نظرية الحسنات المجانيه...الناس بتفكر تاخد حسنات ازاى من غير ما تعمل حاجه؟؟..فينتهى الامر بابليكشن عالفيس بيطلع ادعيه!!!
ما انت مش فاهم...لما بتحط ابلكيشن بيحط احاديث و ادعيه اتوماتك مش بقراها لان مش انت اللى كاتبها...فلا انا ولا انت بناخد ثواب
قالوا لى انه ثواب و ان الدال على الخير كفاعله...طب ما هو كده لا فى دال ولا فاعل...محدش -على الاقل من اللى اعرفهم- بيقرا اصلا...يبقى فين الخير و فين فاعله؟؟
قالوا لى انه نشر للسنن...بس الموضوع مش فكره "كم" لا الكاتب بيكتب ...و لا القارئ بيقرا...يبقى العمليه ملهاش داعى غير الشكل...مظاهر ....او مجرد انه يكون عند صاحبك و عجبتك الفكره و يلا بتهيص فى الهيصه
هى المشكله لما ادخل عالفيس الساعه 5 الصبح و الاقى انا و الليل و الابليكشن بس...اداه منزوعه الحياه بتتكلم تحت صوره صحابك
عادى لو واحد من صحابك او حتى 5 مشتركين فى الابليشن الاسلامى...مشكله لو 500 واحد بيتنشر تحت اسمهم نفس الادعيه فى الهوم بتاعك
استمرار لنظريه الحسنات المجانيه: فكره العداد الاليكترونى فى التسبيح...الفكره حلوه بس للصين اللى صنعت المنتح و تبيعه...بينما تستمتع انت بالنظر فيه يتزايد رقميا و انت بتضرب كل رقم فى دول فى 10 لان الحسنه بعشره امثالها...مجرد ارقام...التسبيح حلو بس فى حاجه فى العمليه سحبت الروحانيه فى الاخر
و احد تبعات نظريه "الحسنات المجانيه" انتخاب القوى الاسلاميه فى الانتخابات برضه...و نعم للدستور...صكوك غفران مقنعه بشكل ما...اهو بجره قلم تخش الجنه حتى لو مش مقتنع قوى بس اهو تجرب مش يمكن تنفع
الناس بتعشق الحسنات اللى ببلاش...زى ما بتحب تخس من غير مجهود...و التثبت فى الشغل من غير شغل...حسنات من غير صدقات تكلفك فلوس...من غير صله رحم يكلفك مشوار تقيل على قلبك....ببلاش
عندى احساس ان الابليكشن ده جزء جديد من نظريه "عدم الاضافه للمحتوى" مجرد تداول عقيم زى فكره الشير و اللايك و كل الحاجات اللى مش بتكتبها بنفسك...
جرب تكتب حاجه بايدك ,من قلبك, من تجربه شخصيه هتلاقى الجذب اكتر و الاهتمام اكبر...شعر اهبل من تأليفك احلى من انك تشير شعر نزار و معاه صوره بنت بيضا وسط زرع ....الصورة اللى هتصورها للترعه اللى قدام بيتكوا بموبايل كحيان احلى من انك تشير رسمه ثرى دى رسمها فنان برازيلى...الحديث اللى هتدور عليه و تكتبه تبعا لاحساسك النهارده , حالتك النفسيه الساعه دى,موقف حصلك...احلى بكتتير من ابليكشن بيتكلم باسمك
4 التعليقات:
الدتكنولجيا يا عزيزتى
لعن الله التكنولجيا
كان زمان الجوابات فن ومش اى حد يعرف يكتب جواب
دلوقتى ال SMS
زى الدكاترة الكتور مش بيشوف المريض بيتعامل مع تقارير
انتهى عصر الكشف الاكنليكى
ده بمناسبة انك خلصتى امتحانات
تحياتى
عندى قناعه انك تقدر تستخدم التكنولوجيا الحديثه فى الكتاب برضه...مش عيب الsms الطويل المعبر بعيد عن الكلمات المقتضبه...و مفيش احلى من الفحص الكينكال طبعا
المشكلة في التكنولوجيا .. المشكلة ان الطريقة دي بتموت روح الحاجة اللي بتعملها ... بدل ما تكون سبحان الله معبرة عن انبهارك بابداع ربنا ... واعتراف بعظمته
تحولت لمجرد عداد لدرجة انت بتزهق من الناس اللي عاملين كده ... مش عاوز اقول بيزهقوك في كده
الله ، مقال رائع بجد يا دودي ، خصوصا اخر سطرين دول ، فكرتيني باكثر من سنتين من غير كتابة !!!
اما عن فكرة المقال نفسه فأحنا بنحب الارقام جدا و خصوصا إذا كانت ببلاش
وكل ما نخترع حاجة جديدة لازم نرزع فيها حاجة تموت روح العبادة و كأضافة لما قلتي تحميل المصحف كاملا علي موبايلك ببلاش ، تحميل المصحف باكثر من 20-30 صوت مقرا كأننا بنسمع ليهم كلهم يعني
و كيف تكسب مليار حسنة في الدقيقة و الكافر يطنش و المسلم يقول لايك ، و حاجات كثير من هذا القبيل
تحياتي
إرسال تعليق
حلو؟؟ وحش؟؟ طب ساكت ليه ما تقول....