الخميس، 9 يونيو 2011

حيره بعد حيره ما البدايه للنهايه


اتجول بين الازرار فى الكيبورد فلا اجد ما اريده , جوايا كلام عايز يطلع بس مش عارف ينظم نفسه , سياسه اممم ممكن بس مش معقول يعنى اشغل القارئ بكلام احبطه و كرهه و زهق و بحث عن بعض الرفاهيه على العالم الافتراضى النت فاجد نفسى ازيدمن اكتئابه بتشاؤمى المزمن او زى ما لخص واحد عاقل الموضوع فى جمله احببتها ( هل احسست بالاكتئاب و الاحباط و راوضت فكره ان تلقى بنفسك من برج القاهره او ان تجلس عليه ,اذا فامامك اختيار من ثلاثه : اما ان تذهب لطبيب نفسى محترم , او  تبدأ فى اجراءات الهجره بلا عوده , او ان تؤمن بالامل المطلق الغير مشروط علما بان لا ضامن له الا رحمه ربنا ) يبقى بلاش سياسه و عموما ما اظنش ايدى حيرانه ده كله عشان تكتب سياسه و زى ما قال الشيخ محمد عبده :  أعوذ بالله من  السياسه و من ساس يسوس  ومن سائس و مسوس،...




مازالت الحيره تلآلآ بين ظلمات النفس ....طب اكتب عن فيلم من اللى شفتهم قريب ؟ امممم لا مش معقول بعد ده كله اكتب عن ابداعات حد تانى فالفيلم ده عصاره بنى ادم عصر نفسه و حطه ليك كمشاهد فى كوبايه فاذا بيك تنتقده كمان ....و الامر متساوى فى الكتب برضه ....

و الحقيقه متوهانى ....فى الشوارع ليه بنسأل ميت سؤال ؟؟ و الطريق نمشيه و تانى بنرجعه ..كل حاجه فوق حدود الاحتمال ...كل واحد فينا جرحه بيوجعه ...."جزء من اغنيه الشوارع" ....مزيكا ااااه نفسى المزيكا تتكتب لكن ملهاش حل احيانا مش بلاقى حاجه بتعبر عن اللى عايزه اقوله اكتر من حته موسيقى بلا كلمات كأنك بتكلم بنى ادم اخرس لكن فاهم انت عايز تقول ايه لانه الوحيد اللى بيسمع بينما يتحدث الناس...




يمكن عندى اكتئاب ؟؟ و الله ممكن ....هى ايام الامتحانات كده بينزل عليا كلام غريب فى الايام دى , المفروض اقفل المدونه الايام دى لارحم الناس من تخاريفى و حيرتى و اصرارى كل سنه قبل الامتحانات بيومين انى اعرف سر الكون و احنا هنا فى هذا الكوكب البائس ده بنهبب ايه ؟؟!! ...الايام تتوالى  بنفس وصف و.ب. بيتس "تمضى الاعوام كالثيران السوداء الهائله تدوس العالم , الرب راعيها ينخسها من الخلف , و انا تحطمنى الحوافر الماضيه"   ....او زى ما قال ماثيو ارنولد "اجول حائر بين عالمين : عالم قضى و عالم عاجز عن الخروج للحياه" ...او على طريقه  جون درايدن لما قال  "اما نحن فكحراس محكومون بالوقوف فى ليال بلا نجوم . ننتظر الساعه الموقوته" .....فى لحظات كتلك تستطيع فهم اللوحات السيراليه فتملا الفراغات بروحك القلقه و يتضح المعنى...اسفه تانى شويه فلسفه على فذلكه 





فهمت انا عايزه اقول ايه ؟؟؟...فهمت ازاى يعنى اذا كنت انا نفسى مش فاهمه !!!....اظن تلك المقاله نواه لمقاله اخرى لم اعييها بعد و لم اكتبها بعد .....

12 التعليقات:

sharifaarts يقول...

