جيل المبتسرين الجدد

بحلم يا صاحبى وانا وانا لسه بحبى انا
بدنيا تانية ومصر جنة يا صاحبى
و اجى احقق الحلم ألقى
موج عالى عالى طاح بى
ونعود سوى نطوى الحنين بالأنين
و عشان كده مصر يا اولاد حلوة الحلوات

الثلاثى : سيد حجاب ـ بليغ حمدي ـ علي الحجار
***************************
لما تقرا او تسمع الاغنية دى تحس ان ازمة جيلنا ببساطة مش أزمة جيلنا بس...ده الموضوع قديييييم قوى....و الاحباط للاجيال الصاعدة عادة مصرية أصيلة.

الموضوع ما بدأش مع جيل ثورة يناير اللى اتفرج على نفسه بيتسحل بعد ثورته ...ولا حتى جيل المبتسرين بتاع السبعينات من امثال اروى صالح و اخواتها

الموضوع مش بعيد يكون بدأ مع أول فلاح اتمنى يبقى فرعون و فشل

او حتى اول عامل اتبعت للاستانة غصب عن عين اللى جابوه

تخيل انى اكتشفت ان تاريخنا عبارة عن سلسلة من الاحباطات التاريخية

او بعدها بأجيال بجيل الستينات و صلاح جاهين و نجيب سرور و امل دنقل و صلاح عبد الصبور اللى ماتوا كمدا على بلد مدمعتش عليهم دمعه واحدة لحد دلوقتى

و يبقى الأمل كالعادة:
ساعه الهوايل يقوم قايل يا بلداه
ويجي شايل هيلاهوب
شايل حمولها ويعدل المايل
وعشان كدة مصر يا ولاد حلوة الحلوات