الكرامه بالارض


بعد خناقه مطوله دخلنا مكان الشباب فى القاعه الكبيره و دخلناهم فى الاوضه الاصغر....اللى فقعنى فعلا ان البنات اقتنعت ان ده انتصار و رد لكرامتهم المهانه!!!! و لا كأن الفصل ده مهين فى حد ذاته و ان دخولنا فى عصر قندهار و طورا بورا ده طبيعى 


و المأساه او الملهاه فى الامر لا ادرى اياهم ان الدكتور الكبير يجى  -متاخر طبعا- و يقول انه سوء تفاهم و انه قال للنائب يقسم الطلبه صفوف بنات و صفوف شباب مش انهم يخرجوا البنات بره.........و يكتمل الدرس بوجود البنات فقط فى القاعه مع الدكتور .......سوء تفاهم؟؟؟ كل الاحساس المهين ده سوء تفاهم؟؟!!!....انها المهانه......طبعا انا مش مضطره اكتب انى مسمعتش ولا كلمه من الدرس و ان الغضب و قله الحيله مازالوا مسيطرين على اعصابى حتى الان لذا فاعتذر اى اخطاء مطبعيه او لغويه فيما كتبت


كتبت قبلا فى هذا الموضوع ابان حدوثه فى جامعه بنى سويف و هو ما نفته الجامعه بعد ذلك.....لكنى بالتاكيد لم اتخيل انى سأوضع فى هذا الموقف قط
http://suchasmallaffairs.blogspot.com/2011/05/blog-post_14.html


فانا لم اقرر بعد كتابه شكوى ام لا حتى الان ....لكنى بالتاكيد جرحت حرج عميق فى كليتى و بلدى التى وضعتنى فى هذا الموقف....فاشهد يا وطنى ان يوم 12 يونيو 2012 لعلها كانت بدايه النهايه مع مجتمع ارفضه :((