بعد انتهائك من الكتاب او لنقل انتهاء الكتاب منك...تجد سؤال واحد كبير يلوح فى الافق بخط عريض: ماذا فعلوا بنجيب سرور ليصل لتلك المرحله؟؟...كيف تحول تجيب سرور "منين اجيب ناس" و "ياسين و بهيه" الى تيت اميات
انه امر لو تعرفون كبير...عشت لحظات بحاول اتخيل عملوا فيه ايه؟؟...ازاى قتلوا روحه قبل ما يقتلوا جسمه...حولوا الشاعر المرهف الى ناقم على كل شئ و اى شئ...كيف لم يعد يرى فى مصر غير "مفعول به" او "فاعل" ..لكن على اى حال عاش نجيب سرور و مات كل اللى عذبوه...عاش هو بين صفحات كتاب ..عاش فى سماعات كتاب اوديو...عاش فى ديوان منسى كتر عليه التراب لكن فى يوم يتنفض التراب و يتحضر روح نجيب سرور
يا بلادى ليه الانتحار والوعد هوه النصر
لكنه فضل وسط ده كله...بحب مصر بجد...بيحب البلد اللى قتلته ببطء بتلذذ باستمتاع...شتمتها و قال عليها كل ما يقال لكنه زى ما قال صلاح جاهين: بحب زى الداء...كيف فقد جزء من عقله لكن لم يفقد قلب يعشق تراب بلد كلت عيالها
************************************************
يابنى انا جعت واتعريت وشوفت الويل
وشربت أيامى كاس ورا كاس طرشت المر
يابنى بحق التراب وبحق حق النيل
لو جعت زيى ولو شنقوك ما تلعن مصر
اكره واكره واكره بس حب النيل
وحب مصر اللى فيها مبدأ الدنيا
دى مصر يا شهدى فى الجغرافيا ما لها مثيل
وفى التاريخ عمرها ما كانت التانيه
يعنى ها تطلع كده الأول باذن الله
فى الشعر والنثر والطيران وما شئتم
يعنى ها تطلع كده راجل باذن الله
مش م الخنافس تخاف من هجمة الفانتوم
إياك تقول م العذاب " هذا جناه ابى "
ما كنت اقولها وكان أوْلى " أبويا جناه "
أبويا مجنى عليه زيى .. وياما غبي
قال ع القتيل انه قاتل .. آه يا شهدى آه
آه يابنى يا ورده لسـه منوره ع الغصن
إوعى الخيانه يا كبدى إوعى م الاندال
الفن اصبح خيانه والخيانه فن
شوف الشوارع وقوللى فيها كام تمثال
بلدنا فيها الكرم حتى للاظوغلي
لاظوغلى مين .. واللّـه ما اعرف
نظرة يا عرابي
عارف عرابى يا شهدى .. والنبى تقوللي
على رأى عمك شكوكو " أحَّـه يا خرابى"
سبع سنين يابنى ما اعرف .. ياترى عيان
عريان .. جعان .. ولاَّ ميت ولاَّ لسَّـه حيّْ
سبع سنين يابنى فى الغربه وانا انسـان
مش أعمى .. لكن بفتش فى النهار ع الضيّْ
يابنى يا دمى يا صبرى اللى زهق م الصبر
الله يجازى اللى جاب لى فى الشباب داءين
سُـكَّر فى دمى .. وفوقه جاب لى داء السكْر
وحاش طبيبى .. وانا محتاج يا شهدى اتنين
عيان يا شهدى واديك شايف وليلى طويل
وتصحى يابنى تلاقينى م الألم سهران
يا حمَّى للصبح .. آه يا ليل يا عين يا ليل
ياخساره .. آدى الجدع سكران ومش سكران
يشرب ويشرب عشان ينسى ولا بينسي
الصلب والشنق والهول اللى ماله علاج
ياللى نسيتوا قولولى ازاى قتيل ينسي
ولاَّ انتوا برضو اللى قالوا " إصلبوا الحلاَّج "
قالولى بيعُه .. قالولى يابنى " بيع ابنك "
وجَوَّعونى يا شهدى فى بلاد برَّه
قالولى " ها تموت " و قلت اموت عشان خطرك
وموتونى وانا عايش متين مره
خاطرك كبير عندى يابنى وكله يرخصلك
وانت وانا للتراب .. نرخص ونفدى مصر
يا مصر كبدى تمن يرخص عشان خاطرك
لو حتى قالوا التمن يا مصر هوه القبر
سبع سنين يابنى يا نارى من المنفي
سبع سواقى بتنعى لم طافولى نار
وجيت يا بنى وقالوا كان فى مستشفي
ونارى ماتنطفى الا بأخد التار
قالوا انتهى .. قالوا يعنى خلاص بقى مجنون
يا شهدى مجنون بمصر و*** أُم الطب
الطب من عهد كاس سقراط بقى ملعون
الطب هو الجنون .. بس الجنون مش طب
###############################
اخلاء مسؤولية: انا مش برشح الكتاب ده لحد...لو حبيت تقراه يبقى على مسؤليتك الخاصه خاصه البنات لانه ممكن يسبب شويه-او كتير- من الاحراج
و قبل ما تقعد تنظّر او تعمل دور المصلح الاجتماعى تذكر دائما كلمات جدتى: اللى ايده فى المية مش زى اللى ايده فى النار
SONG THEME
الشيخ امام -بقرة حاحا
0 التعليقات:
إرسال تعليق
حلو؟؟ وحش؟؟ طب ساكت ليه ما تقول....