واو
حستيني معاكي
وسرت ادور زيك واسأل انا عايزه ايه وفي بالي ايه
يمكن هالشي من اول فيا ولما قريت اللي هنا
حوست اكتر

بس حبت كل كلمه
ومقتبساتك كمان

ربي يعدي اختباراتك على خير

ENG./ELSAYED,PMP يقول...

دكتورة ... أحب أعقم ع الموضوع ده ... بأن الحالة دى فعلا حالة مناسبة لفهم اللوحات السيريالية ... وفهم القذافى شخصياً ... وأحب أضيف ... أنا أضيف ده انا غلبان ... ان طول ما السنجة بتوقع والكمسرى هوه اللى بينزل يركبها ... البلد دى مش هتشوف طيب ... انا كمان كنت ايام الامتحانات بحاول بشتى الطرق والكبارى أنى أفهم سر ذهاب الخيول إلى المزرعة ظهراً فى بئونة ... ومن حرك قطعة الجبن الخاصة بى ... و برنامج العلم والايمان ... وخصوصاً اللى بيتكلم عن النحل ... وكيف أن النحلة بتمد خرطومها فى قاع كأس متاع محيط الزهرة من تحت ...!

كريمة سندي يقول...

خدي بريك لفترة عشان تستعيدي نشاطتك مرة أخرى وابعدي عن وجع الدماغ

Casper يقول...

كثيرا لا نجد من الكلمات ما تعبر عما بداخلنا
فقط هي التخاريف من تصيبنا بالراحة والاستقرار النفسي نوعا ما

___________

خالص تحياتي

علاء ترك يقول...

ورب الكعبة انا سعيد عارفة ليه لانك وصفتى حالة تنتابنى كثيرا وتكون مبرر قوى جدا لتصرفات غير معقولة ومثيرة للضحك هو خليط من الضحك والبكاء واقعد اكلم نفسى شوية ول مفر من الاسراع الى النوم للهروب من هذه الحالة او الغرق فى احلام اليقظة فبعضها مهم
فى احد الايام عشت نفس النجربة وابدعت قصيدة منيلة يهباب اقراها فقط حين تعاودنى النوبة دى

Tamer Nabil Moussa يقول...

حالة بيمر بها الجميع

وقت ياتى علينا وقت لانعرف عايزين اية ورايحين فين دة


بس وقت وتعدى وبنرجع حلوين بعد الخروج من حالة التخبط دى

مع خالص تحياتى

Emtiaz Zourob يقول...

والله يا دينا . كلنا بتحصل معانا هذه الامور .. بنكون تايهين مش عارفين نكتب ولا نقول ايه .. افكار بتتصارع بداخلنا ولا نعرف ان نترجمها للواقع ونخرجها للنور .. كويس انك حاولت واكيد البوست الجاي ح يكون المفاجأة ..
::::

دمت بخير

Carmen يقول...

احيان كتير بنحس بالتشتت ده باذن الله قريب تستعيدي تركيزك وترجعلنا

Unknown يقول...

الحالة دي عادية على فكرة .
أنا كنت بحب الريفيو بتاعك في الأفلام .. :)
حتى لو الفيلم عصارة تعب و جهود ناس .. دة شغلهم :)
و بياخدوا فلوس عليه .. إحنا بقى بنكتب من أجل المتعة :)
هو دة الفرق .

Ms Venus يقول...

يااااه


جوايا نفس اللغبطة دى

ونفسى اكتب

بس مش قادرة

IMSA يقول...

د/دودي :
استطعتي أن تجعلي الجميع يشغل ذلك الكيان الهلامي داخل تلك الصفيحة المغلقة بالعظام والتي تسمى عقلا !!!
تحياتي لكِ دائما على ما تكتبيه وما يجعلنا نتفاعل معكِ
//
شكرا لكِ مرة أخرى وتقبلي ردي ومروري
وبالتوفيق في الامتحانات ..

Übersiedlung يقول...

ياااااااااارب

إرسال تعليق

حلو؟؟ وحش؟؟ طب ساكت ليه ما تقول....